Byubilo bya Batumwa
9 Bino Saulo byo akibazhingijile baana ba bwanga ba Nkambo ne kwibapingila amba ebepaye,+ wayile ku ñanga mwine mukatampe, 2 ne kulomba makalata a kuya nao ku mashinagoga a ku Damasakasa, kuba’mba akakonshe kukwata yense wajinga mu Jishinda+ ja Nkambo, banabalume ne banabakazhi ne kwibaleta ku Yelusalema.
3 Saulo byo ayilenga na kunangijila ku Damasakasa, ponkapotu kyeya kufuma mwiulu kyamusamijile,+ 4 ne aye waponene panshi kabiji waumvwine jiwi saka jimwambila’mba: “Saulo, Saulo, mambo ka o ubena kummanyikila?” 5 Aye waipwizhe’mba: “Nanchi yenu bañanyi, Nkambo?” Aye wakumbwile’mba: “Amiwa yami Yesu+ ye ubena kumanyika.+ 6 Nangwa byonkabyo, imana ukatwele mu muzhi kabiji bakakubuula kyo wafwainwa kuba.” 7 Bantu bo ayilenga nabo baimenetu nzoo, saka bomvwatu jiwi jonka, bino kechi bamwene muntu waambilenga ne.+ 8 Kepo Saulo abuukile panshi, kabiji nangwa kya kuba meso anji alabilenga kechi wamwenenga ne. Onkao mambo, bamukwachile ku kuboko ne kumutwala ku Damasakasa. 9 Pa moba asatu kechi wamwenenga,+ kuja nangwa kutoma ne.
10 Mu Damasakasa mwajinga mwana wa bwanga wa jizhina ja Ananyasa,+ kabiji Nkambo wamwichile mu kimwesho amba: “Ananyasa!” Ne aye waitabile’mba: “Amiwa bano, Nkambo.” 11 Nkambo wamwambijile’mba: “Imana, uyenga mu mukwakwa utelwa’mba Waoloka, ukepuzhe ku nzubo ya kwa Yudasa muntu wa jizhina ja Saulo mwina Talasusa.+ Mambo ubena kulomba, 12 kabiji mu kimwesho wamona muntu wa jizhina ja Ananyasa saka eya ne kumutenteka maboko kuba’mba atendeke kumona.”+ 13 Bino Ananyasa waambile’mba: “Nkambo, naumvwa ku bantu bavula pa uno muntu, ne bintu byatama byo ebobile bantu benu bazhila baji mu Yelusalema. 14 Kabiji bamupa luusa ku bañanga bakatampe lwa kukwata* bonse babena kwita pa jizhina jenu.”+ 15 Bino Nkambo wamwambijile’mba: “Yanga! Mambo uno muntu ye ye nasala+ kuba’mba akashimune jizhina jami ku bisaka bya bantu+ ne ku bamfumu+ ne ku bena Isalela. 16 Mambo nkamumwesha bintu byavula byo akamanama na mambo a jizhina jami.”+
17 Onkao mambo, Ananyasa wayile ne kukatwela mu nzubo, kabiji wamutentekele maboko ne kumwambila’mba: “Saulo mulongo wami, Nkambo Yesu wamwekele kwi obewa byo waishilenga mu mukwakwa, ye wantuma kuba’mba umone ne kuyula mupashi wazhila.”+ 18 Ponkapotu pa meso pafumine byapasha mabamba, kabiji watendekele kumona. Kepo aimene ne kubatizhiwa, 19 kabiji wajiile kajo ne kwikala na ngovu.
Waikele moba amo na baana ba bwanga mu Damasakasa,+ 20 kabiji ponkapotu watendekele kusapwila mu mashinagoga pe Yesu amba uno ye Mwana Lesa. 21 Bino aba bonse bamutelekelenga bakuminyenga bingi ne kwipuzha’mba: “Nanchi uno muntu kechi ye wamanyikilenga boba baji mu Yelusalema beta pa jino jizhina nenyi?+ Nanchi kechi waishile kuno na mulanguluko wa kwibakwata* ne kwibatwala ku bañanga bakatampe nenyi?”+ 22 Pakuba Saulo, bulume bwanji bwayilenga na kuvula kabiji wibashinkilenga bulaka Bayudea bajinga mu Damasakasa, byo ebalumbulwijilenga bulongo amba uno yenka ye Kilishitu.+
23 Byo papichile moba avula, Bayudea baumvwañene kuba’mba bamwipaye.+ 24 Bino Saulo wayukile bintu byo bafuukwile kumuba. Kabiji bamubelamijilenga ku bibelo bufuku ne mute kuba’mba bamwipaye. 25 Onkao mambo, baana banji ba bwanga bamusendele bufuku ne kumulupwila pa kipenze kya nsakwa mu ntumbe.+
26 Byo afikile mu Yelusalema,+ waesekele bingi kuba’mba enunge ku baana ba bwanga, bino bonse bamuchiinenga, mambo kechi baswile’mba waaluka ke mwana wa bwanga ne. 27 Onkao mambo, Banabasa+ waishile kumukwasha ne kumutwala ku batumwa, kabiji wibabuujile byonse byamwekele mu mukwakwa, Nkambo+ byo amwekele kwi aye, ne kuba’mba wisambile nanji, ne byo asapwijile na kuchinchika pa jizhina ja Yesu mu Damasakasa.+ 28 Onkao mambo, waikele nabo ne kwenda saka akasuluka mu Yelusalema ne kwamba na kuchinchika mu jizhina ja Nkambo. 29 Kabiji waambilenga ne kwipachika na Bayudea baambanga Kingiliki, bino abo bakebelenga kumwipaya.+ 30 Balongo byo bayukile kino, bamutwajile ku Kesalea ne kumutuma ku Talasusa.+
31 Kabiji kipwilo kyonse mu Yudea ne mu Ngalilea ne mu Samaliya+ kyaikele mu mutende saka kikoma; kabiji byo kyaendelenga mu moyo wa kwakamwa Yehoba* ne mu lutekenesho lwa mupashi wazhila,+ kyakomejilengakotu.
32 Petelo byo apitañenenga mu kibunji kyonse, wafikile ku bazhijikwa baikalanga mu muzhi wa Lida.+ 33 Konkakwa wataaineko muntu wa jizhina ja Eneasa walaalangatu pa mwanya pa myaka itanu na isatu, mambo wakolelwe kalepu. 34 Petelo wamwambijile’mba: “Eneasa, Yesu Kilishitu wakubuka.+ Imana wanshike mwanya wobe.”+ Ponkapotu waimene. 35 Bantu bonse baikalanga mu Lida ne mu Musanza wa Salona byo bamumwene, baitabijile mwi Nkambo.
36 Mu Yopa mwajinga mwana wa bwanga wa jizhina ja Tabita, kulumbulula’mba “Dokasi.”* Uno waingilanga mingilo yawama yavula kabiji wapananga bya bupe. 37 Bino mu oa moba, wakolelwe kabiji wafwile. Onkao mambo, bamovwele ne kumutula mu kibamba kya peulu. 38 Muzhi wa Lida byo ajinga pepi na Yopa, baana ba bwanga baumvwine’mba Petelo uji mu yewa muzhi, kabiji batumineko banabalume babiji na kumusashijila’mba: “Mwane kange mubande kwiya ko tuji ne.” 39 Ponkapo Petelo waimene ne kuya nabo. Byo afikile, bamutwajile mu kibamba kya peulu; ne banabakazhi bonse bafwilwa baishile kwi aye saka bajila ne kumumwesha bivwalo ne minkukumba* yasonanga Dokasi kimye kyo ajinga nabo. 40 Petelo wibalupwilemo bonse+ kabiji byo afukamine, walombele. Kabiji byo atajile pajinga mubiji wafwa waambile’mba: “Tabita, buka!” Ne aye walabilemo, byo amwene Petelo, wabuukile ne kwikala.+ 41 Petelo wamukwachile ku kuboko ne kumwimanya, kabiji waichile bazhijikwa ne banabakazhi bafwilwa ne kwibamwesha Tabita amba mumi.+ 42 Kino kyamwekele kyayukanyikilwe mu muzhi yense wa Yopa, kabiji bavula baitabijile mwi Nkambo.+ 43 Petelo waikele mu Yopa moba amo ne Shimona sendwe wa biseba.+