Nkalata Itanshi ku Bena Kolinda
9 Nanchi kechi nakasuluka nenyi? Nanchi kechi nemutumwa nenyi? Nanchi kechi namumwene Yesu Nkambo yetu nenyi?+ Nanchi anweba kechi yenu mwafuma mu mwingilo wami wa mwi Nkambo nenyi? 2 Nangwa kya kuba kechi nemutumwa ku bantu bakwabo ne, bino nemutumwa kwi anweba! Mambo anweba mwi katetesho ka butumwa bwami mwi Nkambo.
3 Kwifumya kwami mu mambo ku boba banzhachisha ke kuno kwa kuba’mba: 4 Nanchi kechi tuji na luusa lwa kuja ne kutoma nenyi? 5 Nanchi kechi tuji na luusa lwa kuyila pamo na mukazhi* waitabila+ byonka byuba batumwa bakwabo, balongo ba Nkambo+ ne Kefasa*+ nenyi? 6 Nanchi amiwa ne Banabasa+ yetu bonka twabula luusa lwa kwingila mingilo mwa kumwena bya ku mubiji nyi? 7 Ñanyi mushilikale wingila saka emwena mfweto mwine? Ñanyi ujima bujimi bwa miñanzañanza ubula kujako bipangwa byayo?+ Nangwa ñanyi ufunga jitanga ja mikooko ubula kutomako mukaka wa ku jitanga?
8 Nanchi mbena kwamba bino bintu mwambila bantu nyi? Nanchi Mizhilo nayo kechi yaamba pa bino bintu nenyi? 9 Mambo mu Mizhilo ya Mosesa, mwanembwa’mba: “Kange mukakase ñombe ku kanwa kimye kyo abena kupuula kajo ne.”+ Nanchi bañombe balume, Lesa bo bo atatu muchima nyi? 10 Nanchi waambatu kino pe atweba nyi? Kyanembejilwe atweba, mambo muntu ujima ne yewa upuula bafwainwa kuketekela kwabana.
11 Umvwe twabyala mwi anweba bintu byafuma kwi Lesa, nanchi kyo kintu kyanema umvwe twanowa mwi anweba bintu bya kwikwashishamo nyi?+ 12 Umvwe bantu bakwabo baji na luno luusa pe anweba, nanchi atweba kechi twibakila nenyi? Nangwa byonkabyo, kechi twaingijisha luno luusa ne,+ bino tubena kuchinchika mu bintu byonse kuba’mba tubule kukanya mambo awama aamba pe Kilishitu.+ 13 Nanchi kechi mwayuka’mba bantu bengila mingilo yazhila baja bintu bya mu nzubo ya Lesa ne aba bengila kimye kyonse ku kya kusokelapo bitapisho batambula bintu byo batapisha ku kya kusokelapo bitapisho nenyi?+ 14 Byonkabyo, Nkambo wakambizhe’mba aba basapwila mambo awama bajiilenga monka mu mambo awama.+
15 Bino amiwa kechi naingijishapo kintu nangwa kimo pa bino bintu ne.+ Kechi nanemba bino bintu kuba’mba mwibimpe ne, mambo kyawama kufwa kukila—kafwako muntu ukafumyapo bintu byo netotelamo!+ 16 Umvwe mbena kusapwila mambo awama kechi nafwainwa kwitota ne, mambo kyamfwainwa’mba ñingile uno mwingilo. Kine, malwa o ami umvwe nabula kusapwila mambo awama!+ 17 Inge naingila uno mwingilo na muchima umo, nji na mfweto; bino umvwe namwingila saka nabula kusaka, kyo kimotu bampa bukalama.+ 18 Nanchi mfweto yami yo yepi? Ke ya kuba’mba inge nasapwila mambo awama mbule kutambula mali kabiji mbule kutwala mungi luusa lwami lwa mu mambo awama.
19 Nangwa kya kuba nakasuluka ku bantu bonse, nealula kwikala muzha ku bonse kuba’mba mmwenemo bantu bavula. 20 Ku Bayudea naalukile ke Muyudea kuba’mba mmwenemo Bayudea;+ ku baji mu mizhilo naalukile ke wa mu mizhilo nangwa kya kuba amiwa kechi najinga mu mizhilo ne, pa kuba’mba mmwenemo aba baji mu mizhilo.+ 21 Ku boba babula mu mizhilo, naalukile ke wabula mu mizhilo nangwa kya kuba amiwa kechi nabula mizhilo kwi Lesa ne, bino nji monka mu mizhilo ya Kilishitu+ kuba’mba mmwenemo aba babula mu mizhilo. 22 Ku babula kukosa, naalukile ke wabula kukosa kuba’mba mmwenemo bantu babula kukosa.+ Naalukile bintu byonse ku bantu bonse kuba’mba umvwe kyakonsheka mpulushepo bamo. 23 Bino nguba bintu byonse na mambo a mambo awama, pa kuba’mba neasapwile ku bantu.+
24 Nanchi kechi mwayuka’mba bantu banyema kapela bonse banyema, bino muntu umotu ye utambula kilambu nenyi? Nyemainga na mulanguluko wa kuba’mba mukekitambule.+ 25 Kabiji muntu yense ukaya bisela bya kwikyombesha wikanya mu bintu byonse. Boba kino kuba’mba batambule munchinya onaika,+ pakuba atweba tukeba kutambula ubula konaika.+ 26 Onkao mambo, amiwa kechi nyema kinyemenyemetu ne;+ kabiji byo ntaya makofi kechi mpumatu mu mwela ne; 27 bino mpumapuma* mubiji wami+ ne kumutwala mu buzha kuba’mba inge nasapwila bantu, mbule kulengululwa.