Buku wa Bubiji wa Byambo bya Moba
1 Solomone mwana wa kwa Davida wayilengatu na kukosa mu bufumu bwanji, kabiji Yehoba Lesa wanji wajinga nanji kabiji wamulengejile kutumbalala bingi.+
2 Solomone waichile bena Isalela bonse, bakulumpe ba biumbi ne ba bitota, bamitonyi ne babinemanga bonse ba bena Isalela bonse, bakulumpe ba bikota. 3 Kepo Solomone ne kipwilo kyonse bayile ku mpunzha yatuntama ku Gibeona,+ mambo ko kwajinga tente wa lusambakeno wa Lesa wa kine, yenka tente walengele Mosesa kalume wa Yehoba mu kiselebwa. 4 Nangwa byonkabyo, Davida wasendele Jikwachi ja Lesa wa kine kufuma ku Kiliata-yealimu+ ne kwijileta ku mpunzha yo ejinengezhejile; wijipopejile tente mu Yelusalema.+ 5 Kabiji kya kusokelapo bitapisho kya mukuba+ kyalengele Bezalela+ mwana wa kwa Uli, Uli mwana wa kwa Hula, bekibikile kulutwe ya tente wa lusambakeno wa Yehoba; kabiji Solomone ne kipwilo balombelanga kulutwe yakyo.* 6 Solomone walambwile milambo kwi Yehoba, kabiji walambwile banyama ba milambo ya kusoka 1,000 pa kya kusokelapo bitapisho kya mukuba+ kyajinga ku tente wa lusambakeno.
7 Bonkabwa bufuku Lesa wamwekele kwi Solomone ne kumwambila’mba: “Ndombe kintu kyo ukeba’mba nkupe.”+ 8 Ponkapo Solomone waambijile Lesa amba: “Anweba mwamwesha batata ba Davida+ butemwe bukatampe bubula kwaluka, kabiji mwanswanyika pa bufumu bwabo.+ 9 Pano anweba Yehoba Lesa, mulaye ye mwalayile batata ba Davida ekale wa kishinka,+ mambo anweba mwantongola kwikala mfumu pa bantu bavula nobe lukungu lwa panshi.+ 10 Pano mpai maana ne muchima+ wa kuyuka bya kutangijila bano bantu,* mambo ñanyi wakonsha kuchibila mambo bano bantu benu bavula bibye?”+
11 Kepo Lesa aambijile Solomone amba: “Na mambo a kuba’mba kino kyo kyasaka muchima wobe kabiji kechi walomba bubile, bunonshi, ne munema nangwa’mba aba bakushikwa bafwe* nangwa’mba wikale myaka* yavula ne, bino walomba maana ne muchima wa kuyuka bya kuchibila bantu bami mambo bo nakutongwelapo namba wikale mfumu wabo,+ 12 nsakukupa maana ne muchima wa kuyuka bintu; bino nsakukupa ne bubile ne bunonshi ne munema kya kuba kafwako bamfumu bajingako kala bajingapo nabyo ne, kabiji kafwako ukalondela pe obewa ukekala nabyo ne.”+
13 Onkao mambo, Solomone wafumine pa mpunzha yatuntama ku Gibeona,+ konka ku tente wa lusambakeno, ne kubwela ku Yelusalema; kabiji walaminenga bena Isalela. 14 Solomone watwajijile kuvuzha makalaki ne bambili;* wajinga na makalaki 1,400 ne bambili* 12,000,+ kabiji wibibikile mu mizhi ya kulaminamo makalaki+ mu Yelusalema kwipi na kwaikelanga mfumu.+ 15 Mfumu wavuzhizhe bingi siliva ne ngolode mu Yelusalema nobe mabwe,+ ne bichi bya sida byavujile nobe bichi bya mikuyu bya mu Shefela.+ 16 Bambili ba kwa Solomone bebafumishe ku Ijipita,+ kabiji jibumba ja bapoteshi ba mfumu japotanga bambili mu bipanyi* pa mutengo umo.+ 17 Kalaki umo ye bafumyanga ku Ijipita bamupotanga na mashekele a siliva 600, ne mbili umo bamupotanga mashekele 150; ne abo bebipoteshanga ku bamfumu bonse ba bena Hiti ne ku bamfumu ba ku Silya.