Itanshi ya kwa Yoano

1 Tubena kwimunembela pa mambo a yewa wajingako ku ntendekelo, waleta mambo apana bumi o twaumvwine, o twamwene na meso etu, o twalama ne kukwata na maboko etu,+ 2 (kine, buno bumi bwasolwelwe, twibumwene kabiji bo bo tubena kwambapo+ ne kwimubuula bumi bwa myaka ne myaka+ bwajinga na Shetu kabiji bo betusolwela), 3 akya kyo twamwene ne kumvwa tubena kwimubuulakyo,+ kuba’mba ne anweba mupwanañanenga pamo ne atweba. Kabiji kuno kupwanañana kwetu ko kujipo ne na Shetu ne Mwananji Yesu Kilishitu.+ 4 Onkao mambo, tubena kwimunembela bino bintu kuba’mba lusekelo lwetu lubayileko.

5 Ano o mambo o twaumvwine kwi aye kabiji oo tubena kwimubuula’mba: Lesa ye kyeya+ kabiji mwi aye kechi muji mfishi ne. 6 Umvwe twaamba’mba, “Tubena kupwanañana nanji,” bino saka twenda mu mfishi, ko kuba’mba tubena kubepa kabiji kechi tubena kulondela bukine ne.+ 7 Nangwa byonkabyo, inge tubena kwenda mu kyeya byonka aye mwine byo aji mu kyeya, ko kuba’mba tubena kupwanañana atwe bene na bene, kabiji mashi a Yesu Mwananji etutokesha ku bundengamambo bonse.+

8 Umvwe twaamba’mba, “Bundengamambo tufwabo,” ko kuba’mba tubena kwijimbaika atwe bene+ ne bukine kechi buji mwi atweba ne. 9 Lesa wa kishinka kabiji waoloka, onkao mambo, umvwe twasolola mambo etu, aye uketulekelako mambo etu ne kwitutokesha ku mingilo yonse yabula koloka.+ 10 Umvwe twaamba’mba, “Kechi twalenga mambo ne,” ko kuba’mba twamwalula ke wa bubela, ne mambo anji kechi aji mwi atweba ne.