Kubala

19 Yehoba waambijile jibiji Mosesa ne Alona amba: 2 “Jino jo jilamuna ja muzhilo wakambizha Yehoba, ‘Buula bena Isalela amba bakakuletele ñombe uchila wabula bulema+ ye bakyangye kuvwikapo kikonkoji. 3 Mukamupane kwi Eleaza ñanga, ne aye akamutwale pangye ya kampu, kabiji uno ñombe bakamwipaye saka amonako. 4 Kabiji Eleaza ñanga akatumpe munwe wanji mu mashi amo ne kwiasansa bimye bitanu na bibiji kutazha kulutwe ya tente wa lusambakeno.+ 5 Kabiji ñombe bakamusoke saka amonako. Mwayi wanji ne nyama yanji ne mashi anji pamo na busobe bwanji bakebisoke.+ 6 Kabiji ñanga akashikule kichi kya sida, kakichi ka isopi+ ne tonge wachijisha ne kwibitaya pa mujilo paji ñombe ubena kupya. 7 Kepo ñanga akachape bivwalo byanji ne kowa* na mema, inge wapwisha kuba bino, akatwele mu kampu; bino ñanga ukekala wa muzhilo kufikatu ne mabanga.

8 “‘Kabiji muntu ukasoka ñombe akachape bivwalo byanji na mema ne kowa* na mema, kabiji ukekala wa muzhilo kufikatu ne mabanga.

9 “‘Muntu wabula wa muzhilo akawole buto bwa ñombe+ ne kwibutwala pangye ya kampu ku mpunzha yatoka, kabiji jibumba ja bena Isalela jikebulame ne kwibwingijisha pa kunengezha mema a kwingijisha pa kwitokesha.+ Uno ke mulambo wa bubi. 10 Muntu ukawola buto bwa ñombe, akachape bivwalo byanji ne kwikala wa muzhilo kufikatu ne mabanga.

“‘Jino jikekala jilamuna ja myaka ne myaka ku bena Isalela ne ku muntu wafuma ku kyalo kingi ye mwikala nanji.+ 11 Muntu yense ukakwata pa mubiji wa muntu* wafwa, ukekala wa muzhilo pa moba atanu na abiji.+ 12 Awo muntu aketokeshe pa juba ja busatu na mema a kwitokesha, kabiji pa juba ja butanu na bubiji ukekala wabula wa muzhilo. Bino umvwe wabula kwitokesha pa juba ja busatu, ko kuba’mba pa juba ja butanu na bubiji kechi ukekala wa muzhilo ne. 13 Muntu yense ukakwata pa mubiji wa muntu* wafwa ne kubula kwitokesha, wazhilulula tente wa lusambakeno wa Yehoba,+ kabiji awo muntu* bafwainwa kumuchibako* ku bena Isalela.+ Mambo kechi bamusanshile mema a kwitokesha ne,+ ukekala wa muzhilo. Ukatwajijila kwikala wa muzhilo.

14 “‘Uno ye muzhilo wa kulondela umvwe muntu wafwila mu tente: Muntu yense ukatwela mu tente ne yense wajinga monka mu tente bakekala ba muzhilo pa moba atanu na abiji. 15 Kabiji kipe kyonse kyo bakabula kuzhikapo kikekala kya muzhilo.+ 16 Kabiji muntu yense ukekala mu bujimi ukakwata pa mubiji wa muntu ye baipaya na mpoko nangwa pa mubiji wa muntu wafwa nangwa pa kikupa kya muntu nangwa pa kilende, ukekala wa muzhilo pa moba atanu na abiji.+ 17 Muntu wa muzhilo bakamusendelepo buto bwa nyama wa mulambo wa bubi ye basokele ne kwitulwilapo mema o batapula katataka aji mu kipe. 18 Kepo muntu wabula wa muzhilo+ akashikule kakichi ka isopi+ ne kwikatumpa mu mema ne kwiasansa ku tente ne pa bipe byonse ne pa bantu bajingamo mu tente, ne pa bantu* bakwachile pa kikupa nangwa pa muntu ye baipayile nangwa pa mubiji wa muntu wafwa nangwa pa kilende. 19 Muntu wabula wa muzhilo akasanse mema pa muntu wa muzhilo pa juba ja busatu ne pa juba ja butanu na bubiji kabiji aketokeshe ku bubi pa juba ja butanu na bubiji;+ apa bino akachape bivwalo byanji ne kowa na mema kabiji mabanga ukekala wabula wa muzhilo.

20 “‘Pakuba muntu wa muzhilo ukabula kwitokesha, awo muntu* bafwainwa kumuchibako* ku kipwilo,+ mambo wazhilulula nzubo yazhila ya Yehoba. Mambo kechi bamusanshile mema a kwitokesha ne, onkao mambo, ye wa muzhilo.

21 “‘Jino jo jikekala jilamuna ja myaka ne myaka kwi abo: Muntu ukasansa mema a kwitokesha+ akachape bivwalo byanji, ne yewa ukakwata mu mema a kwitokesha ukekala wa muzhilo kufikatu ne mabanga. 22 Kintu kyonse muntu wa muzhilo kyo akakwatako kikekala kya muzhilo, ne muntu* ukekikwata ukekala wa muzhilo kufikatu ne mabanga.’”+