Ezikyo

6 “‘Bino umvwe kasopa wamona mpoko na kwiya, kabiji wabula kuvumya lusengo+ ne kujimunako bantu, kabiji baipayamo umo na mpoko mwi abo, awo muntu ukafwa na mambo a bubi bwanji, pakuba kasopa nkamupamo mambo a mashi a yewo muntu.’*+

7 “Pakuba obewa mwana muntu, nakutongola kwikala kasopa wa ba mu nzubo ya Isalela; kabiji inge waumvwa bintu byo nkamba, ukebanjimwineko.+ 8 Umvwe naambila mubi namba, ‘Obewa mubi, kine ukafwa!’+ bino obewa wabula kumujimunako kuba’mba apimpule byubilo byanji byatama, aye byo aji muntu mubi ukafwa na mambo a bubi bwanji,+ pakuba amiwa nkakupamo mambo a mashi anji. 9 Bino inge wajimunako mubi kuba’mba aleke byubilo byanji byatama, ne aye wakana kupimpula byubilo byanji, ko kuba’mba aye ukafwa na mambo a bubi bwanji,+ pakuba obewa ukapulusha bumi* bobe.+

10 “Kabiji obewa mwana muntu, buula kisaka kya Isalela amba, ‘Anweba mwamba’mba: “Mizhilulwila yetu ne bubi bwetu bitunemena ne kwitulengela kunyana;+ pano tukatwajijila byepi kwikala na bumi?”’+ 11 Babuule’mba, ‘Nkambo Mfumu Yehoba waamba’mba, “Byonkatu byo nji na bumi, amiwa kechi nsekela mu lufu lwa muntu mubi ne,+ bino nkeba namba muntu mubi aleke kuba bintu byatama,+ ekale na bumi.+ Anweba kisaka kya Isalela, pimpulai byubilo byenu byatama,+ nanchi mambo ka o mukebela kufwa?”’+

12 “Obewa mwana muntu, buula balongo bobe amba, ‘Muntu waoloka kechi ukapuluka na mambo a bololoke bwanji umvwe walenga mambo ne.+ Kabiji bubi bwa muntu mubi kechi bukamulengela kufwa umvwe waleka kuba bintu byatama ne.+ Ne muntu waoloka naye kechi ukatwajijila kwikala na bumi na mambo a bololoke bwanji mu juba jo akalenga mambo ne.+ 13 Inge naambila muntu waoloka namba: “Kine ukekala na bumi,” bino aye waketekela mu bololoke bwanji ne kuba bintu byatama,*+ ko kuba’mba bintu byonse byaoloka byo aubile kechi nkebivuluka ne, pakuba aye ukafwa na mambo a bintu byatama byo auba.+

14 “‘Kabiji inge naambila muntu mubi namba: “Kine ukafwa,” bino aye waleka kuba bintu byatama ne kutendeka kuba bintu byaoloka,+ 15 kabiji muntu mubi wabwezha bintu byo akwachijilemo ku muntu ye akongwesheshe,+ wabwezha bintu byo aibile+ ne kwenda mu malamuna alengela muntu kwikala na bumi kupichila mu kuba bintu byawama, ko kuba’mba aye ukekala na bumi.+ Kechi ukafwa ne. 16 Mambo onse o alengele kechi nkeavulukapo jibiji ne.+ Aye ukapuluka na mambo a kuba bintu byawama ne byaoloka.’+

17 “Pakuba balongo bobe bamba’mba, ‘Jishinda jubilamo Yehoba bintu kechi jaoloka ne,’ bino mashinda abo o bobilamo bintu o abula koloka.

18 “Inge muntu waoloka waleka kuba bintu byawama kabiji watendeka kuba bintu byatama, ukafwa na mambo a bubi bwanji.+ 19 Bino inge mubi waleka kuba byatama kabiji watendeka kuba bintu byaoloka, aye ukekala na bumi na mambo a kuba byaoloka.+

20 “Pakuba anweba mwamba’mba, ‘Jishinda jubilamo Yehoba bintu kechi jaoloka ne.’+ Anweba ba mu nzubo ya Isalela, nkemuchibila mambo pa muntu pa muntu monka mwayila byubilo byenu.”

21 Kabiji mu mwaka wa bu 12 ye twajinga mu buzha mu ñondo wa bujikumi, pa juba ja butanu ja ñondo, muntu wapulukile mu Yelusalema waishile kwi amiwa+ ne kuñambila’mba: “Muzhi bamonauna!”+

22 Mabanga awa muntu wapulukile saka akyangye kwiya kwi amiwa, bulume bwa Yehoba bwaishile pe amiwa, kabiji lujimi wami wakasulukile awa muntu saka akyangye kwiya kwi amiwa lukelo. Onkao mambo, natatwile kwamba kabiji kechi naikele kamaama jibiji ne.+

23 Kepo Yehoba añambijile’mba: 24 “Obewa mwana muntu, bantu ba mu ino mizhi+ yaonaika babena kwamba pa kyalo kya Isalela amba, ‘Abalahama wajingatu bunke, bino watambwile kyalo ke kyanji kya kwikalamo.+ Bino atweba twavula; betupa kyalo kwikala ke kyetu kya kwikalamo.’

25 “Onkao mambo, wibabuule’mba, ‘Nkambo Mfumu Yehoba waamba’mba: “Anweba mubena kujiila kumo nyama na mashi ayo,+ mutala ku bankishi* benu ba bunya, kabiji mwatwajijila kwichila mashi.+ Pano mwakonsha kutambula byepi kyalo kwikala ke kyenu? 26 Anweba mwaketekelatu mu mapoko enu,+ muba bintu bya bunya, kabiji pa muntu pa muntu mulaala na bakazhi ba bakwenu.+ Pano mwakonsha kutambula byepi kyalo kwikala ke kyenu?”’+

27 “Ukebabuule’mba, ‘Nkambo Mfumu Yehoba waamba’mba: “Byonkatu byo nji na bumi, aba babena kwikala mu mizhi yaonaika bakafwa ku mpoko; aba bekala mungye bakebaja ku banyama; kabiji aba bekala mu masakwa akosa ne mu bibwe bakafwa ku mwalo.+ 28 Nkalengela kyalo kushalatu masala+ ne konauna bintu byo kitotelamo kabiji nkonauna mitumba ya Isalela,+ kechi mukapitanga muntu nangwa umo ne. 29 Po po bakayuka’mba amiwa yami Yehoba byo nkalengela kyalo kushalatu masala+ na mambo a bintu byonse bya bunya byo bauba.”’+

30 “Pakuba obewa mwana muntu, balongo bobe babena kwamba pe obewa kunyuma ya nsakwa ne mu bibelo bya mazubo abo.+ Babena kwiambila mulwabo amba, ‘Twayai tukomvwe bisakwamba Yehoba.’ 31 Bakeya kipanyi kwi obewa ne kumweka nobe bantu bami; kabiji bakomvwa bintu byo ukebabuula, bino kechi bakebilondela ne.+ Na tunwa twabo, bamba bya mulambisha kwi obewa,* bino mu michima yabo saka mwayula lwiso. 32 Umvwa! Obewa uji nobe lwimbo wa butemwe kwi abo, ye baimba bulongo na kimenge ne na kijimba kya mizhinge. Bakomvwa bintu byo ukebabuula, pano bino kafwako nangwa umo ukebyuba ne. 33 Bino kine bikobiwa kabiji kimye kyo bikobiwa, po po bakayuka’mba ngauzhi wajinga mwi abo.”+