Danyela

3 Mfumu Nebukaneza walengele kipashañano kya ngolode kyalepele makyubichi 60* kabiji mu mbavu kyajinga makyubichi atanu na umo.* Wikimikile mu musanza wa Dula mu kibunji* kya Babilona. 2 Ponkapo Mfumu Nebukaneza watumine muluwe kuba’mba bakonkanye pamo babitumbafumu, bakulumpe, bandamabyalo, bapana maana, balama mali, bamitonyi, banchibamambo ne bakalama bonse ba mu bibunji* kwiya na kushinkwa ku kuzhijika kipashañano kyaimikile Mfumu Nebukaneza.

3 Byonkabyo, babitumbafumu, bakulumpe, bandamabyalo, bapana maana, balama mali, bamitonyi, banchibamambo ne bakalama bonse ba mu bibunji,* bakonkene pamo ku kuzhijika kipashañano kyaimikile Mfumu Nebukaneza. Kabiji baimene kulutwe ya kipashañano kyaimikile Nebukaneza. 4 Muluwe wa mfumu watayile mbila amba: “Anweba mitundu ya bantu, bisaka bya bantu ne bantu bamba milaka yapusana pusana, bemukambizha 5 amba, umvwe mwaumvwa kuvuma kwa lusengo, mumpempe, jisense, kyansa, kijimba kya mizhinge, mpwita ne bijimbatu bikwabo byonse, mwafwainwa kupona panshi kinkuvumene ne kupopwela kipashañano kya ngolode kyaimika Mfumu Nebukaneza. 6 Yense usakubula kupona panshi ne kupopwela, basakumutaya ponkapotu mu kisha kya mujilo.”+ 7 Onkao mambo, byo baumvwine kuvuma kwa lusengo, mumpempe, jisense, kyansa, kijimba kya mizhinge ne bijimbatu bikwabo byonse, mitundu yonse ya bantu, bisaka byonse bya bantu ne bantu bamba milaka yapusana pusana baponene panshi kinkuvumene ne kupopwela kipashañano kya ngolode kyaimikile Mfumu Nebukaneza.

8 Byo bakyubilenga bino, bena Kalodeya bamo baishile ne kupamo mambo* Bayudea. 9 Baambijile Mfumu Nebukaneza amba: “Anweba mfumu mwikale myaka ne myaka. 10 Anweba mfumu mwakambizhe’mba, muntu yense inge waumvwa kuvuma kwa lusengo, mumpempe, jisense, kyansa, kijimba kya mizhinge, mpwita ne bijimbatu bikwabo byonse, wafwainwa kupona panshi kinkuvumene ne kupopwela kipashañano kya ngolode; 11 kabiji amba yense ukabula kupona panshi ne kupopwela, bakamutaya mu kisha kya mujilo.+ 12 Bino kuji Bayudea bamo bo mwatongwele kwikala bakalama mu kibunji* kya Babilona: Shadalaka, Meshaka ne Abedenego.+ Bano banabalume bakanatu nsalansala kukookela mukambizho wenu anweba mfumu. Kechi babena kwingijila balesa benu ne, kabiji bakana kupopwela kipashañano kya ngolode kyo mwaimika.”

13 Ponkapo Nebukaneza wazhingijile bingi ne kukambizha kuba’mba balete Shadalaka, Meshaka ne Abedenego kwi aye. Onkao mambo, bano banabalume bebaletele ku mfumu. 14 Nebukaneza wibashikishe’mba: “Anweba Shadalaka, Meshaka ne Abedenego, nanchi kine ibyo kuba’mba mwakana kwingijila balesa bami+ ne kupopwela kipashañano kya ngolode kyo naimika nyi? 15 Bino umvwe mwaumvwa kuvuma kwa lusengo, mumpempe, jisense, kyansa, kijimba kya mizhinge, mpwita ne bijimbatu bikwabo byonse, mupone panshi ne kupopwela kipashañano kyo naimika, musakuba bulongo. Pano bino, inge kine mukane kwikipopwela basakwimutaya ponkapotu mu kisha kya mujilo. Ñanyi lesa wakonsha kwimupokolola mu kuboko kwami?”+

16 Shadalaka, Meshaka ne Abedenego bamukumbwile mfumu amba: “Anweba Nebukaneza, kechi tusakwimukumbula pa kino kintu ne. 17 Umvwe mwitutaye mu kisha kya mujilo, Lesa wetu ye twingijila usakwitupokolola mu kisha kya mujilo ne mu kuboko kwenu anweba mfumu.+ 18 Pano bino, nangwa abule kwitupokolola, anweba mfumu yukai’mba kechi tukengijila balesa benu nangwa kupopwela kipashañano kya ngolode kyo mwaimika ne.”+

19 Ponkapo Nebukaneza wibazhingijile bingi ba Shadalaka, Meshaka ne Abedenego kya kuba watendekele kwibatala bibi,* kabiji wakambizhe’mba bekisonsele kisha kya mujilo bimye bitanu na bibiji kukila byo bekisonsela kimye kyonse. 20 Wakambizhe babiyangala bamo ba mu bashilikale banji kuba’mba bakase Shadalaka, Meshaka ne Abedenego ne kwibataya mu kisha kya mujilo.

21 Byonkabyo, bano banabalume bebakashile saka bavwala minkukumba, bivwalo byabo, bisochi ne bivwalo byabo bikwabotu, kabiji bebatayile mu kisha kya mujilo. 22 Na mambo a kuba mukambizho wa mfumu wakatezhe bingi ne kisha kya mujilo nakyo kyatwile bingi kyuya, banabalume basendele Shadalaka, Meshaka ne Abedenego bo bafwile na lubebe lwa mujilo. 23 Pakuba bano banabalume basatu, Shadalaka, Meshaka ne Abedenego baponejile mu kisha kya mujilo saka bebakasa.

24 Mfumu Nebukaneza waumvwine moyo kabiji ponkapotu waimene ne kushikisha babinemanga banji amba: “Nanchi kechi twajikukasa banabalume basatu ne kwibataya mu kisha kya mujilo nenyi?” Abo bamukumbwile mfumu amba: “Ibyo mwane, anweba mfumu.” 25 Waambile’mba: “Monai! Namonamo banabalume bana bo babula kukasa babena kupitañana mukachi ka mujilo, kechi bapya ne, kabiji wa buna ubena kumweka nobe mwana wa balesa.”

26 Nebukaneza waishile ku kibelo kya kisha kya mujilo ne kubijika’mba: “Anweba Shadalaka, Meshaka ne Abedenego, bakalume ba Lesa Mwine Wakila,+ fumaimo, iyai kuno!” Byonkabyo Shadalaka, Meshaka ne Abedenego bafumine mukachi ka mujilo. 27 Kabiji babitumbafumu, bakulumpe, bandamabyalo ne babinemanga ba mfumu bakonkene,+ bamwene kuba’mba mujilo kechi wasokele* mibiji ya bano banabalume ne,+ kabiji kafwako lusuki nangwa umo wa ku mitwe yabo wababukile ne, kabiji minkukumba yabo yajingatu byonka byo yajinga kala, kabiji kechi banunkilepo mubabo ne.

28 Ponkapo Nebukaneza waambile’mba: “Atotwe Lesa wa kwa Shadalaka, Meshaka ne Abedenego,+ yenka wajikutuma malaika wanji kwiya na kupokolola bakalume banji. Abo baketekejile mwi aye ne kukana kulondela mukambizho wa mfumu kabiji bepaine kufwa* kukila kupopwela balesa bangi, kanatu Lesa wabo yenka.+ 29 Onkao mambo, amiwa nakambizha namba mitundu yonse ya bantu, bisaka bya bantu byonse ne bantu bamba milaka yapusana pusana bakamba mwenga pe Lesa wa Shadalaka, Meshaka ne Abedenego, bakebepaya, kabiji mazubo abo bakealula ke byolonyi;* mambo kafwako Lesa mukwabo uji nobe uno wakonsha kupokolola bantu ne.”+

30 Kepo mfumu apele Shadalaka, Meshaka ne Abedenego bifulo bikatampe* mu kibunji* kya Babilona.+