Itanshi ya kwa Yoano
3 Pano monai butemwe Tata bo etutemwa,+ pa kwitutela’mba baana ba Lesa!+ Kabiji bino byo byo tuji. O ene mambo ba pano pa ntanda o babujila kwituyuka,+ mambo abo kechi bamuyuka ne.+ 2 Anweba batemwe, pano twi baana ba Lesa,+ bino kikyangye kukiyukanyikwa byo tukekala.+ Twayuka’mba byo akamweka tukekala byonka byo aji, mambo tukamumona byonka byo aji. 3 Kabiji yense uji na luno luketekelo mwi aye, witokesha mwine+ byonka byo atoka aye.
4 Yense ulengalenga mambo uzhilulula mizhilo, kabiji bundengamambo ko kuzhilulula mizhilo. 5 Anweba mwamuyuka’mba wamwekele kuba’mba afumyepo bundengamambo bwetu,+ kabiji bundengamambo kechi buji mwi aye ne. 6 Yense utwajijila kwikala mwi aye kechi ulengalenga mambo ne;+ kabiji kafwako muntu nangwa umo ulengalenga mambo wamumonapo kala nangwa kumuyuka ne. 7 Anweba baana, kange muleke muntu nangwa umo emutwale mungi ne; mambo awa uba byaoloka ye waoloka, byonkatu aye byo aji waoloka. 8 Awa ulengalenga mambo ye wa kwa Diabola, mambo Diabola ulengalenga mambo kufumatu ne ku ntendekelo.*+ O ene mambo, Mwana Lesa o aishijile, kuba’mba onaune mingilo ya kwa Diabola.+
9 Yense wasemwa kwi Lesa kechi ulengalenga mambo ne,+ mambo lukunwa* wa Lesa uji mwi aye, kabiji kechi wakonsha kulengalenga mambo ne, mambo wasemwa kwi Lesa.+ 10 Baana ba Lesa ne baana ba Diabola bayukanyikilwa mu kino: Yense ubula kuba byaoloka kechi ye wa kwa Lesa ne, kyo kimotu ne yewa wabula kutemwa mulongo wanji.+ 11 Mambo ano o mambo o mwaumvwine ku ntendekelo, amba twafwainwa kwitemwa atwe bene na bene;+ 12 kechi kwikala byajinga Kaina wajinga wa kwa yewa mubi, yenka waipayile nkasanji ne.+ Nanchi wamwipayijile ka? Mambo mingilo yanji yajinga yatama,+ pakuba ya nkasanji yajinga yaoloka.+
13 Balongo bami, kange mukumye ba pano pa ntanda byo bemushikwa ne.+ 14 Twayuka’mba atweba twafuma ku lufu ne kwiya ku bumi,+ mambo twibatemwa balongo betu.+ Awa ubula kutemwañana, ukiji mu lufu.+ 15 Yense washikwa mulongo wanji ye mbanzhi,+ kabiji mwayuka’mba kafwako mbanzhi ukekala na bumi bwa myaka ne myaka ne.+ 16 Mu kino mo mo twayukila butemwe, mambo awa wapaine bumi* bwanji na mambo a atweba;+ ne atweba twafwainwa kupana bumi* bwetu na mambo a balongo betu.+ 17 Bino yense uji na bintu bya ku mubiji bya pano pa ntanda umona mulongo wanji wakajilwa ne kumubila lusa ne, pano butemwe bwa Lesa bwaikala byepi mwi aye?+ 18 Anweba baana, kechi twafwainwa kwitemwatu mu byambo nangwa pa kanwatu ne,+ poso mu byubilo+ ne mu bukine.+
19 Monka muno mo mo tukayukila’mba tuji mu bukine, kabiji tukashiinwa mu michima yetu amba Lesa witutemwa 20 pa mambo a bintu michima yetu byo ituzhachisha, mambo Lesa wakila michima yetu kabiji wayuka bintu byonse.+ 21 Anweba batemwe, umvwe michima yetu kechi ituzhachisha ne, twakonsha kulomba kwi Lesa saka twakasuluka pa kwamba;+ 22 kabiji byonse byo tulomba twibitambula kufuma kwi aye,+ mambo tubena kulondela mikambizho yanji kabiji tubena kuba bintu byaitabilwa kwi aye. 23 Uno ye mukambizho wanji amba: twikale na lwitabilo mu jizhina ja Mwananji Yesu Kilishitu+ ne kwitemwa atwe bene na bene,+ byonkatu byo etukambizhe. 24 Kabiji awa ulondela mikambizho yanji wikala mwi aye, ne aye wikala mu yewo muntu.+ Kabiji kupichila mu mupashi ye etupele, twayuka’mba wikala mwi atweba.+