Luta
4 Kabiji Boaza wayile ku kibelo kya muzhi+ ne kwikala konka. Kabiji awa wajinga na luusa lwa kukuula, Boaza ye aambilepo+ wapichilenga. Ponkapo Boaza wamwambijile’mba: “Anweba bakananga iyai mwikale pano.” Ne aye wayile ne kwikala. 2 Boaza waichile bakulumpe jikumi ba mu muzhi+ ne kwibambila’mba: “Ikalai pano.” Ne abo baikele.
3 Kepo Boaza aambijile awa wajinga na luusa lwa kukuula+ amba: “Naomi yenka wabwela kufuma ku mpunzha ya Moabu,+ ubena kupotesha mpunzha yajinga ya mulongo wetu Elimeleka.+ 4 Onkao mambo, naji kulangulukanga namba nkubuule ne kukwambila’mba, ‘Ipote bangikazhi ne bakulumpe ba balongo betu+ saka bajipo. Inge usakwiipota, ube byonkabyo. Bino inge kechi usakwiipota ne, mbuule pa kuba’mba ngyuke; mambo yobe uji na luusa lwa kwiipota, ne amiwa yami nalondela pe obewa.’” Aye waambile’mba: “Nsakwiipota.”+ 5 Kepo Boaza amwambijile’mba: “Pa juba jo ukapota bujimi kwi Naomi, wafwainwa ne kwibupota kwi Luta mwina Moabu, muka muntu wafwa, pa kuba’mba jizhina ja muntu wafwa jikabwele ku buswanyi bwanji.”+ 6 Ponkapo awa wajinga na luusa lwa kukuula waambile’mba: “Kechi nakonsha kwibupota ne, kuchiina’mba nakonauna buswanyi bwami. Bupote obe mwine na luusa lwami lwa kukuula, mambo kechi nakonsha kwibupota ne.”
7 Mu moba a kala kino kyajinga kisho mu bena Isalela pa kukuula ne kupimpuzhanya bintu pa kuba’mba kintu kyonse kyo bauba bekitabizhe: Muntu wafwainwe kuvuula nkwabilo yanji+ ne kupa mukwabo, kabiji kino kyajinga kiyukilo mu Isalela kya kumwesha’mba balayañana. 8 Onkao mambo, awa wajinga na luusa lwa kukuula byo aambijile Boaza amba, “Bupote obe mwine,” wavuujile nkwabilo yanji. 9 Kepo Boaza aambijile bakulumpe ne bantu bonse amba: “Juba ja lelo mwi bakamonyi+ kuba’mba mbena kupota bintu byonse kwi Naomi byajinga bya kwa Elimeleka ne byonse byajinga bya kwa Kilionyi ne Malona. 10 Kabiji mbena kusenda Luta mwina Moabu, wajinga muka Malona, ekale mukazhami, pa kuba’mba jizhina ja muntu wafwa jibwele ku buswanyi bwanji,+ pa kuba’mba jizhina ja muntu wafwa jikabule kuzhimañana mu balongo banji ne ku kibelo kya muzhi mo aikalanga. Lelo jino mwi bakamonyi.”+
11 Ponkapo bantu bonse bajinga ku kibelo kya muzhi ne bakulumpe baambile’mba: “Atweba twi bakamonyi! Yehoba apeshe mwanamukazhi ubena kwiya mu nzubo yobe. Akekale byonka byajinga Lechela ne Liya bonka basemene bikota bya Isalela.+ Ukamonenga byawama mu Efulata+ ne kulenga jizhina* jawama mu Betelema.+ 12 Nzubo yobe ikale byonka byajinga nzubo ya kwa Peleze,+ yenka Tamala ye asemene kwi Yuda, kupichila mu baana Yehoba bo akakupa mu uno nsongwakazhi.”+
13 Onkao mambo, Boaza wasendele Luta ne aye waikele ke mukazhanji. Kabiji walaajile nanji, ne Yehoba wamulengejile kwimita ne kusema mwana wa mulume. 14 Kepo banabakazhi bamwambijile Naomi amba: “Atotwe Yehoba, wabula kukushatu bunke ja lelo kwa kubula wa kukukuula. Jizhina janji jitumbalale mu Isalela! 15 Aye* wabwezha bumi* bobe kabiji ukakukoseshanga mu bukote bobe, mambo aye wasemwa ku mulokazhi wobe, wa kutemwa+ kabiji wawama kukila baana ba balume batanu na babiji.” 16 Naomi washikwile mwana ne kumubukata mu kyaji kyanji, kabiji wamulaminenga. 17 Kabiji banabakazhi bakinkalankulo bamutumbile jizhina. Baambile’mba, “Kwi Naomi kwasemwa mwana wa mulume,” kabiji bamutumbile’mba Obeda.+ Ye shanji Yese,+ shanji Davida.
18 Kino kyo kisemi* kya kwa Peleze;+ Peleze wasemene Hezelona;+ 19 Hezelona wasemene Lama; Lama wasemene Aminadaba;+ 20 Aminadaba+ wasemene Nashona; Nashona wasemene Samona; 21 Samona wasemene Boaza; Boaza wasemene Obeda; 22 Obeda wasemene Yese; ne Yese+ naye wasemene Davida.+