Yelemiya

24 Ponkapo Yehoba wammwesheshe bitumbe bibiji bya makuyu byo batujile ku nzubo ya Yehoba, Nebukaneza Mfumu wa Babilona saka atwala kala mu buzha Yekoniya*+ mwana wa kwa Yehoyakimu,+ mfumu wa Yuda pamo na babinemanga ba bena Yuda, ne basendwe ba bichi ne basendwe* ba byela; wibafumishe mu Yelusalema ne kwibatwala ku Babilona.+ 2 Mu ntumbe imo mwajinga makuyu awamisha ajinga nobe makuyu atatwilapo kupya, mu ntumbe ikwabo mwajinga makuyu atama kya kuba bantu kechi bakonsha ne kwiaja ne.

3 Kepo Yehoba anshikishe’mba: “Yelemiya, ñanyi bintu byo wamona?” Amiwa nakumbwile namba: “Namona makuyu awama ne atama, aa awama, awamishatu, ne oa atama, atama kya kuba bantu kechi bakonsha ne kwiaja ne.”+

4 Ponkapo Yehoba wañambijile’mba: 5 “Yehoba Lesa wa Isalela waamba’mba, ‘Byonkatu biji ano makuyu awama, nkobila bintu byawama bena Yuda baji mu buzha, bonka bo nafumishe mu ino mpunzha ne kwibatwala mu kyalo kya bena Kalodeya. 6 Amiwa nkebobila byawama kabiji nkebabwezha mu kino kyalo.+ Nkebashimika bino kechi nkebakundula ne; nkebajimba bino kechi nkebatupula ne.+ 7 Kabiji nkebapa muchima wa kungyuka’mba amiwa yami Yehoba.+ Bakekala bantu bami,+ ne amiwa nkekala Lesa wabo, mambo bakeya kwi amiwa na muchima wabo yense.+

8 “‘Pano bino, pa mambo a makuyu atama, muntu o akonsha kukankalwa kuja,+ Yehoba waamba’mba: “Abino byo byo nkamonanga Zedekiya+ Mfumu wa Yuda, babinemanga banji, bashalapo ba mu Yelusalema bakashala mu kino kyalo, ne boba bekala mu kyalo kya Ijipita.+ 9 Nkebalula kwikala kintu kikalengela bufumu bonse bwa pano pa ntanda+ kumvwa moyo na mambo a bya malwa byo nkebaletela. Kabiji bantu bakebambilanga mwenga, kwibamba mu bishimpi, kwibendeleka ne kwibafinga+ mu mapunzha onse mo nkebapalañenya.+ 10 Kabiji nkebatumina mpoko,+ kipowe kya nzala ne mwalo*+ kufikatu ne bonse byo bakavila mu kyalo kyo nebapele, abo ne bashakulu babo.”’”