Ku Bena Kolose
4 Anweba bankambo yabo, ubilainga bakalume benu kyonka kyaoloka ne kyafwainwa, byo mwayuka’mba ne anweba muji na Nkambo yenu mwiulu.+
2 Lombainga na mukoyo,+ kabiji pa kuba bino, mulabenga ne kukenketa ne kusanta.+ 3 Kabiji pa kimye kimo, saka mwitulombelako+ pa kuba’mba Lesa etushinkwile kibelo kya mambo anji, kuba’mba tusapwile kyafyamika kyazhila kya Kilishitu kyo bankashilapo minyololo,+ 4 ne kuba’mba nkekisapwile bulongo byonka byo nafwainwa kuba.
5 Saka muyuka bya kwenda ku boba ba pangye ne kwingijisha kimye* kyenu bulongo.+ 6 Byambo byenu kimye kyonse bikale na bibusa kabiji byalungwamo mukele,+ kuba’mba muyuke byo mwafwainwa kukumbula muntu yense.+
7 Tikikusa+ mulongo wami mutemwe, wa mwingilo wa kishinka kalume mukwetu mwi Nkambo ye ukemubuula bintu byonse pe amiwa. 8 Mbena kumutuma namba muyuke byo tuji ne kuba’mba emutekeneshe. 9 Aye ukeshila pamo ne Onesimusa+ mulongo wami wa kishinka ye natemwa wajinga ne anweba; bakemubuula bintu byonse bibena kumweka kuno.
10 Alisatakusa+ kaili mukwetu wimwimuna, ne Mako+ naye wimwimuna, yenka mulongo wa kwa Banabasa (yenka ye bemukambizhe’mba mwafwainwa kumutambwila+ umvwe waiya ko muji), 11 ne Yesu ye batela’mba Yusitusa naye wimwimuna, bano bo boba baya ku mukanda. Bano bo bonka bakwetu ba mingilo ba mambo a Bufumu bwa Lesa kabiji bantekenesha* bingi. 12 Epafalasa+ kalume wa Kilishitu Yesu wafumine kwi anweba wimwimuna. Kimye kyonse wimulombelako kuba’mba mukose ne kushiinwa kya kine mu bintu byonse monka mwaswila muchima wa Lesa. 13 Mambo amiwa naamba kya kine namba wingila na ngovu na mambo a anweba ne boba baji mu Laodikea ne mu Hilapolisa.
14 Luka+ mutemwe shayuka wa michi wimwimuna, ne Demasa+ naye wimwimuna. 15 Ñimwinaiko balongo baji mu Laodikea ne Nyimfwasa ne kipwilo kiji pa nzubo yanji.+ 16 Kabiji ino nkalata pa kupwisha kwiitanga mukeitume ku kipwilo kya bena Laodikea kuba’mba bakeitange,+ ne anweba mukatange nkalata ikafuma ku Laodikea. 17 Kabiji mubuule Akipusa+ amba: “Teshako muchima ku mwingilo ye watambwile mwi Nkambo, pa kuba’mba umwingile bulongo.”
18 Amiwa Paulo yami nanemba luno lwimu na kuboko kwami.+ Saka muvuluka minyololo yami yo bankasa.+ Lusa lukatampe lwa Lesa lwikale ne anweba.