Ku Bena Tesalonika
2 Nangwa byonkabyo, anweba balongo bami, pa mambo a kwikalapo kwa Nkambo yetu Yesu Kilishitu+ ne kukonkana kwetu kwi aye,+ tubena kwimulomba’mba 2 kange mupelawizhe kuzhinauka nangwa kufikenatu kusangalala na mambo a mañambila+ a kuba’mba juba ja Yehoba*+ jiji pepi, nangwa kya kuba ao mañambila aimena pa byambo bya mupashi,* nangwa byambotu nangwa nkalata yamweka nobe yafuma kwi atweba ne.
3 Kange muleke muntu nangwa umo emujimbaike nangwa pachechetu ne, mambo aja juba kechi jikafika ne, poso kusenduka mu lwitabilo+ kukeye patanshi ne muntu wa bumpupabizhila+ akamweke, mwana wa lonaiko.+ 4 Aye ulengulula yense ne kwitumbijika mwine kukila yense witela’mba lesa, nangwa kintu kyo bapopwela,* kabiji wikala mu nzubo ya Lesa, saka emwesha patoka’mba ye lesa. 5 Nanchi kechi mubena kuvuluka’mba byo nakijinga nenu nemubuulanga bino bintu nenyi?
6 Kabiji pano anweba mwayuka akya kibena kumukanya uno muntu wa bumpupabizhila, pa kuba’mba akamweke mu kimye kyanji kyafwainwa. 7 Buno bumpupabizhila bwafyamika, bubena kwingila ne pano,+ bino bukatwajijila kufyama poso bakekifumyepo akya kibukanya. 8 Kepo awa mpupabizhila bakamusolola, yenka ye bakepaya kwi Nkambo Yesu na mupashi wa mu kanwa kanji+ ne kumufumyapo mu kimye kikayukanyikwa+ kwikalapo kwanji. 9 Uno mpupabizhila waikalako na mambo a kwa Satana+ yenka umupa bulume bwa kuba mingilo ya bulume ne bimwesho bya bubela ne bya kukumya,*+ 10 ne bintu byonse byabula koloka bya bujimbijimbi+ ku boba babena konaika, kwikala luzhachisho lwabo mambo kechi baswile ne kutemwa bukine kuba’mba bakapuluke ne. 11 O ene mambo, Lesa o alekela bintu bivulañanya kwibatwala mungi kuba’mba betabile bya bubela,+ 12 pa kuba’mba bonse bakebachibile mambo, mambo kechi baitabijile bya kine ne, bino basekejilenga mu bintu byabula koloka.
13 Nangwa byonkabyo, tuji na mwingilo wa kusanchila Lesa kimye kyonse pa mambo a anweba, balongo bo batemwa kwi Yehoba,* mambo kufumatu ku ntendekelo Lesa wimusajile+ kuba’mba mukapuluke byo emuzhijikile+ na mupashi wanji ne na lwitabilo lwenu mu bukine. 14 Wimwichile ku kino kupichila mu mambo awama o tusapwila, kuba’mba mwikale na lukumo lwa Nkambo yetu Yesu Kilishitu.+ 15 Onkao mambo, anweba balongo bami, kosai+ ne kukakachila ku mafunjisho o bemufunjishe,+ nangwa ajinga a byambo bya pa kanwatu nangwa a mu nkalata yafumine kwi atweba. 16 Kabiji aye Nkambo yetu Yesu Kilishitu ne Lesa Shetu, yenka witutemwa+ kabiji witupele lutekenesho lwa myaka ne luketekelo lwawama+ mu lusa lwanji lukatampe, 17 atekeneshenga michima yenu ne kwimukosesha mu mingilo yonse yawama ne mu byambo byonse byawama.