Yelemiya

39 Mu mwaka wa butanu na buna wa bukalama bwa kwa Zedekiya Mfumu wa Yuda, mu ñondo wa bujikumi, Nebukaneza Mfumu wa Babilona ne bashilikale banji bonse baishile ku Yelusalema kabiji bazhokolokele muzhi.+

2 Mu mwaka wa bu 11 wa bukalama bwa kwa Zedekiya, mu ñondo wa buna pa juba ja butanu na buna ja ñondo, bakundwile nsakwa ya muzhi.+ 3 Kabiji babinemanga bonse ba mfumu wa Babilona batwelele ne kwikala mu Kibelo kya Pakachi,+ ko kuba’mba Nelagala-shaleza watelwanga’mba Samegala, Nebo-Salasechimi watelwanga’mba Labasalisa, Nelagala-shaleza watelwanga’mba Labamaga* ne babinemanga bakwabo bonse ba mfumu wa Babilona.

4 Zedekiya Mfumu wa Yuda ne bashilikale bonse byo bamwene bano babinemanga, banyemene+ ne kulupuka mu muzhi bufuku kwipi na bujimi bwa mfumu kulupukila ku kibelo kyajinga pakachi ka masakwa abiji, kabiji bayile mu jishinda jaya ku Alaba.+ 5 Nangwa byonkabyo, nzhita ya bena Kalodeya ibapupijilenga kabiji bamutaaine Zedekiya mu bisanzangala bya Yeliko.+ Bamukwachile ne kumuleta kwi Nebukaneza Mfumu wa Babilona ku Libula+ mu kyalo kya Hamata+ ko amuchibijile mambo. 6 Mfumu wa Babilona waipayile baana ba balume ba kwa Zedekiya ku Libula ne shabo saka atalako, kabiji mfumu wa Babilona waipayile ne babinemanga bonse ba mu Yuda.+ 7 Kabiji wasabile meso a kwa Zedekiya ne kumukasa nshimbi ya mukuba ne kumutwala ku Babilona.+

8 Bena Kalodeya basokele nzubo ya mfumu ne mazubo a bantu,+ kabiji bakundwile masakwa a Yelusalema.+ 9 Nebuzaladana+ mukulumpe wa bakasopa wasendele bantu bashajile mu muzhi, ne bantu bayile kwi aye ne muntu yense washajilemo ne kwibatwala mu buzha ku Babilona.

10 Pano bino, Nebuzaladana mukulumpe wa bakasopa washile mu kyalo kya Yuda bayanji bamo babujilepotu kintu nangwa kimo ne. Pa jonkaja juba, wibapele majimi a miñanzañanza ne majimitu a kwingijilamo.*+

11 Kabiji Nebukaneza Mfumu wa Babilona wakambizhe Nebuzaladana mukulumpe wa bakasopa pe Yelemiya amba: 12 “Musende kabiji umulamenga bulongo; kumuba kintu kyatama ne, kabiji wafwainwa kumubila kintu kyonse kyo akakeba kwi obewa.”+

13 Byonkabyo, Nebuzaladana mukulumpe wa bakasopa, Nebushazabana watelwanga’mba Labasalisa,* Nelagala-shaleza watelwanga’mba Labamaga* ne bakulumpe bonse ba mfumu wa Babilona bebatumine 14 kabiji bakamufumishe Yelemiya mu Kipango kya kwa Kasopa+ ne kumutwala kwi Gedaliya+ mwana wa kwa Ahikama,+ Ahikama mwana wa kwa Shafwana+ kuba’mba amulete mu nzubo yanji. Onkao mambo, Yelemiya waikelenga na bano bantu.

15 Yelemiya byo akijinga mu Kipango kya kwa Kasopa,+ Yehoba wamwambijile’mba: 16 “Yanga ukabuule Ebeda-meleka+ mwina Etiopya amba, ‘Yehoba wa mabumba, Lesa wa Isalela waamba’mba: “Amiwa mbena kufikizha byambo byami byo naambile bya kuleta bya malwa pa uno muzhi kechi bintu byawama ne, kabiji pa jonkaja juba bino bintu ukebimona byo bikamweka.”’

17 “Yehoba waamba’mba, ‘Amiwa nkakupokolola pa joja juba, kabiji kechi nkakupana ku bantu bo uchina ne.’

18 “Yehoba waamba’mba, ‘Kine, amiwa nkakupokolola kabiji kechi ukafwa ku mpoko ne. Bumi*+ bobe bukekala nobe kintu kyo wapukula* mambo wanketekejile.’”+