Nkalata ya Bubiji ya kwa Petelo
2 Nangwa byonkabyo, mu bantu mwaishile bangauzhi ba bubela, byonkatu mwi anweba byo mukeya bafunjishi ba bubela.+ Abano mu bufyamfya bakaleta mabano, kabiji bakakana ne wibapotele,+ ne kwiletela bukiji lonaiko abo bene. 2 Kabiji bavula bakalondelanga byubilo byabo bya kwizozola,*+ kabiji na mambo a abo, jishinda ja bukine jikanenwa bibi.+ 3 Kabiji na mambo a lwiso lwabo bakemujimbaika na byambo bya bubela. Bino luzhachisho lwabo lo bebafuukwijile kala,+ lubena kwiya bingi lubilo, ne lonaiko lwabo kine lukeya.+
4 Kine, Lesa kechi wabujile kumanyika bamalaika balengele mambo ne,+ bino wibatayile mu Tatalusa,*+ kwibabika mu minyololo* ya mfishi ine ikatampe kupembelela luzhachisho.+ 5 Kabiji kechi waikeletu kwa kubula kumanyika aya ntanda ya kala ne,+ bino walamine Nowa musapwishi wasapwilanga bololoke,+ pamo na bakwabo batanu na babiji+ byo aletele muyulo pa ntanda ya bantu babulanga kumwakamwa.+ 6 Kabiji byo aonawine mizhi ya Sodoma ne Gomola kwikala butotu, wibazhachishe+ kwikala ke kya kumwenako kya bintu bikamwekela bantu babula kwakamwa Lesa.+ 7 Kabiji wapokolwele Lota waoloka,+ wajinga na bulanda bukatampe na mambo a byubilo bya kwizozola* bya bantu ba mizhilulwila— 8 pa juba pa juba, uno muntu waoloka, mweo* wanji waoloka wamukatazhanga bingi na mambo a byubilo byatama byo amonanga ne kumvwa, byo aikalanga na bano bantu. 9 Onkao mambo, Yehoba* wayuka bya kupokolola mu meseko bantu bamwakamwa,+ bino ulama bantu babula koloka kuba’mba akebonaune* mu juba ja kije,+ 10 kikatakata boba bakeba kwilaala na bakwabo kuba’mba bebazhilulule+ kabiji balengulula buntangi.*+
Na mambo a kuba bintu byo bakeba bene, kechi bachina kwambila mwenga bantu ba lukumo ne, 11 bino bamalaika nangwa kya kuba baji na ngovu ne bulume bukatampe, kechi bazhachisha bano bantu na byambo bya mwenga ne, na mambo a kunemeka Yehoba.*+ 12 Pakuba bano bantu baji nobe banyama babula kulanguluka, batangijilwa na maana a kisemwa kabiji basemwa kuba’mba bebakwate ne kwibepaya, bamba mwenga pa bintu byo babula kuyuka.+ Bakebonauna na mambo a byubilo byabo byatama, 13 kumanama kukekala mfweto yabo pa byubilo byabo byatama.
Kabiji batemwa kuba bya kwitobwela+ nangwatu mu kimye kya mute. Baji nobe biko biji pa bivwalo kabiji nobe bulema, basekela mu mafunjisho abo a bujimbijimbi kimye kyo baja bijiilo pamo ne anweba.+ 14 Meso abo ayula bukende+ kabiji kechi baleka kulenga mambo ne, bongola aba* babula kushikimana. Baji na michima yo bafunjisha lwiso. Bano ke baana bafingwa. 15 Byo baleka kwenda mu jishinda jaoloka, bebatwala mungi. Balondela jishinda ja Balamu,+ mwana wa kwa Beola, yenka watemenwe mfweto ya bubi,+ 16 bino bamunenene na mambo a kulala mizhilo yaoloka.+ Nyama usenda bipe ubula kwamba waambile na jiwi ja muntu ne kukanya byubilo bya bukonye bya uno ngauzhi.+
17 Bano o masulo abula mema, kamfwa ye batwala ku kipupu kikatampe, kabiji bebalamina mfishi ine ikatampe.+ 18 Abo bamba byambo bikatampe byatutu. Kwingijisha bisakasaka mubiji+ ne byubilo bya kwizozola,* bongola bantu banyema kufuma ku bantu boba byatama.+ 19 Balaya bantu bwana bwa bene, bino abo bene saka baji bazha ba bubole,+ mambo umvwe muntu bamushinda ku mukwabo, wikala ke muzha wanji.*+ 20 Kine, umvwe banyema ku biko bya pano pa ntanda+ kupichila mu kuyuka bulongo Nkambo kabiji Mupulushi aye Yesu Kilishitu, babwela jibiji ku byubilo bintutu bimo ne kwibashinda, ko kuba’mba bwikalo bwabo bo bajimo bwatama bingi kukila butanshi.+ 21 Kyawamine umvwe babujile kuyuka bulongo jishinda ja bololoke kukila pa kwijiyuka bulongo kabiji babwela bavundamina ku mikambizho yazhila yo batambwile.+ 22 Kibamwekela mwayila kino kishimpi kya kine kya kuba’mba: “Kabwa wabwela na kuja malashila anji, ne nkumba ye baovwele, wabwela na kwitaka mu mateshi.”+