Nkalata ya Bubiji ku Bena Kolinda
7 Onkao mambo, anweba batemwe byo tuji na ino milaye,+ twayai twitokeshe ku bubipisho bonse bwa mubiji ne bwa mupashi,+ pa kuba’mba twikale bazhila byo tubena kwakamwa Lesa.
2 Tushilai mpunzha mu michima yenu.+ Kafwako ye twauba kyatama ne, kafwako ye twatwala mungi ne, kabiji kechi twajimukilapo muntu nangwa umo ne.+ 3 Kechi naamba kino kuba’mba nemuzhachishe ne. Mambo naambile kala namba, anweba muji mu michima yetu kuba’mba tufwile pamo nenu ne kwikala na bumi pamo. 4 Nakasuluka bingi pa kwamba kwi anweba. Kwitotela kwami mwi anweba kwabaya bingi. Bantekenesha bingi; kabiji nji bingi na lusekelo mu bya malwa byetu byonse.+
5 Mambo kimye kyo twafikile mu Makedonya,+ mibiji yetu kechi yakokolokelepo ne, pakuba twamwenengatu bya malwa konse konse—pangye pajinga malwañano, mukachi mwajinga bilengesha moyo. 6 Bino Lesa utekenesha boba bapopomenwa,+ witutekeneshe kimye kitupempwile* Titusa; 7 kechi kwitupempulatu kwanji konka ne, bino ne na mambo a kumutekenesha ko mwamutekeneshe, byo etubuujile pa mambo a kunkebesha kwenu, bulanda bwenu bukatampe ne muchima wenu wa kukebesha* kunkwasha; onkao mambo, nasekejile bingi.
8 Mambo nangwa kya kuba nemulengejile kwikala na bulanda na nkalata yami,+ kechi nelangulusha ne. Nangwa kya kuba patanshi nelangulwisheko pa kino, (namona kuba’mba nkalata imulengejile kwikala na bulanda pa kakimye kacheche), 9 pano nasekela kechi na mambo a kwimulengela kwikala na bulanda ne, bino ke na mambo a kuba bulanda bwimulengejile kulapila. Mambo anweba mwaikele na bulanda mwayila kyaswa muchima wa Lesa, o ene mambo o mwabujila kumona byatama na mambo a bintu byo twimwambijile. 10 Mambo kwikala na bulanda mwayila kyaswa muchima wa Lesa, kulengela muntu kulapila ne kumona lupulukilo, ko kulapila kubula kulengela muntu kwilangulusha;+ bino kwikala na bulanda bwa ba pano pa ntanda kuleta lufu. 11 Mambo kwikala na bulanda mwayila kyaswa muchima wa Lesa kwimulengela kwitokesha, kushikwa bubi, kwakamwa, kukebesha kulapila, kwikala na mukoyo ne kwingijilapo pa kintu kyatama!+ Mu bintu byonse mwamwesheshe amba mwaubile kyawama* mu ano mambo. 12 Nangwa kya kuba nemunembejile bino, kechi nanembele na mambo a yewa muntu waubile kyatama ne,+ nangwa na yewa ye baubile kyatama ne, bino nanembele kuba’mba kwitutesha muchima kwenu kumweke mwi anweba ku meso a Lesa. 13 O ene mambo o betutekeneshesha.
Bino kununga pa kwitutekenesha, twasekela bingi pa mambo a kwa Titusa, mambo anweba bonse mwaikizhe muchima wanji. 14 Mambo umvwe netota kwi aye na mambo a anweba, bintu byo naambile kechi byandengesha bumvu ne; byonkatu bino bintu byonse byo twimubuujile byo byajinga bya kine, ne kwitota kwetu kwi Titusa kwaikala kwa kine. 15 Kabiji butemwe bwanji bo emutemwa bwabaya bingi byo akivuluka lukookelo lwenu anweba bonse,+ byo mwamutambwijile na moyo ne kuzakama. 16 Nasekela bingi kuba’mba mu bintu byonse ngikale na luketekelo mwi* anweba.