Buku wa Bubiji wa Bamfumu
11 Ataliya+ inanji Ahaziya byo amwene’mba mwananji wafwa,+ waimene ne kwipaya baana bonse ba mu kikota* kya bufumu.+ 2 Nangwa byonkabyo, Yehosheba mwana wa mukazhi wa Mfumu Yeholama, nyenga ya kwa Ahaziya, wasendele Yehoashi+ mwana wa kwa Ahaziya ne kumubombola pa baana ba mfumu bo bafwainwe kwipaya, kabiji aye ne wamulaminenga wibafile mu kibamba kya kulaalamo kya mukachi. Bamufile kuchina’mba bakamumona kwi Ataliya, onkao mambo, kechi bamwipayile ne. 3 Mwana waikele nanji myaka itanu na umo saka amufya pa nzubo ya Yehoba, kimye Ataliya kyo alaminenga kyalo.
4 Mu mwaka wa butanu na bubiji, Yehoyada watumine mawi ku bakulumpe ba pa bitota bya bakapaso* bena Kale ne bakapaso+ ba ku kipango ne kwibeta amba beye kwi aye ku nzubo ya Yehoba. Walayañene* nabo lulayañano ne kwibachipisha ku nzubo ya Yehoba, kabiji wibamwesheshe ne mwana mfumu.+ 5 Wibakambizhe’mba: “Mukoobe bino: Kipanyi kimo pa bisatu kikengile pa juba ja Sabado ne kusopa bulongo nzubo* ya mfumu,+ 6 kipanyi kikwabo kikekale ku Kibelo kya Kitendekesho, ne kipanyi kya busatu kikekale ku kibelo kiji kunyuma ya bakapaso ba ku kipango. Mukepimpulanga pa kusopa nzubo. 7 Bipanyi byenu bibiji byafwainwe kubula kwingila pa juba ja Sabado, byafwainwa kusopa bulongo nzubo ya Yehoba ne kulamawizha mfumu. 8 Mwafwainwa kuzhokoloka mfumu konse konse, kabiji bonse pa muntu pa muntu mukekale na bilwilo mu maboko enu. Muntu yense ukeya mu minongo yenu bakamwipaye. Mukekalenga na mfumu konse ko akayanga.”*
9 Bakulumpe ba pa bitota+ baubile byonka bibakambizhe Yehoyada ñanga. Byonkabyo, bonse pa muntu pa muntu basendele bantu babo baingijilenga pa juba ja Sabado, pamo na boba babujilenga kwingila pa juba ja Sabado, kabiji baishile kwi Yehoyada ñanga.+ 10 Kabiji ñanga wapele bakulumpe ba pa bitota mafumo ne makebo anzhingwile ajinga a Mfumu Davida, onka ajinga mu nzubo ya Yehoba. 11 Kabiji bakapaso ba ku kipango+ baimene mu bifulo byabo, bonse bajinga na bilwilo mu maboko abo, kufuma ku kilujo kya nzubo kufika ne ku kipiko kya nzubo, kwipi na kya kusokelapo bitapisho+ ne ku nzubo saka bazhokoloka mfumu. 12 Kepo Yehoyada alupwile mwana mfumu+ ne kumuvwika munchinya* ne kubika Lushimuno*+ pe aye, kabiji bamubikile pa bufumu ne kumushinga manyi. Batendekele kupopwela ne kwamba’mba: “Mfumu ekale myaka!”+
13 Ataliya byo aumvwine kyungwe kya bantu banyemenenga, ponkapo waishile kwajinga bantu ku nzubo ya Yehoba.+ 14 Kepo amwene mfumu saka aimana kwipi na jishiki monka mwayijile kisho.+ Bakulumpe ne bavumya matolompita+ bajinga na mfumu, ne bantu bonse ba mu kyalo basangalele ne kuvumya matolompita. Ponkapo Ataliya watabwile bivwalo byanji ne kubijika’mba: “Basatuka! Basatuka!” 15 Pakuba Yehoyada ñanga wakambizhe bakulumpe ba pa bitota,+ batajilenga pa bashilikale ne kwibambila’mba: “Mufumyai mu munongo, kabiji yense usakumulondela, mumwipaye na mpoko!” Mambo ñanga waambile’mba: “Kange mumwipayile mu nzubo ya Yehoba ne.” 16 Onkao mambo, bamukwachile, kabiji byo bafikile ku mpunzha kwatwelelanga bambili mu nzubo* ya mfumu,+ bamwipayijile konkakwa.
17 Kabiji Yehoyada walengeshe mfumu ne bantu kulayañana lulayañano ne Yehoba,+ amba bakatwajijila kwikala bantu ba Yehoba, kabiji walengejile mfumu kulayañana lulayañano na bantu.+ 18 Kepo bantu bonse ba mu kyalo baishile ku nzubo ya kwa Baela ne kukundula bya kusokelapo bitapisho byanji,+ kabiji baonawine bipashañano byanji byonse,+ ne kwipayila Matana ñanga wa Baela+ kulutwe ya bya kusokelapo bitapisho.
Kabiji ñanga watongwele bakalama ba kulama nzubo ya Yehoba.+ 19 Kabiji wasendele bakulumpe ba pa bitota,+ ne bakapaso bena Kale, ne bakapaso ba ku kipango+ ne bantu bonse ba mu kyalo amba bashinjikinyeko mfumu kufuma ku nzubo ya Yehoba, kabiji baishile ku nzubo* ya mfumu kupichila mu jishinda ja ku kibelo kya bakapaso ba ku kipango. Kepo aikajile pa jitanda ja bamfumu.+ 20 Onkao mambo, bantu bonse mu kyalo basekejile bingi, kabiji mu muzhi mwazhindaminetu nzoo, mambo baipayile Ataliya na mpoko konka ku nzubo ya mfumu.
21 Yehoashi+ wajinga na myaka ya kusemwa itanu na ibiji byo aikele mfumu.+