Ku Bena Ngalatiya
2 Byo papichile myaka 14, nayile jibiji ku Yelusalema ne Banabasa+ ne Titusa.+ 2 Nayile na mambo a lumwekesho, kabiji nebabuujile mambo awama o mbena kusapwila mu bisaka bya bantu. Bino kechi nebabuujile pa mvula bantu, pa bantu batumbalala ne, kuchina’mba mwingilo ye naingijilenga nangwa ye naingila wakekala watutu. 3 Nangwa kya kuba Titusa+ ye najinga nanji, wajinga Mungiliki, kechi bamukanjikizhe kuya ku mukanda ne.+ 4 Pano bino, ano mambo akolomokele na mambo a balongo ba bubela bo baletele mu bufyamfya,+ bonka baishile na kumona bwana bwa bene bwetu+ bo twajinga nabo mwi Kilishitu Yesu, kuba’mba betutwale mu buzha;+ 5 bano kechi twibanekenene nangwatu pa kakimye* kacheche ne,+ kuba’mba bukine bwa mambo awama butwajijile ne anweba.
6 Bino pa mambo a boba bo bamonanga’mba batumbalala+—nangwa bajinga bantu ba byepi nangwa byepi, kechi bankijile ne, mambo Lesa kechi utala pa mmwekelo ya muntu ne—kabiji aba banabalume batumbalala kafwako nangwa kintu kimo kipya kyo bambuujile ne. 7 Pakuba byo bamwene’mba bampa mambo awama a kusapwila ku babula mukanda,+ byonkatu Petelo byo bamupele mambo a kusapwila ku boba ba mukanda— 8 mambo awa wapele bulume Petelo bwa butumwa bwa ku boba ba mukanda ye wampele ne amiwa bulume bwa ku ba mu bisaka bya bantu+— 9 kabiji byo bayukile lusa lukatampe lo bangubijile,+ Yakoba+ ne Kefasa* ne Yoano, bo bamonanga’mba mashiki, betwitabizhe amiwa ne Banabasa+ kupichila mu kwiimuna mu maboko abo a kilujo kuba’mba twafwainwa kuya ku bisaka bya bantu, pakuba abo baambile’mba bakaya ku boba ba mukanda. 10 Betubuujiletu amba twafwainwa kuvulukanga balongo betu bayanji, kabiji nateshako bingi muchima kuba kino.+
11 Nangwa byonkabyo, Kefasa*+ byo aishile ku Antioka,+ amiwa namusanzhilemo, mambo waubile kintu kyatama.* 12 Mambo banabalume bamo bafumine kwi Yakoba+ saka bakyangye kufika, wajiilanga pamo na bantu ba mu bisaka bya bantu;+ bino bano banabalume byo bafikile, walekele kuba bino ne kwabana nabo na mambo a kuchina boba ba mukanda.+ 13 Bayudea bakwabo nabo bamulondejile mu buno bujimbijimbi,* kya kuba ne Banabasa naye waongwelwe na bujimbijimbi* bwabo. 14 Bino byo namwene’mba kechi babena kwenda mu bukine bwa mambo awama ne,+ namushikishe Kefasa* pa meso a bonse namba: “Umvwe obewa byo uji Muyudea, wikala nobe bantu ba mu bisaka bya bantu, kechi bikala Bayudea ne, mambo ka o ubena kukanjikizha bantu ba mu bisaka bya bantu kwikala mwayila musango wa Bayudea?”+
15 Atweba Bayudea ba kisemwa, kechi bandengamambo ba mu bisaka bya bantu ne, 16 twayuka’mba mingilo ya mizhilo kechi yo ilengela muntu kutelwa’mba waoloka ne, bino muntu utelwa’mba waoloka na mambo a kwitabila+ mwi Yesu Kilishitu.+ Onkao mambo, twaitabila mwi Kilishitu Yesu kuba’mba tutelwe’mba baoloka na mambo a kwitabila mwi Kilishitu kechi na mambo a mingilo ya mizhilo ne, mambo kafwako muntu* nangwa umo ukatelwa’mba waoloka na mambo a kuba mingilo yaamba mizhilo ne.+ 17 Umvwe kya kuba atweba tubena kukeba kutelwa’mba baoloka na mambo a Kilishitu, twatanwa’mba ne atweba twi bandengamambo, nanchi Kilishitu ye wa mwingilo wa bundengamambo nyi? Ine! 18 Umvwe kintu kyo nakundwile nekishimika jibiji, ko kuba’mba nemmwesha ami mwine kwikala wa mizhilulwila. 19 Mambo mu mizhilo mo mo nafwijile,+ kuba’mba ngikale na bumi kwi Lesa. 20 Bampopela pa kichi pamo ne Kilishitu.+ Kechi amiwa naikala na bumi ne,+ bino Kilishitu ye waikala na bumi kabiji wakwatankana ne amiwa. Bumi bo nji nabo bwa bumubiji naikala nabo na mambo a kwitabila mu Mwana Lesa,+ yenka wantemenwe kabiji wipaine mwine na mambo a amiwa.+ 21 Kechi nkana* lusa lukatampe lwa Lesa ne,+ mambo umvwe muntu wikala waoloka na mambo a mizhilo, ko kuba’mba lufu lwa Kilishitu lwaaluka ke lwatu.+