Danyela

6 Kyamutokejile bingi ku muchima Daliusa kutongola babitumbafumu 120 ba kulama mu bufumu bwanji bonse.+ 2 Pa bano babitumbafumu watongwejilepo ne babinemanga basatu, umo pe abo wajinga Danyela;+ bano babitumbafumu+ babuulanga babinemanga bintu byonse byamwekanga, kuchina’mba bintu bya mfumu byakonaika. 3 Bino Danyela wapuseneko bingi na babinemanga bakwabo ne babitumbafumu, mambo aye wajinga na maana akila,+ kabiji mfumu wafuukwilepo kuba’mba amutongole kwikala kalama wa bufumu bwanji bonse.

4 Pa kyokya kimye, babinemanga ne babitumbafumu bakebelenga mashinda a kupelamo mambo Danyela pa bintu bya mu kyalo,* pano bino, bakankelwe mwa kumupela mambo, nangwa kutaana bintu byatama mwi aye, mambo aye wajinga wa kishinka, waingilanga mingilo na muchima yense kabiji kechi watambulanga mazhikakanwa ne. 5 Ponkapo bano banabalume baambile’mba: “Danyela kechi tukamona mwa kumupela mambo ne, kanatu kumukebela mambo mu mizhilo ya Lesa wanji.”+

6 Onkao mambo, bano babinemanga ne babitumbafumu baishile bonse pamo kwi mfumu ne kumwambila’mba: “Anweba Mfumu Daliusa, mwikale myaka ne myaka. 7 Babinemanga bonse, bakulumpe, babitumbafumu, ba mu kije ne bandamabyalo baumvwañene’mba balenge muzhilo* wa kuba’mba pa moba 30, muntu yense ukalombanga kwi lesa ungi, nangwa ku muntu mukwabo ne kulomba kwi anweba mfumu ne, bafwainwa kumutaya mu jiyengo ja mabokwe.+ 8 Pano anweba mfumu, koseshai uno muzhilo ne kufwachikapo jizhina jenu,+ pa kuba’mba abule kupimpulwa byonkatu biji mizhilo ya bena Meda ne bena Pelisha ibula kwaluka.”+

9 Byonkabyo, Mfumu Daliusa wafwachikilepo jizhina janji pa uno muzhilo wa kukanya bantu.

10 Danyela byo ayukile’mba uno muzhilo bafwachikapo kala jizhina, watwelele mu nzubo yanji, bipenze bya nzubo yanji ya peulu byatajile ku Yelusalema saka byashinkuka.+ Kabiji bimye bisatu pa juba pa juba wafukamanga na kulomba ne kupopwela Lesa wanji, byonkatu byo akelwanga kuba kimye kyonse. 11 Pa kyokya kimye, bano banabalume batwelele ne kutaana Danyela saka asashijila ne kulomba bukwasho kwi Lesa wanji.

12 Onkao mambo, bayile ku mfumu ne kumuvululamo pa mambo a muzhilo ye alengele amba: “Nanchi anweba mfumu kechi mwafwachikilepo jizhina jenu pa uno muzhilo wa kuba’mba pa moba 30 muntu yense ukalombanga kwi lesa ungi, nangwa ku muntu mukwabo ne kulomba kwi anweba ne, bafwainwa kumutaya mu jiyengo ja mabokwe nenyi?” Mfumu waambile’mba: “Muzhilo waikajikwa kala byonkatu biji mizhilo ya bena Meda ne bena Pelisha, ibula kwaluka.”+ 13 Ponkapo babuujile mfumu amba: “Danyela, yenka wa mu bazha bafumine mu Yuda+ wimulengulula anweba mfumu kabiji kechi wakookela muzhilo ye mwafwachikilepo jizhina jenu ne, mambo aye ubena kulomba kwi Lesa wanji bimye bisatu pa juba pa juba.”+ 14 Mfumu byo aumvwine bino byambo, waikele bingi na bulanda, kabiji wakebelenga mashinda a kupokolwelamo Danyela; kabiji kufikatu ne mabanga, waesekele na bulume bwanji bonse kuba’mba amupokolole. 15 Ponkapo aja jibumba ja banabalume jaishile ku mfumu ne kumwambila mfumu amba: “Anweba mfumu, vulukai kuba’mba muzhilo wa bena Meda ne bena Pelisha waamba’mba, kintu kyonse kyo bakanya nangwa muzhilo walenga mfumu kechi wafwainwa kupimpulwa ne.”+

16 Onkao mambo, mfumu wibatumine kabiji bakamuletele Danyela ne kumutaya mu jiyengo ja mabokwe.+ Mfumu waambijile Danyela amba: “Lesa wobe ye wingijila moba onse usakukupokolola.” 17 Ponkapo banabalume baletele jibwe ne kwijishinka ku kibelo* kya jiyengo, ne mfumu wabikilepo katetesho ka kambalaminwe kanji ne ka babinemanga banji, kuba’mba kafwako kintu nangwa kimo kisakwaluka pa mambo a kwa Danyela ne.

18 Mfumu wabwelele ku jilapa janji. Walaajiletu na nzala kabiji wakaine bya kisangajimbwe byonse* kabiji wakankelwe kulaala.* 19 Byo kyafikile ku makya, mfumu wabuukile ne kuya lubilo ku jiyengo ja mabokwe. 20 Byo afikile kwipi na jiyengo ja mabokwe, wamubijikile Danyela na jiwi ja bulanda. Mfumu washikishe Danyela amba: “Obewa Danyela, kalume wa Lesa mumi, nanchi Lesa wobe ye wingijila moba onse wakupokolola ku mabokwe nyi?” 21 Ponkapo Danyela wamukumbwile mfumu amba: “Anweba mfumu, mwikale myaka ne myaka. 22 Lesa wami wajikutuma malaika wanji ne aye wajikushinka tunwa twa mabokwe,+ kabiji mabokwe kechi ankozha ne,+ mambo aye kechi namulengapo mambo ne; nangwatu anweba mfumu kechi nemubapo kintu kyatama ne.”

23 Mfumu watemenwe bingi, kabiji wakambizhe’mba Danyela bamulupulemo mu jiyengo. Danyela byo bamulupwilemo mu jiyengo, kechi wajingapo nangwa na kikozha ne, mambo waketekejile mwi Lesa wanji.+

24 Ponkapo mfumu wakambizhe, ne banabalume bapelemo mambo* Danyela bebaletele, kabiji bebatayile mu jiyengo ja mabokwe pamo na baana babo ne bakazhi babo. Saka bakyangyetu ne kufika panshi ya jiyengo, bafikijiletu mu tunwa twa mabokwe kabiji bebakokotele bikupa byabo byonse.+

25 Kepo Mfumu Daliusa anembejile mitundu yonse ya bantu, bisaka bya bantu ne bantu bamba milaka yapusana pusana bekala pano pa ntanda amba:+ “Mwikale mu mutende! 26 Amiwa nakambizha kuba’mba mu bufumu bwami bonse, bantu bafwainwa kwakamwa Lesa wa kwa Danyela.+ Mambo aye ye Lesa mumi kabiji ye wa myaka ne myaka. Bufumu bwanji kechi bakebonauna ne, kabiji bukalama* bwanji bo bwa myaka ne myaka.+ 27 Aye upokolola,+ upulusha, uba biyukilo ne bya kukumya mwiulu ne pano pa ntanda,+ mambo wapokolola Danyela mu tunwa twa mabokwe.”

28 Onkao mambo, Danyela wayile bingi nkuwa mu bufumu bwa kwa Daliusa+ ne mu bufumu bwa kwa Kilusa mwina Pelisha.+