Kubala

6 Yehoba waambijile Mosesa jikwabo amba: 2 “Buula bena Isalela amba, ‘Umvwe mwanamulume nangwa mwanamukazhi wachipa luchipo lwa kwikala Munazili*+ kwi Yehoba, 3 kechi wafwainwa kutoma binyu nangwa maalwa akwabo ne. Kechi wafwainwa kutoma bintu byasasa byafuma ku binyu nangwa bintu byasasa byafuma ku maalwa ne.+ Kabiji kechi wafwainwa kutoma mema a mañanzañanza nangwa kuja mañanzañanza abula kuma nangwa auma ne. 4 Moba onse o akekala Munazili kechi wafwainwa kuja kintu kyonse kyo balenga na mañanzañanza nangwa abula kupya nangwa bipu byao ne.

5 “‘Moba onse o akachipa kwikala Munazili kechi akatende nsuki yanji na mpemuna ne.+ Akatwajijile kwikala wazhila kabiji akaleke nsuki yanji ikakome kufikatu ne byo akapwa moba o akezhijikilamo a kwingijila Yehoba. 6 Mu moba onse o akezhijikilamo kwingijila Yehoba, kechi akakwate* pa mubiji wa muntu* wafwa ne. 7 Nangwa wafwisha bashanji, nangwa bainanji, nangwa kolojanji nangwa nkasanji wa mulume, nangwa nyenga yanji, kechi akezhilulule ne,+ mambo kayukilo ka kwikala Munazili kwi Lesa wanji kaji pa mutwe wanji.

8 “‘Ukekala wazhila kwi Yehoba moba onse o akekala Munazili. 9 Bino umvwe kwa kubula kuketekela, muntu wafwila ko aji,+ kabiji wazhilulula nsuki ya kayukilo ka kwizhijika kwingijila Lesa,* wafwainwa kutenda nsuki yanji+ pa juba ja kwitokesha. Akatende pa juba ja butanu na bubiji. 10 Pa juba ja butanu na busatu, akalete kwi ñanga tutela tubiji nangwa twana twa nkunda tubiji konka ku kibelo kya tente wa lusambakeno. 11 Ñanga akalambule kamo kwikala mulambo wa bubi ne kakwabo kwikala mulambo wa kusoka, kabiji akamufuchileko mambo anji+ o alengele na mambo a kukwata pa mubiji wa muntu* wafwa. Kepo Munazili akazhijike mutwe wanji pa jonkaja juba. 12 Kabiji akezhijike jikwabo kwingijila Yehoba pa moba o akekala Munazili, kabiji akalete mwana mukooko mulume wa mwaka umo kwikala mulambo wa mambo. Nangwa byonkabyo, moba a kunyuma o aikele Munazili kechi bakeabala ne, mambo wizhilulwile.

13 “‘Uno ye muzhilo wa Munazili: Byo akapwisha moba anji a kwikala Munazili,+ bakamulete ku kibelo kya tente wa lusambakeno. 14 Konka kuno akalambule mulambo kwi Yehoba: mwana mukooko mulume umo wabula bulema wa mwaka umo kwikala mulambo wa kusoka,+ mwana mukooko mukazhi umo wabula bulema wa mwaka umo kwikala mulambo wa bubi,+ mukooko mulume umo wabula bulema wa kitapisho kya mutende,+ 15 ntumbe ya bashinkwa banzhingwile babula mbizho bo balenga na bunga bwalamba bo bavwangako manyi, bibebulwa byabula mbizho byo bashingako manyi+ ne mulambo wao wa kajo ne milambo yao ya binyu.+ 16 Kabiji ñanga akebilete kwi Yehoba ne kulambula mulambo wanji wa bubi ne mulambo wanji wa kusoka. 17 Akalambule mukooko mulume kwikala kitapisho kya mutende kwi Yehoba pamo na ntumbe ya bashinkwa babula mbizho, kabiji ñanga akalambule mulambo wa kajo+ ne mulambo wa binyu.

18 “‘Munazili akatendele nsuki yanji ku kibelo kya tente wa lusambakeno, kabiji akatole nsuki ya ku mutwe*+ wanji yakomene kimye kyo ajinga Munazili ne kwiibika pa mujilo uji pa kitapisho kya mutende. 19 Kabiji ñanga akashikule kuboko kwa mukooko mulume ko bateeka,+ shinkwa wanzhingwile wabula mbizho umo uji mu ntumbe ne jibebulwa jabula mbizho jimo ne kwibibika mu maboko a Munazili inge wapwisha kutenda kayukilo kanji ka kwikala Munazili. 20 Kabiji ñanga akebipepezhe kwikala mulambo wa kupepezha kwi Yehoba.+ Abino ke bintu byazhila bya ñanga, pamo na kakuji ka mulambo wa kupepezha ne kijoma kya bupe bwazhila.+ Inge wapwisha kuba bino, Munazili po po akonsha kutoma binyu.

21 “‘Uno ye muzhilo wa Munazili+ wachipa luchipo: Umvwe wachipa luchipo lwa kulambula mulambo kwi Yehoba wakila pa bintu byo bakebela Munazili kabiji wakonsha kuba bino, akafikizhe luchipo lwanji monka mwayila muzhilo wa kwikala Munazili.’”

22 Kepo Yehoba aambijile Mosesa amba: 23 “Buula Alona ne baana banji amba, ‘Abino byo byo mwafwainwa kupesha+ bena Isalela. Mukebapeshenga’mba:

24 “Yehoba akupeshe+ ne kukulama.

25 Kyeya kya ku kilungi kya Yehoba kikusaminenga,+ kabiji akubile bibusa.

26 Yehoba akubile bibusa* ne kukupa mutende.”’+

27 Kabiji bakengijishenga jizhina jami pa kupesha bena Isalela,+ pa kuba’mba nkebapeshe.”+