Kubala
23 Balamu waambijile Belaka amba: “Pa ino mpunzha shimikaipo bya kusokelapo bitapisho+ bitanu na bibiji ne kunnengezhezha bañombe balume batanu na babiji ne mikooko ilume itanu na ibiji.” 2 Ponkapo Belaka waubijile monka mwamubuujile Balamu. Kabiji pa kya kusokelapo bitapisho kimo kimo Belaka ne Balamu balambwijilepo ñombe umo ne mukooko umo.+ 3 Kepo Balamu aambijile Belaka amba: “Shalai pano pa mulambo wenu wa kusoka, amiwa nakiya. Apo kampe Yehoba usakwisamba ne amiwa. Kabiji byonse byo asakumbuula, nsakwimubuulabyo.” Byonkabyo, wakanjijile peulu ya mutumba.
4 Kepo Lesa esambile ne Balamu,+ Balamu wabuujile Lesa amba: “Nashimika bya kusokelapo bitapisho bitanu na bibiji monka mo byalondankena kabiji pa kya kusokelapo bitapisho kimo kimo, nalambwilapo ñombe umo ne mukooko umo.” 5 Yehoba wabuujile Balamu+ amba: “Bwela kwi Belaka kabiji bino byo byo usakumubuula.” 6 Byonkabyo, ne aye wayile kwajinga Belaka ne bakulumpe bonse ba bena Moabu baimene ku mulambo wanji wa kusoka. 7 Kepo aambile bino byambo amba:+
“Belaka mfumu wa Moabu wandeta kufuma ku Alamu,+
Kufuma ku mitumba ya ku musela amba:
‘Iya umfingileko Yakoba.
Iya umulengulule Isalela.’+
8 Nakonsha kufinga byepi bantu Lesa bo abula kufinga?
Kabiji nakonsha kulengulula byepi bantu Yehoba bo abula kulengulula?+
9 Nebamona byo nji peulu ya mabwe,
Kabiji nebamona byo nji pa tutumbatumba.
10 Ñanyi wakonsha kubala bantu ba kwa Yakoba+ bavula nobe busenga,
Nangwa ñanyi wakonsha kubala lubaji lwa buna lwa Isalela?
Lekai mfwe* lufu lwa bantu baoloka,
Kabiji mpelo yami ikale nobe mpelo yabo.”
11 Kepo Belaka ashikishe Balamu amba: “Ñanyi kintu kyo wanguba? Naji kukuleta namba ufinge balwanyi bami, pakuba obewa wibapesha.”+ 12 Aye wamukumbwile’mba: “Nanchi kechi nafwainwa kwamba bintu byonse byambuula Yehoba nenyi?”+
13 Belaka wamwambijile’mba: “Twaya tuye ku mpunzha ikwabo ko wakonsha kwibamwena. Usakumonakotu bacheche; bino kechi usakwibamona bonse ne. Wibamfingileko konkakwa.”+ 14 Byonkabyo, wamutwajile ku bujimi bwa Zofimu, peulu ya Pishika+ kabiji washimikile bya kusokelapo bitapisho bitanu na bibiji kabiji pa kya kusokelapo bitapisho kimo kimo, walambwijilepo ñombe umo ne mukooko umo.+ 15 Onkao mambo, Balamu waambijile Belaka amba: “Shalai pano pa mulambo wenu wa kusoka, byo nakiya na kwisamba ne Lesa kokwa.” 16 Kabiji Yehoba wisambile nanji ne kumubuula amba:+ “Bwela kwi Belaka kabiji bino byo byo usakumubuula.” 17 Kabiji wabwelele kwi aye ne kumutaana saka aimana na kumupembelela pa mulambo wanji wa kusoka ne bakulumpe ba bena Moabu bajinga nanji. Belaka wamushikishe’mba: “Nanchi Yehoba wakubuula’mba ka?” 18 Kepo aambile bino byambo amba:+
“Imanai anweba ba Belaka ne kuteleka.
Ñumvwai anweba mwana ba Zipole.
19 Lesa kechi uji nobe muntu wamba bubela ne,+
Kabiji kechi uji nobe mwana muntu upimpula milanguluko* yanji ne.+
Umvwe waamba kintu, nanchi kechi ukekyuba nenyi?
Umvwe walaya, nanchi kechi ukekifikizha nenyi?+
20 Bansenda kuba’mba nebapeshe;
Ne Lesa wibapesha,+ kabiji amiwa kechi nakonsha kwalulula mapesho abo ne.+
21 Lesa kechi wakonsha kuswisha kulowa Yakoba ne,
Kabiji kechi wakonsha kuswisha makatazho kumwekela bena Isalela ne.+
Yehoba Lesa wanji uji nabo,
Kabiji bamutota byo aji mfumu wabo.
22 Lesa wibafumya mu Ijipita.+
Kwi abo uji nobe nsengo ya mboo.+
23 Mambo kafwako bwanga bwakonsha kwipaya Yakoba,+
Kabiji kafwako kipongo kyakonsha kukwata Isalela.+
Pa kikye kimye, bakamba pe Yakoba ne Isalela amba:
‘Talai byauba Lesa!’
24 Abano bo bantu bakemana nobe bokwe,
Bakemana nobe bokwe.+
Kechi ulaala ne, posotu waja nyama
Kabiji ukatoma mashi a boba bo akepaya.”
25 Kepo Belaka aambijile Balamu amba: “Umvwe kechi ukeba kumufinga ne, ko kuba’mba ne kumupesha kange umupeshe ne.” 26 Balamu wakumbwile Belaka amba: “Nanchi kechi naji kwimubuula namba, ‘Nsakuba byonse byañambila Yehoba’ nenyi?”+
27 Belaka waambijile Balamu amba: “Twaya nkutwale ku mpunzha ikwabo. Apo kampe kisakumutokela ku muchima Lesa wa kine kuba’mba umfingilebo kokwa.”+ 28 Onkao mambo, Belaka wasendele Balamu ne kuya nanji ku Peola patuntama kwipi na Yeshimonyi.*+ 29 Kabiji Balamu waambijile Belaka amba: “Pa ino mpunzha shimikaipo bya kusokelapo bitapisho bitanu na bibiji ne kunnengezhezha bañombe balume batanu na babiji ne mikooko ilume itanu na ibiji.”+ 30 Byonkabyo, Belaka waubijile monka mwamubuujile Balamu, kabiji pa kya kusokelapo bitapisho kimo kimo, walambwijilepo ñombe umo ne mukooko umo.