Byubilo bya Batumwa
5 Muntu umo wa jizhina ja Ananyasa pamo na mukazhanji aye Safila bapoteshe kintu kyo banonkele. 2 Bino Ananyasa wafilepo mali amo, ne mukazhanji wayukile kino, kabiji waleteleko amo ne kwiatula ku batumwa.+ 3 Bino Petelo wamwipwizhe’mba: “Ananyasa, mambo ka o waswishisha Satana kukulengela kubepa+ mupashi wazhila+ ne kufyapo mali amo o wapotesha bujimi? 4 Nanchi bujimi kechi bwajinga bobe saka ukyangye kwibupotesha nenyi? Kabiji byo wibupoteshe, mali kechi ajinga obe nenyi? Pano mambo ka o waji kulangulukila kino kintu kyatama mu muchima wobe? Kechi wabepa bantu ne, wabepa Lesa.” 5 Ananyasa byo aumvwine bino byambo, waponene panshi ne kufwa. Ne bonse baumvwine kino, baubile bingi moyo. 6 Kepo bansongwalume baishile ne kumupomba mu bisapi ne kumutwala na kumuzhiika.
7 Byo papichile nobe maola asatu mukazhanji watwelele, kwa kubula kuyuka kyamwekele. 8 Petelo wamwipwizhe’mba: “Mbuule, nanchi ano o onka mali o mwapotesha bujimi bwenu nyi?” Safila wakumbwile’mba: “Ee mwane, o onka.” 9 Ponkapo Petelo wamwipwizhe’mba: “Mambo ka anweba babiji o mwaumvwañenejile kuba’mba mweseke mupashi wa Yehoba?* Umvwa! Aba baji kuzhiika mwatawobe baji pa kibelo, ne obewa basakukutwala.” 10 Ponkapotu waponene panshi ne kufwa. Bansongwalume byo baishile, bamutaaine wafwa kabiji bamusendele ne kukamuzhiika konka ko bazhiikile mwatawanji. 11 Onkao mambo, kipwilo kyonse ne bantu bonse baumvwine bino byamwekele, baubile bingi moyo.
12 Batumwa baubilenga bya kukumya* ne biyukilo byavula mu bantu;+ kabiji basambakenanga pamo mu Bukonde bwa Solomone.+ 13 Bino bakwabo bakankelwe kwinunga kwi abo; nangwa byonkabyo, bantu bebatumbijikilenga. 14 Kabiji aba baitabijile mwi Nkambo bavujilengakotu, banabalume ne banabakazhi bavula.+ 15 Baletelenga ne bakolwa mu mikwakwa ne kwibalaajika pa tumyanya ne pa mikeka, kuba’mba Petelo pa kupita kimvule kyanji kipite pa bamo.+ 16 Kabiji bantu bavula bafumine mu mizhi yajinga kipi kipi na Yelusalema baishilenga, saka basenda bakolelwenga ne boba bajinga na mipashi yatama, ne abo babukilwe bonse.
17 Bino ñanga mwine mukatampe waimene ne bo ajinga nabo ba mu kipanyi kya Basadusea kabiji baubile bingi kichima. 18 Kabiji bakwachile batumwa ne kwibataya mu kaleya ka bonse.+ 19 Bino bufuku malaika wa Yehoba* washinkwile binzhilo bya kaleya+ ne kwibalupwila pangye ne kwibambila’mba: 20 “Yainga mukemane mu nzubo ya Lesa, kabiji mukambenga ku bantu byambo byonse bikebalengela kwikala na bumi bwa myaka.” 21 Byo baumvwine kino, bayile lukelokelo mu nzubo ya Lesa kabiji batendekele kufunjisha.
Ñanga mwine mukatampe byo afikile ne bo ajinga nabo, baichile kije kya Saniedilini ne bakulumpe bonse ba bena Isalela, kabiji batumine ba kuya ku kaleya na kuleta batumwa kwi abo. 22 Bino bakapaso byo bafikile kokwa, kechi bebataainemo mu kaleya ne. Onkao mambo babwelele ne kupana sawakya, 23 amba: “Twataana bashinkamo mu kaleya ne baota saka baimana pa bibelo, bino pa kushinkulamo, kechi twaji kutaanamo muntu nangwa umo ne.” 24 Mukulumpe wa bakalama ba nzubo ya Lesa ne bañanga bakatampe byo baumvwine bino byambo, baakaminwe bingi pa bisakumweka. 25 Bino muntu umo waishile ne kwibabuula’mba: “Umvwai! Aba bo mwatayile mu kaleya baimana mu nzubo ya Lesa na kufunjisha bantu.” 26 Kepo mukulumpe wa bakalama ayijile pamo na bakapaso banji ne kwibaleta, bino kechi bebakozhezhe ne, mambo bachiinenga’mba bantu baketwasa mabwe.+
27 Onkao mambo, bebaletele ne kwibemika mu kije kya Saniedilini. Kepo ñanga mwine mukatampe ebepwizhe 28 ne kwibambila’mba: “Twimukambizhe kyakosa kuba’mba kechi mwafwainwa kufunjisha mu jino jizhina ne,+ pano akitalai! anweba mwakumbanya Yelusalema yense na mafunjisho enu, kabiji mwakebeshatu kwitushinkamika mashi a uno muntu.”+ 29 Petelo ne batumwa bakwabo bakumbwile’mba: “Lesa ye kalama ye twafwainwa kukookela kechi bantu ne.+ 30 Lesa wa bashakulu betu wasangwile Yesu ye mwaipayile, pa kumukobeka pa kichi.+ 31 Lesa wamutumbijikile ku kuboko kwanji kwa kilujo+ kwikala Ntangi Mwine+ ne Mupulushi+ pa kuba’mba bena Isalela balapile ne kulekelwa mambo abo.+ 32 Kabiji atweba twi bakamonyi pa bino bintu,+ ne mupashi wazhila+ naye pamo, Lesa ye apana ku boba bamukookela byo aji kalama.”
33 Byo baumvwine kino, bazhingijile* bingi ne kukeba kwibepaya. 34 Bino Mufaliseo umo wa jizhina ja Ngamaliela+ waimene mu kije kya Saniedilini; wajinga mufunjishi wa Mizhilo ye banemekele ku bantu bonse, kabiji wakambizhe’mba bano banabalume bakibalupuleko pangye kakimye kacheche. 35 Kepo ebambijile’mba: “Anweba bena Isalela, jimukai na byo mukeba kuba bano banabalume. 36 Ano moba saka akyangye kufika, Teusadasa waimene ne kwimwesha’mba wanema bingi, kabiji banabalume nobe 400 benungile ku jibumba janji. Bino bamwipayile, ne bonse bamulondejilenga bebapalañenye kabiji bazhimañene. 37 Teusadasa byo afwile, kwaimene Yudasa mwina Ngalilea mu moba a kunembesha mazhina, kabiji wajinga na bantu bamulondelanga. Pano bino, uno muntu naye bamwipayile, ne bonse bamulondelanga bapalañenejilemo. 38 Onkao mambo, pa kino kyamweka, nemwambila namba, bamukai bano banabalume ne kwibaleka. Mambo umvwe luno lufunjisho nangwa uno mwingilo wafuma ku bantu, bikazhimañana; 39 pakuba umvwe byafuma kwi Lesa, kechi mukebashinda ne.+ Mambo inge ne, mukataana’mba mubena kulwa ne Lesa.”+ 40 Ponkapo baumvwijile byo ebambijile, baichile batumwa ne kwibapuma,+ ne kwibakambizha’mba bekileke kwambanga mu jizhina ja Yesu, kabiji bebambijile’mba bayenga.
41 Onkao mambo, bafumine mu kije kya Saniedilini saka basekela,+ mambo Lesa wibanemekele byo bebanenene na mambo a jizhina ja Yesu. 42 Kabiji pa juba pa juba mu nzubo ya Lesa ne ku nzubo ku nzubo+ bafunjishenga ne kusapwila mambo awama aamba pe Kilishitu Yesu kwa kubula kuleka.+