Byubilo bya Batumwa
12 Pa kyokya kimye, mfumu Heloda watendekele kumanyika bantu bamo ba mu kipwilo.+ 2 Waipayile na mpoko Yakoba bankasa ne kolo ne Yoano.+ 3 Byo amwene’mba Bayudea basekejile bingi, wakwachile ne Petelo. (Kino kyajinga kimye kya moba a Bashinkwa Babula Mbizho.)+ 4 Wamukwachile ne kumutaya mu kaleya,+ kabiji wamupaine ku mabumba ana a bashilikale ba kumusopa, mu jibumba jimo mwajinga bashilikale bana, wakebelenga kumuleta* ku bantu inge Kijiilo kya Lupitailo kyapwa. 5 Onkao mambo, Petelo bamulaminenga mu kaleya, bino kipwilo kya mulombejilengako bingi kwi Lesa.+
6 Heloda byo ajinga pepi kumulupula, bonkabwa bufuku Petelo walaajile pakachi ka bashilikale babiji saka bamukasa minyololo ibiji, ne baota bajinga pa kibelo kya kaleya na kusopa. 7 Ponkapo malaika wa Yehoba* waimene konkakwa,+ ne kyeya kyasamine mu kaleya. Byo amusunsunyinye Petelo mu mbavu, wamubuushishe ne kumwambila’mba: “Endesha buuka!” Ne minyololo yaponeneko ku maboko anji.+ 8 Kepo malaika amwambijile’mba: “Vwala* bivwalo ne makwabilo obe.” Ne aye wavwajile. Kepo amwambijile’mba: “Vwala kivwalo kyobe kya peulu, undondelenga.” 9 Ne aye walupukile keamulondele, bino kechi wayukile’mba kyaubile malaika kyajinga kya kine ne. Petelo walangulukilenga’mba ubena kumona kimwesho. 10 Byo bapichile pa muota mutanshi ne wa bubiji, bafikile pa kinzhilo kya kyela kyatajile mu muzhi, kabiji kinzhilo kibashinkukijiletu kine. Byo balupukile, bayile mu mukwakwa umo, kabiji ponkapotu malaika wamushile. 11 Kabiji Petelo byo ayukile kyamwekelenga waambile’mba: “Pano po nayuka namba Yehoba* waji kutuma malaika wanji na kumpokolola kwi Heloda ne ku bintu byonse Bayudea byo baketekejile kuba’mba bisakummwekela.”+
12 Byo ayukile kino, wayile ku nzubo ya kwa Maliya inanji Yoano watelwanga’mba Mako,+ kwakonkenejile jibumba jicheche na kulomba. 13 Byo akonkonsheshe ku kinzhilo kya pangye, nsongwakazhi wa mwingilo wa jizhina ja Loda waishile na kumona wakonkonsheshenga. 14 Byo ayukile jiwi amba ja kwa Petelo, wasekejile bingi kya kuba kechi washinkwileko ku kibelo ne, bino wabwelakenye lubilo mukachi ne kubulañana’mba, Petelo waimana pa kibelo. 15 Abo bamwambijile’mba: “Wakonya obewa.” Bino aye wakoselepotu na kwibabuula’mba ye iye. Batendekele kwamba’mba: “Ye malaika wanji.” 16 Pakuba Petelo watwajijiletu na kukonkonsha. Byo bashinkwileko, bakuminye bingi pa kumumona. 17 Bino wibazhindamikilepo na kuboko ne kwibabuula Yehoba* byo amulupwile mu kaleya ne kwibambila’mba: “Mukabuule Yakoba+ ne balongo bino byonse.” Ponkapo walupukilemo kaye ne ku mpunzha ikwabo.
18 Byo bwakile lukelo, mwabuukile kiwowo mu bashilikale bakebelenga kuyuka kwayile Petelo. 19 Heloda wamukebele bingi Petelo, kabiji byo abujile kumutaana, watotolweshe baota ne kukambizha’mba bebatwale na kwibakambula;+ kabiji aye wafumineko ku Yudea ne kuya ku Kesalea ne kwikalako moba amo.
20 Heloda wibazhingijile* bingi bena Tila ne bena Shidona. Onkao mambo, bonse baishile kwi aye na mulanguluko umo kabiji byo baitabishe kalama wa bintu bya mu nzubo* ya mfumu aye Bulashita, bakebeshe kupwana na mfumu mambo kajo ko bajanga mu kyalo kyabo kafumanga ku kyalo kyanji. 21 Pa juba jatongwelwe, Heloda wavwajile bivwalo bya bufumu ne kwikala pa kipona kya kuchibilapo mambo, ne kutendeka kwamba ku bantu. 22 Kepo bantu bakonkene batendekele kubijika’mba: “Jino ke jiwi ja lesa, kechi ja muntu ne!” 23 Ponkapotu malaika wa Yehoba* walengejile Heloda kukolwa, mambo kechi wapele Lesa lukumo ne; kabiji bamujile ku mapila ne kufwa wafwile.
24 Bino, byambo bya Yehoba* byayilenga na kusampana ne bantu bavula baitabijilenga.+
25 Banabasa+ ne Saulo byo bapwishishe mwingilo wa kwaba kajo ka kutuuka mu Yelusalema,+ babwelele ku Antioka kabiji basendele Yoano+ watelwanga’mba Mako.