Nkalata Itanshi ya kwa Petelo
3 Byonkabyo, anweba banabakazhi nekenenainga bamwatawenu,+ pa kuba’mba aba babula kukookela mambo a Lesa, beakookele kwa kubula byambo kupichila mu byubilo bya bakazhi babo,+ 2 na mambo a kwimwena byubilo byenu byawama+ pamo na mushingi mukatampe. 3 Kwiwamisha kwenu kechi kwikaletu kwa pangye ya mubiji—kwichika nsuki, kuvwala bya kwikobaika bya ngolode+ nangwa bya kuvwala byawama ne— 4 Bino kwikale kwa mu muchima, kyo kivwalo kibula kubola kya muchima wakooka kabiji wazhindama,+ ye wa buneme kwi Lesa. 5 Mambo bino byo byavwalanga ne banabakazhi bazhila ba kala baketekejile mwi Lesa, byo banekenenenga bamwatawabo, 6 byonkatu Sala byo akookejilenga Abalahama ne kumwita’mba nkambo.+ Ne anweba mwaikala ke baana banji umvwe mwatwajijila kuba byawama ne kubula kuleka kintu nangwa kimo kwimulengesha moyo.+
7 Ne anweba banabalume, ikalainga na bakazhi benu saka mwibayuka bulongo byo baji.* Mwibanemekenga+ mambo baji nobe kipe kyabula kukosa, banabakazhi, mambo ne abo bo banswanyi pamo ne anweba+ bo baubila bibusa bya kutambula bumi, kuchina’mba milombelo yenu yakabula kukumbulwa.
8 Kyapelako, anweba bonse kwatankanai mu milanguluko,*+ iubilainga lusa, temwainga balongo, iubilainga kifyele+ ne kwipelula.+ 9 Kange mushinkanyenga kibi pa kibi kikwabo+ nangwa matuka pa matuka akwabo ne.+ Bino bapeshainga,+ mambo ku kino ko ko bemwichile, kuba’mba mukaswane mapesho.
10 Mambo “awa watemwa bumi ne kwikala na lusekelo, wafwainwa kukanya lujimi wanji kwamba byatama+ ne byatunwa byanji kwamba bya bujimbijimbi. 11 Kabiji aleke kuba bintu byatama,+ bino obenga byawama;+ akebenga mutende ne kumulondalonda.+ 12 Mambo meso a Yehoba* aji pa baoloka, ne matwi anji omvwa milombelo yabo ya misashijilo,+ pakuba Yehoba* washikwa bantu boba byatama.”+
13 Ñanyi ukemuba kintu kyatama umvwe kemube na mukoyo kintu kyawama?+ 14 Bino nangwa kya kuba mwamanama na mambo a bololoke, mukekala na lusekelo.+ Nangwa byonkabyo, kange muchinenga kintu kyo bachina* nangwa kulukusha muchima ne.+ 15 Bino saka muzhijika Kilishitu aye Nkambo mu michima yenu, ne kwinengezhezha jimo kimye kyonse mwa kwibakumbwila bonse bemwipuzha pa mambo a luketekelo lo muji nalo, bino saka muba kino na kukooka muchima+ ne na mushingi mukatampe.+
16 Ikalai na jiwi ja mu muchima jawama,+ kuba’mba monse mo bemunenena bibi, aba bemunena kikebalenge bumvu+ na mambo a byubilo byenu byawama byo muji bantu balondela Kilishitu.+ 17 Mambo kyawama kumanama na mambo a kuba kyawama,+ umvwe kyo kyaswa muchima wa Lesa, kukila kumanama na mambo a kuba kyatama.+ 18 Mambo aye Kilishitu muntu waoloka, wafwile jimotu na mambo a bundengamambo,+ waoloka kufwila bantu babula koloka,+ kuba’mba ebafikizhe kwi Lesa.+ Bamwipayile mu bumubiji,+ bino bamusangwile mu mupashi.+ 19 Kabiji byo ajinga mu mupashi, wayile na kukasapwila mipashi yajinga mu kaleya,+ 20 yonka yabujile kukookela kimye Lesa kyo apembejilenga saka atekanya* mu moba a kwa Nowa,+ byo bafiikilenga bwato+ mwapulukijiletu bantu bacheche, ko kuba’mba myeo* itanu na isatu yabujile kufwa na mema.+
21 Lubatizhilo lwaesakana na kino kyamwekele, nalo lubena kwimupulusha (kechi lulumbulula kowa biko pa mubiji ne, bino kulomba kwi Lesa amba mwikale na jiwi ja mu muchima jawama),+ kupichila mu lusanguko lwa Yesu Kilishitu. 22 Aye waikala ku kilujo kya Lesa,+ mambo wayile mwiulu, kabiji bamalaika, ba luusa ne ba bulume bonse bamukokesheshebo.+