Ku Bena Loma
13 Muntu* yense akookelenga bakulumpe balama kyalo,+ mambo bukulumpe bufuma kwi Lesa;+ bano Lesa wibaswisha kwikala pa bifulo byabo.+ 2 Onkao mambo, yense ubula kunemeka bakulumpe balama kyalo, wakana lunengezho lwabikako Lesa; aba bonse bakana luno lunengezho bakazhatwa. 3 Mambo bano bantangi kechi bebachina ku bantu boba byawama ne, kana ku bantu boba byatama.+ Nanchi mukeba kuleka kuchina bano bakulumpe balama kyalo nyi? Ubainga byawama+ kabiji bakulumpe balama kyalo bakemutakaikanga; 4 mambo abo bo ba mingilo ba Lesa ba kwimwingijila byawama. Bino umvwe mubena kuba kyatama chinainga, mambo mpoko kechi beisenda kyatutu ne. Abo bo ba mingilo ba Lesa, ba kushinkanya kuba’mba bamweshe bukaji* ku yewa uba byatama.
5 Onkao mambo, kyanema bingi kuba’mba mukookelenga kechi na mambo a bukajitu ne, bino ne na mambo a jiwi jenu ja mu muchima.+ 6 O ene mambo, o mubena kupaina ne misonko; mambo abo ke ba mingilo ba Lesa bengijila bantu kimye kyonse uno mwingilo. 7 Saka mupana ku bonse bibafwainwa: ku ukeba musonko, mumupe musonko;+ ku ukeba mulambo, mumupe mulambo; ku wafwainwa kumwakamwa, mumwakamwe;+ kabiji ku ukeba munema, mumunemeke.+
8 Kechi mwikale na nkongole na muntu nangwa umo ne, poso kwitemwa anwe bene na bene;+ mambo awa watemwa mukwabo wafikizha mizhilo.+ 9 Mambo mizhilo yanembwa yaamba’mba, “Kechi wafwainwa kuba bukende ne,+ kechi wafwainwa kwipayañana ne,+ kechi wafwainwa kwiba ne,+ kechi wafwainwa kukumbwa ne,”+ ne mikambizhotu ikwabo, yapwila mu bino byambo bya kuba’mba: “Wafwainwa kutemwa mukwenu byonka byo witemwa obe mwine.”+ 10 Muntu uji na butemwe kechi uba mukwabo kyatama ne;+ onkao mambo, butemwe bo bufikizha mizhilo.+
11 Kabiji ubainga kino, mambo anweba mwayuka kino kimye kyo tujimo, kuba’mba kyo kimye kya kubuuka mu tulo,+ mambo lupulukilo lwetu lujitu pepi kukila kimye kyo twaitabijile. 12 Bufuku bwapwa kala; bwakya ne kukya. Onkao mambo, twayai tusankilepo mingilo ya mu mfishi,+ tuvwale bilwilo bya kyeya.+ 13 Twayai twikalenga na byubilo byawama+ nobe boba baji mu kyeya, kechi na kusangalala kubi* ne na kupendwapendwa ne, kechi mu kuba bulalelale ne byubilo bya kwizozola* ne,+ kechi mu lutobo ne kuba kichima ne.+ 14 Bino vwalainga Nkambo Yesu Kilishitu+ kabiji kange mulangulukilenga jimo kuba bisakasaka mibiji yenu ne.+