Nkalata ya kwa Yuda
1 Amiwa Yuda kalume wa kwa Yesu Kilishitu, nkasanji Yakoba,+ mbena kunembela basalwa+ bo atemwa Lesa Tata kabiji balaminwa Yesu Kilishitu+ amba:
2 Lusa ne mutende ne butemwe bimuvujile.
3 Anweba batemwe, nangwa kya kuba nateshesheko bingi muchima kukeba kwimunembela pa mambo a lupulukilo lwetu atweba bonse,+ namona’mba kyamfwainwa kwimunembela kuba’mba nemusashijile namba mulwile na muchima yense lwitabilo+ lo bapele bazhijikwa jimotu jonka. 4 Mambo kuji bantu bamo baongolokelamo mwi anweba bonkaba bo baawijile jimo kala ku bangauzhi amba batongwelwa luno luzhachisho mu Binembelo; bo bantu babula kwakamwa Lesa, baalula lusa lukatampe lwa Lesa ke mwa kubila byubilo bya kwizozola*+ kabiji bakana mfumu* wetu umotu kabiji Nkambo, aye Yesu Kilishitu.+
5 Nangwa kya kuba mwayukila kala jimo kino, nakebesha bingi kwimuvululamo namba Yehoba* wapulwishe bantu kufuma mu kyalo kya Ijipita,+ bino aba babujile lwitabilo wibonawine.+ 6 Kabiji bamalaika babujile kulama bifulo byabo ne kusha mapunzha abo a kwikalamo awama,+ wibalama mu minyololo ya myaka mu mfishi ine ikatampe kufikatu ne kimye kyo bakebazhachisha mu juba jikatampe.+ 7 Byo byo kyajinga mu Sodoma ne Gomola ne mizhi yajinga kipikipi, nabo bepaine mu kuba bulalelale* ne kulondalonda bintu byabula kufwainwa bisakasaka mibiji yabo;+ bebakambwile mu mujilo wa myaka, onkao mambo baikala ke kya kwitujimunako.+
8 Nangwa kyajinga bino, bano bantu babena kulota biloto, saka bazhilulula mibiji, kulengulula buntangi ne kwambila mwenga bantu ba lukumo.+ 9 Bino kimye Mikela+ malaika mwine mukatampe+ kyo ekatezhenga ne Diabola ne kwipachika nanji pa mambo a mubiji wa kwa Mosesa,+ aye kechi wakebelenga kumuzhachisha na byambo bya mwenga ne,+ bino waambile’mba: “Yehoba* akukajipile.”+ 10 Pakuba bano bantu babena kwamba mwenga pa bintu byonse byo babula kukwatakanya.+ Baji nobe banyama babula kulanguluka kabiji boba bintu mwayila miteeto ya banyama+ mu bintu byonse byo boba saka bezhilulula abo bene.
11 Kibatamina bingi bano bantu, mambo benda mu jishinda ja kwa Kaina+ kabiji bapelawizha kulondela bwikalo bwatama bwa kwa Balamu+ na mambo a mfweto, ne konaikila mu bunsatuki+ bwa kwa Kola!+ 12 Bano bantu baji nobe mabwe akatampe afyama mu mema, babena kuja nenu mu bijiilo byenu bya butemwe,+ bo bakafunga bejishatu bene kwa kubula moyo;+ o makumbi abula mvula o batwala na mwela;+ byo bichi bya mu kimye kya kisalo bibula kupanga bipangwa, byauma jibiji* ne kuzhujika; 13 boba byubilo bya bumvu biji nobe manyaki a pa kalunga ka mema alenga kapofu ka biko;+ to tubangabanga tupitatu to balamina mfishi yafiitatu bwii ya myaka ne myaka.+
14 Kabiji bano bonka bo bo aawilepo Enoka+ wa mu kisemi kya butanu na bubiji kufuma kwi Adama amba: “Talai! Yehoba* waishile na mabumba* a bamalaika banji bazhila,+ 15 na kwibachibila mambo+ ne kuzhachisha bonse babula kumwakamwa na mambo a byubilo byabo byatama byo baubilenga mu jishinda jibula kumwesha kwakamwa Lesa, ne na bintu byonse bya bumvu byo bamwambijilenga bandengamambo babula kwakamwa Lesa.”+
16 Bano bantu banyinyita+ ne kutamauka na mambo a bintu byabo bya mu bwikalo, saka balondela bisakasaka michima yabo,+ kabiji byatunwa byabo byamba byambo bikatampe bya kwitota, saka bamba byambo bya mulambisha ku bantu* na mambo a kukeba’mba bamwenemo bintu abo bene.+
17 Pakuba anweba batemwe, vulukainga byambo byo baambile* kala batumwa ba kwa Nkambo yetu Yesu Kilishitu, 18 byo bemwambilanga kimye kyonse amba: “Mu kimye kyapelako kukeya bakambanga mwenga saka balondela bintu bisakasaka michima yabo bibula kumwesha kwakamwa Lesa.”+ 19 Bano bo boba baleta mabano,+ bantu boba bintu nobe banyama* kabiji babula bumupashi. 20 Pakuba anweba batemwe, ikomeshainga anwe bene mu lwitabilo lwenu lwazhila ne kulomba na mupashi wazhila,+ 21 pa kuba’mba mwikale mu butemwe bwa Lesa,+ byo mubena kutengela lusa lwa Nkambo yetu Yesu Kilishitu luleta bumi bwa myaka ne myaka.+ 22 Kabiji bobilainga lusa+ bantu bamo bazhinauka;+ 23 bapulushai+ kupichila mu kwibasompola mu mujilo. Bino twajijilai kubila bakwenu lusa saka mujimuka pa kuba bino, ne kushikwa kivwalo kyo basombesha na mingilo yatama.+
24 Kwi aye wakonsha kwimukwasha kubula kwituntula ne kwimulengela kwikala babula bulema+ mu lukumo lwanji* na lusekelo lukatampe, 25 kwi aye Lesa umotu Mupulushi wetu kupichila mwi Yesu Kilishitu Nkambo yetu, kwikale lukumo, buneme, bulume ne luusa myaka yonse yapita ne luno ne mu myaka yonse ikeya. Amena.