Ku Bena Loma
3 Pano nanchi buwame ka buji mu kwikala Muyudea nangwa kuya ku mukanda? 2 Muji buwame bwavula bingi. Patanshi mambo bebapele byambo byafumine kwi Lesa.+ 3 Pano kyakonsha kwikala byepi? Inge kya kuba bamo kechi baji na lwitabilo ne, nanchi kubula lwitabilo kwabo kwakonsha kulengela bukishinka bwa Lesa kwikala bwatu nyi? 4 Ine! Lesa ekale wa kine,+ nangwa kya kuba bantu bonse baikala ba bubela,+ byonkatu byo kyanembwa’mba: “Pa kuba’mba mwikale baoloka mu byambo byenu ne kubinga pa kwimuchibila mambo.”+ 5 Nangwa byonkabyo, nanchi tukamba’mba ka umvwe bumbulwakoloka bwetu bwamwesha bololoke bwa Lesa? Nanchi Lesa wabula koloka pa kumwesha bukaji bwanji nyi? (Mbena kwamba monka mwambila bantu.) 6 Ine! Umvwe Lesa wajinga wabula koloka, ba pano pa ntanda inge wibachibijile byepi mambo?+
7 Kabiji umvwe mu bubela bwami mo mwasolokela patoka bukine bwa Lesa ne kumuletela lukumo, pano mambo ka o babena kunzhachishisha nobe nendengamambo? 8 Nanchi twambengatu byonka bitubepela bantu bamo amba twamba’mba: “Twayai tube bintu byatama kuba’mba mufume byawama” nyi? Luzhachisho lwa bano bantu lwayilamo na bunchibamambo bwaoloka.+
9 Nanchi twambe’mba ka? Abya atweba twanema kukila bakwetu nyi? Ine! Mambo twibashiina kala bonse Bayudea ne Bangiliki kuba’mba bonsetu bandengamambo;+ 10 byonkatu byo kyanembwa’mba: “Kafwako muntu waoloka nangwa umotu ne;+ 11 kafwako uji na milangwe ne; kafwako ukebakeba Lesa ne. 12 Bantu bonse basenduka, bonse baikala ke batutu; kafwako nangwa umo uji na lusa, kafwako nangwa umotu ne.”+ 13 “Mijibu yabo iji nobe kilende kya kyashi; bajimbaika bantu na njimi yabo.”+ “Bulembe bwa miloolo buji mu byatunwa byabo.”+ 14 “Kanwa kabo kayula mafingo ne bukaji.”+ 15 “Maulu abo aya lubilo na kwichila mashi.”+ 16 “Mu mashinda abo muji bono ne malwa, 17 kabiji kechi bayuka jishinda ja mutende ne.”+ 18 “Abo kechi bakamwa Lesa ne.”+
19 Pano twayuka namba bintu byonse byaamba Mizhilo, yambila boba baji mu Mizhilo, kuba’mba bulaka bwibashinke bonse ne ba pano pa ntanda bonse bakebazhachishe kwi Lesa.+ 20 Onkao mambo, kafwako muntu nangwa umo ukatelwa’mba waoloka kwi aye na mambo a kuba mingilo yaamba mizhilo ne,+ mambo mizhilo yo itulumbulwila bulongo bundengamambo byo buji.+
21 Pakuba pano kyasololwa kuba’mba muntu wakonsha kwikala waoloka kwi Lesa, kwa kubula kulama mizhilo.+ Kino kishinka bekyambilepo ne mu Mizhilo ne ku Bangauzhi;+ 22 kine muntu wakonsha kwikala waoloka kwi Lesa kupichila mu kwitabila mwi Yesu Kilishitu, kabiji ye wa bonse bamwitabila. Mambo Lesa kechi uji na misalululo ne.+ 23 Mambo bonse baleenga mambo kabiji kechi bafika ku lukumo lwa Lesa ne,+ 24 kabiji kino ke bupetu+ byo ebatela’mba baoloka na mambo a lusa lwanji lukatampe+ kupichila mu bukuzhi bwapaine Kilishitu Yesu.+ 25 Lesa wamutumine kwikala mulambo wa mfuto* ya mambo+ kupichila mu kwitabila mu mashi anji,+ waubile kino kuba’mba amweshe bololoke bwanji, mambo Lesa mu butekanye bwanji walekejilenga mambo alengelwe kala. 26 Ne kumwesha bololoke bwanji+ pa kino kimye, kuba’mba ekale waoloka ne pa kutela muntu waitabila mwi Yesu amba waoloka.+
27 Nanchi pajipo kine kintu kya kwitotela nyi? Kafwako ne. Ñanyi muzhilo ulengela kubula kwitota? Muzhilo wa mingilo nyi?+ Ine, kana muzhilo wa lwitabilo. 28 Mambo twayuka’mba muntu utelwa’mba waoloka kupichila mu lwitabilo kechi mu kuba mingilo yaamba mizhilo ne.+ 29 Nangwa nanchi Lesa wa Bayudea bonkatu nyi?+ Nanchi ne bantu ba mu bisaka bya bantu kechi ye Lesa wabo nenyi?+ Ee, bantu ba mu bisaka bya bantu nabo ye Lesa wabo.+ 30 Na mambo a kuba’mba Lesa umo,+ aye ukatela bantu ba mukanda amba baoloka+ na mambo a lwitabilo kabiji bantu babula kuya ku mukanda nabo bakebatela’mba baoloka+ na mambo a lwitabilo lwabo. 31 Nanchi atweba twafwainwa kufumyapo mizhilo na mambo a lwitabilo lwetu nyi? Ine! Bino tulama mizhilo.+