Anembele Yoano
21 Kabiji Yesu wisolwele* mwine jibiji ku baana banji ba bwanga kwipi na Kalunga ka Mema ka Tibeliasa. Wisolwele bino. 2 Kwajinga Shimona Petelo, Tomase (watelwanga’mba Mpasa),+ Natanela+ wafumine ku Kena wa ku Ngalilea, baana ba kwa Zebede,+ ne baana banji ba bwanga bakwabo babiji. 3 Shimona Petelo wibambijile’mba: “Naya na kukwata masabi.” Abo bamwambijile’mba: “Ne atweba tubena kuya nobe.” Bayile ne kukanjila mu bwato, bino abwa bufuku kechi bakwachilepo nangwa jimotu ne.+
4 Nangwa byonkabyo, byo bwayilenga na kukya, Yesu waimene ku kitulu, bino baana banji ba bwanga kechi bayukile’mba, ye Yesu ne.+ 5 Kepo Yesu ebashikishe’mba: “Anweba baana, nanchi muji na kajo* ka kuja nyi?” Abo bakumbwile’mba: “Ine!” 6 Aye wibambijile’mba: “Telai bukonde ku kilujo kya bwato kabiji musakukwatapo amo.” Bebutele, bino bakankelwe kwibukokela mu bwato, mambo mwafwile masabi avula bingi.+ 7 Onkao mambo, awa mwana wa bwanga ye atemenwe Yesu,+ wabuujile Petelo amba: “Nkambo wa!” Petelo byo aumvwinetu amba iye Nkambo, wavwajile* kivwalo kyanji kya peulu, mambo wajinga mulekese,* kabiji witayile pa kalunga ka mema. 8 Bino baana ba bwanga bakwabo baishilenga mu bwato bucheche saka bakoka bukonde bwayujile masabi, mambo kechi bajinga palepa na kitulu ne, pajingatu mafiti* 300.
9 Byo batuntukijile ku kitulu, bamwene mujilo wa mashanga ne jisabi saka jiji peulu, ne shinkwa. 10 Yesu wibambijile’mba: “Letai masabi amo o mwakwata.” 11 Onkao mambo, Shimona Petelo wakanjijile mu bwato ne kukokela bukonde ku kitulu saka bwayula masabi akatampe 153. Bino nangwa kya kuba avujile, bukonde kechi bwachibaikile ne. 12 Yesu wibambijile’mba: “Iyai mwiaule.” Kafwako mwana wa bwanga nangwa umo wakonsheshe kumushikisha’mba: “Yenu bañanyi?” ne, mambo bayukile’mba ye iye Nkambo. 13 Yesu waimene ne kushikula shinkwa ne kwibapa, kabiji wibapele ne jisabi. 14 Kino kyajinga kimye kya busatu+ Yesu kyo amwekele ku baana banji ba bwanga kufuma kimye kyo bamusangwile mu bafu.
15 Byo bapwishishe kwiaula, Yesu washikishe Shimona Petelo amba: “Shimona mwana wa kwa Yoano, nanchi wantemwa kukila ano nyi?” Aye wamukumbwile’mba: “Ee Nkambo, anweba mwayuka’mba nemutemwa.” Aye wamwambijile’mba: “Jiisha twana twami twa mikooko.”+ 16 Kabiji wamushikishe ja bubiji amba: “Shimona mwana wa kwa Yoano, nanchi wantemwa nyi?” Aye wamukumbwile’mba: “Ee Nkambo, anweba mwayuka’mba nemutemwa.” Aye wamwambijile’mba: “Funganga twana twami twa mikooko.”+ 17 Wamushikishe ja busatu amba: “Shimona mwana wa kwa Yoano, nanchi wantemwa nyi?” Petelo waubile bulanda byo amushikishe ja busatu amba: “Nanchi wantemwa nyi?” Onkao mambo, wamukumbwile’mba: “Nkambo, mwayuka bintu byonse; kabiji mwayuka’mba nemutemwa.” Yesu wamwambijile’mba: “Jiisha twana twami twa mikooko.+ 18 Kinetu nakwambila namba, byo wakijinga mwanyike, wavwalanga ne kuya konse ko wakebanga kuya. Bino byo ukakota, ukatanyikanga maboko obe ne muntu mukwabo ukakuvwikanga ne kukutwala ko ukabulanga kukeba kuya.” 19 Waambile bino kutongola musango wa lufu Petelo lo akatumbijikilamo Lesa. Byo apwishishe kwamba bino, wamwambijile Petelo amba: “Twajijila kundondela.”+
20 Petelo byo aalulukile, wamwene mwana wa bwanga ye atemenwe Yesu+ saka alondela, yenkawa wasendalejile pa kyaji kya kwa Yesu kimye kya kijiilo kya mabanga ne kwamba’mba: “Nkambo, ñanyi usakwimusolola?” 21 Byo amumwene, Petelo wamushikishe Yesu amba: “Nkambo, nga uno muntu kikekala byepi?” 22 Yesu wamukumbwile’mba: “Umvwe kyo kyaswa muchima wami kuba’mba ekale posotu ne byo nkeya, pano obewa waakaminwa ka? Obewa ndondelengatu.” 23 Onkao mambo, bino byambo byakumbene mu balongo kuba’mba uno mwana wa bwanga kechi ukafwa ne. Nangwa byonkabyo, Yesu kechi wamwambijile’mba kechi ukafwa ne, bino amba: “Umvwe kyo kyaswa muchima wami kuba’mba ekale posotu ne byo nkeya, pano obewa waakaminwa ka?”
24 Uno ye mwana wa bwanga+ washimuna bino bintu kabiji ye wanembele bino bintu, ne atweba twayuka’mba kushimuna kwanji kwa kine.
25 Kabiji kuji ne bintu bikwabo byavula bingi Yesu byo aubile, kya kuba umvwe bebinembele byonse, kine pano pa ntanda inge pabula ne pa kubika ino mivungilo.+