Byubilo bya Batumwa
18 Bino bintu byo byapwile, Paulo wafumineko ku Atene ne kuya ku Kolinda. 2 Kabiji wataaineko Muyudea wa jizhina ja Akwila,+ mwina Pontusa wakifuminetu ku Italya na mukazhanji Pilisila, mambo Kaludiusa wakambizhe Bayudea bonse kufumamo mu Loma. Onkao mambo, wayile na kwibapempula, 3 na mambo a kuba bonse bayukile mwingilo umo, Paulo waikele nabo ku nzubo yabo ne kwingijila nabo pamo+ mambo bajinga basendwe ba matente. 4 Waambanga jashi* mu nshinagoga+ pa moba onse a sabado+ ne kwitabisha Bayudea ne Bangiliki.
5 Silasa+ ne Timoti+ byo bafikile kufuma ku Makedonya, Paulo watatwile kuteshako bingi muchima kusapwila mambo a Lesa saka ebabuula Bayudea amba Yesu ye Kilishitu.+ 6 Bino byo bamulengulwilenga ne kumwambila mwenga, wakunchile bivwalo byanji+ ne kwibambila’mba: “Mashi enu emushinkamane anwe bene.+ Amiwa nabinga.+ Kufuma lelo mbena kuya ku bantu ba mu bisaka bya bantu.”+ 7 Ponkapo wafumineko ne kuya ku nzubo ya kwa Titiusa Yusitusa wapopwelanga Lesa, wajinga na nzubo yalamankene na nshinagoga. 8 Kilishipusa+ mukulumpe wa nshinagoga, ne bonse ba mu nzubo yanji baitabijile mwi Nkambo. Ne bena Kolinda bavula baumvwine mambo awama baitabijile ne kubatizhiwa. 9 Kabiji bufuku, Nkambo waambijile Paulo mu kimwesho amba: “Kuchina ne, obewa ambangatu kange wikileke ne, 10 mambo amiwa nji ne obewa+ kabiji kafwako muntu ukakuba kyatama ne; mambo nji na bantu bavula bingi mu uno muzhi.” 11 Onkao mambo, waikele monka mu yewa muzhi mwaka umo ne bañondo batanu na umo saka ebafunjisha mambo a Lesa.
12 Kimye Galio kyo ajinga mukulumpe* wa kyalo kya Akaya, Bayudea bamuvundumukijile Paulo ne kumutwala ku kipona kya kuchibilapo mambo, 13 saka bamba’mba: “Uno muntu ubena kwitabisha bantu kupopwela Lesa mu jishinda japusana na mizhilo.” 14 Bino Paulo byo aubile’mba ambe, Galio waambijile Bayudea amba: “Anweba Bayudea, umvwe uno muntu waji kuba kyatama nangwa kulenga mambo akatampe, inge naumvwa byo mubena kwamba. 15 Pakuba umvwe luno lupata luji pa mambo a byambo, mazhina ne mizhilo yenu,+ lupwishai anwe bene. Amiwa kechi nakeba kwikala mu bino bintu ne.” 16 Ponkapo wibapalañenyeko bonse ku kipona kya kuchibilapo mambo. 17 Onkao mambo, bakwachile Sositenesa,+ mukulumpe wa nshinagoga, ne kutatula kumupuma konka ku kipona kya kuchibilapo mambo. Bino Galio kechi waubileko bino bintu ne.
18 Bino Paulo byo aikeleko moba amo, washajikilepo balongo ne kuya na bwato ku Silya, bayijile pamo na Pilisila ne Akwila. Kabiji mu Kenkelea+ watendele nsuki yanji na mambo a luchipo lo achipile. 19 Onkao mambo, bafikile mu Efisesa, kabiji wibashile monka; bino aye watwelele mu nshinagoga ne kwisamba na Bayudea.+ 20 Nangwa kya kuba bamwambijile’mba ekale nabo, aye wakaine 21 bino wibashajikilepo ne kwibalaya’mba: “Umvwe Yehoba* waswa nkabwela jikwabo kwi anweba.” Kabiji wafumine ku Efisesa na bwato 22 ne kuya ku Kesalea. Kabiji wapichile* na kupempula kipwilo ne kuya ku Antioka.+
23 Byo aikeleko moba amo, wafumineko ne kukapita mu mapunzha apusana pusana a kyalo kya Ngalatiya ne Filigya+ na kukosesha baana ba bwanga bonse.+
24 Muyudea wa jizhina ja Apolosa+ mwina Alekesandiliya wafikile mu Efisesa; uno muntu wayukile bingi kwamba kabiji wayukile Binembelo. 25 Uno muntu bamufunjishe jishinda ja Yehoba,* kabiji wajinga wa mukoyo bingi, aye waambilenga ne kufunjisha bulongo bintu byaamba pe Yesu, bino wayukilekotu lubatizhilo lwa kwa Yoano. 26 Watatwile kwamba na kuchinchika mu nshinagoga, kabiji Pilisila ne Akwila+ byo bamumvwine, bamusendele ku mbaji ne kumulumbulwila bulongo jishinda ja Lesa. 27 Kabiji na mambo a kuba wakebele kwabukila ku Akaya, balongo banembejile baana ba bwanga kuba’mba bamutambwile na muchima umo. Onkao mambo, byo afikileko, wakwashishe bingi baitabijile na mambo a lusa lukatampe lwa Lesa; 28 mambo wibashinawijilenga patoka Bayudea kuba’mba mafunjisho abo a bubela, kupichila mu byo ebalumbulwilanga mu Binembelo amba Yesu ye Kilishitu.+