Ku Bena Efisesa
3 Na mambo a kino, amiwa Paulo, kaili+ wa Kilishitu Yesu na mambo a anweba, bantu ba mu bisaka bya bantu— 2 mwaumvwa pa mambo a bukalama+ bo bampele bwa lusa lukatampe lwa Lesa na mambo a anweba, 3 kuba’mba kyafyamika kyazhila bekisolwele kwi amiwa byonkatu byo nemunembejile kala mu byambo bicheche. 4 Onkao mambo, byo mukatanga pa kino, mukayuka’mba amiwa naumvwisha kyafyamika kyazhila+ kya Kilishitu. 5 Mu bisemi bikwabo, kino kyafyamika kechi bekisolwejile bantu bangi byonka byo kyasololwa na mupashi ku batumwa banji bazhila ne bangauzhi ne,+ 6 kuba’mba kupichila mwi Kilishitu Yesu ne mu mambo awama, bantu ba mu bisaka bya bantu bekale banswanyi, kabiji binungwa bimo+ ne atweba mo tukatambwila pamo mulaye. 7 Naikajile ke wa mwingilo wa kino monka mwayila bupe bwa lusa lukatampe lwa Lesa lo bampele kupichila mu bulume bwanji.+
8 Amiwa, muntu mucheche kukila pa bonse bazhijikwa,+ bangubijile luno lusa lukatampe,+ kuba’mba nsapwile ku bisaka bya bantu mambo awama aamba pa bintu byawamisha bya Kilishitu bya kubula kukonsha kuyuka 9 kabiji byafwainwa kulengela muntu yense kumona bukalama bwa kyafyamika kyazhila+ kyo bafile pa myaka yavula kwi Lesa walengele bintu byonse. 10 Kyajinga bino kuba’mba kupichila mu kipwilo,+ makafulumende ne bakulumpe ba mu mapunzha a mwiulu bayuke maana a Lesa amwekela mu mashinda apusana pusana.+ 11 Kino kyaesakana na mwayila kufuukula kwanji kwa myaka ne myaka ko afuukwijile mwi Kilishitu,+ Yesu Nkambo yetu, 12 kupichila mwi aye atweba twakasuluka pa kwamba kabiji tusolomoka Lesa+ na luketekelo na mambo a lwitabilo mwi aye. 13 Onkao mambo, kange mukooke na mambo a bya malwa byami byo mbena kwimumanamina ne, mambo bino byo bya kwimuletela lukumo.+
14 Na mambo a kino, nafukama ne kulomba kwi Tata, 15 ko kyatambula jizhina kisemi kyonse kya mwiulu ne kya pano pa ntanda. 16 Nalomba namba Lesa, aye uji na lukumo lwavula engijishe bulume bwa mupashi wanji kuba’mba akoseshe muntu wenu wa mukachi,+ 17 ne kuba’mba kupichila mu lwitabilo lwenu Kilishitu ekale monka mu michima yenu na butemwe.+ Mukose byonka byajimba mizhazhi ya kichi+ ne kushimikwa pa kitendekesho kyakosa,+ 18 pa kuba’mba na bazhijikwa bonse mukonshe kukwatakanya bulongo mwayila bwipi ne bula ne kimino ne kuzhika, 19 ne kuyuka butemwe bwa Kilishitu+ bwakila kuyuka bintu, namba mwikale na byubilo byonse byawama bifuma kwi Lesa.
20 Monka mwayila bulume bwingila mwi atweba,+ aye Lesa wakonsha kuba bintu byavula kukila pa bintu byonse byo tulomba nangwa byo tulanguluka.+ 21 Onkao mambo, aye wafwainwa kutambula lukumo kupichila mu kipwilo ne mwi Kilishitu Yesu. Amena.