Luta
2 Kwajinga mulongo wa bamwatawanji Naomi wanonkele bingi; jizhina janji wajinga Boaza,+ wa mu kisemi kya kwa Elimeleka.
2 Luta mwina Moabu waambijile Naomi amba: “Mwane, nswishai ngye mu majimi na kupupula kajo+ nsakulondelanga munyuma ya yense usakungubila lusa.” Onkao mambo, Naomi wamwambijile’mba: “Yanga, mwanami.” 3 Ponkapo aye wayile mu bujimi ne kutatula kupupula kajo saka alondela munyuma ya banowa. Kwa kubula kuyuka, wasolomokejile mu bujimi bwa kwa Boaza,+ wa mu kisemi kya kwa Elimeleka.+ 4 Pa kyonkakya kimye, Boaza waishile kufuma ku Betelema ne kwimuna banowenenga’mba: “Yehoba ekale ne anweba.” Ne abo bamukumbwile’mba: “Yehoba emubile bibusa.”
5 Kepo Boaza ashikishe nsongwalume watangijilenga banowa amba: “Nga awa nsongwakazhi wa mu kisemi kya bañanyi?” 6 Nsongwalume watangijilenga banowenenga wakumbwile’mba: “Uno nsongwakazhi mwina Moabu,+ waishile ne Naomi kufuma ku mpunzha ya mu Moabu.+ 7 Waji kushikisha’mba, ‘Mwane kana mpupulemo kajo+ ne kutolaula aka kashamo banowa nyi?’ Kufumatu kimye kyo aji kwiya lukelo waji kwingilangatu, kabiji lonka luno po po aikalako mu kimpampa amba akokolokeko pacheche.”
8 Kepo Boaza aambijile Luta amba: “Pano umvwa mwanami. Kange uye na kupupula mu bujimi bukwabo, nangwa kuya kungi ne; wikalengatu kwipi na bansongwakazhi+ bami ba mingilo. 9 Utetu muchima pa bujimi bo babena kunowa ne kwibalondela. Nakambizha bansongwalume namba kechi bafwainwa kukukwata* ne. Inge wafwa kilaka, wafwainwa kuya ku milondo ya mema ne kutoma mema atapula bansongwalume.”
10 Ponkapo wafukamine wakinka ne kilungi kyanji panshi ke amulambile ne kumushikisha’mba: “Mambo ka o mwangubila bibusa ne kunta muchima, saka nafuma ku kyalo kingi?”+ 11 Boaza wamukumbwile’mba: “Bambuujile bintu byonse byo waubijile bako bobe ba bakazhi kimye kyafwile bamwatawobe, ne byo washile bashobe ne bainobe ne kyalo muji balongo bobe ne kwiya ku bantu bo wabujile kuyuka kala.+ 12 Yehoba akupeshe na mambo a byo wauba,+ kabiji Yehoba Lesa wa Isalela akufwete pakatampe,* yenka ye wananga’mba ufyame mu byapi byanji.”+ 13 Luta waambile’mba: “Ngubilai bibusa nkambo yami, mambo mwantekenesha ne kunkosesha amiwa* wa mwingilo wenu, nangwa kya kuba kechi ne umo wa mu ba mingilo benu ne.”
14 Pa kuja kajo, Boaza wamwambijile’mba: “Iya kuno, ujepo shinkwa kabiji utantenga kibese kya shinkwa mu binyu byasasa.” Ne aye waikele pamo na banowa. Kepo amupele kajo ka kukanga ne aye wajiile ne kwikuta, kabiji washilepo kamo. 15 Byo aimene amba aye na kupupula kajo,+ Boaza wakambizhe bansongwalume banji amba: “Mumuleke atolaule ne kajo ko banowa,* kabiji kange mumukatazhe ne.+ 16 Kabiji mu bikuta bya kajo mukokemo kajo kamo mumushile kuba’mba eye apupule, kabiji kange mumukanye ne.”
17 Byonkabyo, watwajijile kupupula kufikatu ne mabanga.+ Byo apuujile kajo ko apupwile, kafikile nobe mbaale wa kipimo kya efa.* 18 Kepo ekasendele ne kuya ku muzhi, kabiji bako banji ba bakazhi bamwene kajo ko apupwile. Kabiji Luta wasolwele kajo ko ashilepo+ byo ajiile ne kwikuta, ne kwibapa.
19 Bako banji ba bakazhi bamushikishe’mba: “Waji kupupwila kwepi lelo? Waji kwingijila kwepi? Obilwe bibusa muntu waji kukuta muchima.”+ Ne aye wabuujile muko wanji jizhina ja muntu ye aingijileko amba: “Muntu ko naji kwingijila lelo, Boaza.” 20 Ponkapo Naomi waambijile mulokazhi wanji amba: “Yehoba amubile bibusa, yenka wabula kuleka kumwesha butemwe bwanji bubula kwaluka ku bomi ne ku bafwa.”+ Kabiji Naomi wanungilepo amba: “Awe mwanamulume mulongo wetu.+ Ye wa kwitukuula.”*+ 21 Kabiji Luta mwina Moabu waambile’mba: “Waji kuñambila ne kuba’mba, ‘Ikala kwipi na ba mingilo bami kufikatu ne byo bakapwisha kunowa kajo kami konse.’”+ 22 Onkao mambo, Naomi waambijile Luta mulokazhi wanji amba: “Mwanami, kyawama kuya na ba mingilo banji bansongwakazhi kukila kukumanyika mu bujimi bukwabo.”
23 Byonkabyo, waikelenga kwipi na bansongwakazhi ba kwa Boaza ne kupupula kufikatu ne byo bapwishishe kunowa mbaale+ ne wichi. Kabiji watwajijile kwikala na bako banji ba bakazhi.+