Buku wa Bubiji wa Bamfumu

16 Mu mwaka wa bu 17 wa bukalama bwa kwa Peka mwana wa kwa Lemaliya, Ahaza+ mwana wa kwa Yotamo Mfumu wa Yuda mo mo aikele mfumu. 2 Ahaza wajinga na myaka ya kusemwa 20 kimye kyo aikele mfumu, kabiji walamine mu Yelusalema myaka 16. Kechi waubilenga byaoloka ku meso a Yehoba Lesa wanji byonka byaubanga Davida mushakulu wanji ne.+ 3 Pakuba aye waendelenga mu jishinda ja bamfumu ba mu Isalela,+ kabiji wasokele ne mwananji mu mujilo,*+ ne kulondela byubilo bya bunya bya bisaka bya bantu+ Yehoba byo apangile ku meso a bena Isalela. 4 Kabiji watapishenga ne kusoka bya kufutumuna pa mapunzha atuntama,+ ne pa tutumbatumba, ne munshi ya bichi bikatampe byonse.+

5 Kyo kimye Lezina Mfumu wa Silya ne Peka mwana wa kwa Lemaliya mfumu wa Isalela kyo baishile na kulwa nkondo mu Yelusalema.+ Ahaza bamutayile mu kañumbwañumbwa bino bakankelwe kwangata muzhi. 6 Pa kyonkakya kimye, Lezina Mfumu wa Silya wabwezhezhe muzhi wa Elata+ ku Edomu, kabiji wapangilemo bena Yuda* mu Elata. Kabiji bena Edomu batwelele mu Elata, kabiji mo mo bekala kufika ne lelo jino. 7 Onkao mambo, Ahaza watumine baluwe kwi Tigilata-pilesa Mfumu+ wa Asilya amba: “Amiwa nekalume wenu kabiji nemwanenu. Iyai mumpokolole mu kuboko kwa mfumu wa Silya ne mu kuboko kwa mfumu wa Isalela, baiya na kundukuka.” 8 Kepo Ahaza atolele siliva ne ngolode byajinga mu nzubo ya Yehoba ne byajinga mo balaminanga bya buneme mu nzubo* ya mfumu ne kwibituma kwikala bya mazhikakanwa kwi mfumu wa Asilya.+ 9 Mfumu wa Asilya waswile, kabiji wayile ku Damasakasa ne kumushinda ne kutwala bantu mu buzha ku Kila,+ kabiji waipayile Lezina.+

10 Kepo Mfumu Ahaza ayile na kumonañana na Tigilata-pilesa Mfumu wa Asilya ku Damasakasa. Byo amwene kya kusokelapo bitapisho kyajinga mu Damasakasa, Mfumu Ahaza watumijile Uliya ñanga pepala wa kya kusokelapo bitapisho, wamwesheshenga byo kyajinga ne byo bekilengele.+ 11 Uliya+ ñanga washimikile kya kusokelapo bitapisho+ monka mwayijile mikambizho yatumine Mfumu Ahaza saka aji ku Damasakasa. Uliya ñanga wapwishishe kwikishimika Mfumu Ahaza saka akyangye kubwela kufuma ku Damasakasa. 12 Mfumu byo abwelele kufuma ku Damasakasa ne kumona kya kusokelapo bitapisho, wayile ku kya kusokelapo bitapisho ne kulambwilapo milambo.+ 13 Kabiji pa kyonkakya kya kusokelapo bitapisho walambwijilepo milambo yanji ya kusoka ne milambo yanji ya kajo; kabiji waitulwijilepo mulambo wanji wa binyu ne kusansapo mashi a bitapisho byanji bya mutende. 14 Kabiji kya kusokelapo bitapisho kya mukuba+ kyajinga ku meso a Yehoba, wikifumishe po kyajinga kulutwe ya nzubo, pakachi ka kya kusokelapo bitapisho kyanji ne nzubo ya Yehoba, ne kwikitwala ku kabeta ka ku buyeke bwa kya kusokelapo bitapisho kyanji. 15 Mfumu Ahaza wakambizhe Uliya+ ñanga amba: “Mulambo wa kusoka wa lukelo umulambwile pa kya kusokelapo bitapisho kikatampe,+ ne mulambo wa kajo wa mabanga,+ mulambo wa kusoka wa mfumu, ne mulambo wanji wa kajo, ne milambo ya kusoka, milambo ya kajo ne milambo ya binyu ya bantu bonse. Kabiji wafwainwa kusansapo mashi onse a milambo ya kusoka ne mashi onse a bitapisho bikwabo. Pa mambo a kya kusokelapo bitapisho kya mukuba, nsakukubuula bya kuba.” 16 Kabiji Uliya ñanga waubile bintu byonse byamukambizhe Mfumu Ahaza.+

17 Kabiji Mfumu Ahaza wafumishe malata ajinga ku bikochikala+ ne kwiachibaula ne kufumyapo mashomeka ajinga pa bikochikala,+ kabiji Kizhiba kyajinga pa bañombe ba mukuba+ wikifumishepo ne kwikitula pa kyalanta.+ 18 Kabiji watuntulwile musemi wa pa kishimikwa kya Sabado kyo bashimikile mu nzubo ne jishinda ja pangye mwapichilanga mfumu pa kufuma ku nzubo ya Yehoba; waubile kino na mambo a mfumu wa Asilya.

19 Bintu bikwabo byapichilemo Ahaza, bintu byo aubile, nanchi kechi byanembwa mu buku wa bintu byapichilengamo bamfumu ba mu Yuda nenyi?+ 20 Kepo Ahaza bamutwajile na kulaala kwalaala bashakulu banji kabiji bamuzhiikile konka ko bazhiikile bashakulu banji mu Muzhi wa Davida; kabiji mwananji aye Hezekiya*+ waswaine pa bufumu.