Yelemiya
35 Yehoba waambijile Yelemiya mu moba a mfumu wa Yuda, aye Yehoyakimu+ mwana wa kwa Yosiya amba: 2 “Yanga ku nzubo ya bena Lekaba,+ ukesambe nabo ne kwibaleta mu nzubo ya Yehoba mu bibamba* mwa kujiila; kabiji ukebape ne binyu bya kutoma.”
3 Onkao mambo, nasendele Yazaniya mwana wa kwa Yelemiya, Yelemiya mwana wa kwa Habaziniya, balongo banji, baana banji bonse ne bonse ba mu kisemi kya kwa Lekaba 4 ne kwibaleta mu nzubo ya Yehoba. Nebatwajile mu kibamba mwa kujiila kya baana ba kwa Hanana, Hanana mwana wa kwa Igadaliya muntu wa Lesa wa kine. Kino kibamba kyalamankene na kibamba mwajiilanga babinemanga kyajinga peulu ya kibamba mwa kujiila kya kwa Maaseya mwana wa kwa Shaluma kasopa wa pa kibelo. 5 Kepo natujile tutomeno twa mikota ne twabula mikota twayujile binyu ku ba mu kisemi kya kwa Lekaba ne kwibambila’mba: “Tomai bino binyu.”
6 Pakuba abo baambile’mba: “Kechi tusakutoma bino binyu ne, mambo mushakulu wetu aye Yehonadaba*+ mwana wa kwa Lekaba witukambizhe’mba, ‘Anweba nangwa baana benu kechi mwafwainwa kutoma binyu ne. 7 Kabiji kechi mwafwainwa kushimika mazubo, kubyala nkunwa nangwa kujimba nangwa kwikala na majimi a miñanzañanza ne. Pakuba mwafwainwa kwikala mu matente kimye kyonse kuba’mba mukekale moba avula mu kyalo mo mubena kwikala bwenyi.’ 8 Onkao mambo, atweba tukookela byonse bitukambizhe Yehonadaba mwana wa mushakulu wetu Lekaba kuba’mba atweba, bakazhi betu, baana betu ba balume ne baana betu ba bakazhi kechi twafwainwa kutoma binyu ne. 9 Kabiji kechi tushimika mazubo a kwikalamo nangwa kwikala na majimi a miñanzañanza, majimitu akwabo nangwa nkunwa ne. 10 Twikala mu matente ne kukookela bintu byonse bitukambizhe mushakulu wetu Yehonadaba.* 11 Pano bino, Nebukaneza Mfumu wa Babilona byo aishile na kulukuka kyalo,+ atweba twaambile’mba, ‘Twayai tuye ku Yelusalema tunyeme bashilikale ba bena Kalodeya ne ba bena Silya, ne luno tubena kwikala mu Yelusalema.’”
12 Kabiji Yehoba waambijile Yelemiya amba: 13 “Yehoba wa mabumba, Lesa wa Isalela waamba’mba, ‘Yanga ukabuule bena Yuda ne bekala mu Yelusalema amba: “Nanchi kechi bemubuulanga kimye kyonse kukookela byambo byami nenyi?”+ byo byaamba Yehoba. 14 “Yehonadaba mwana wa kwa Lekaba wakambizhe ba mu kisemi kyanji kubula kutoma binyu kabiji balondejilenga byo ebakambizhe pa kubula kwibitoma kufikatu ne lelo, mambo bakookejile mukambizho wa mushakulu wabo.+ Pa kuba amiwa nemubuulanga kimye kyonse,* bino kechi mwankookelanga ne.+ 15 Kabiji kimye kyonse* nemutumijilenga bakalume bami bonse bangauzhi+ na kwimubuula’mba, ‘Twimusashijila anweba bonse pa muntu pa muntu amba, lekai kuba byatama,+ mubenga byawama! Kange muye ku balesa bangi ne kwibengijila ne. Inge mwakookela bino, mukatwajijila kwikala mu kyalo kyo nemupele, anweba ne bashakulu benu.’+ Pano bino, anweba kechi mwañumvwijile nangwa kunkookela ne. 16 Ba mu kisemi kya kwa Yehonadaba mwana wa kwa Lekaba balondejile bibakambizhe mushakulu wabo,+ pakuba bano bantu bakana kuñumvwina.”’”
17 “Onkao mambo, Yehoba Lesa wa mabumba, Lesa wa Isalela waamba’mba: ‘Amiwa mbena kuletela bena Yuda ne bonse bekala mu Yelusalema bya malwa byonse byo nebajimwineko,+ mambo nebabuujilenga, bino kechi bañumvwijilenga ne, kabiji nebechilenga, pano bino abo kechi bankumbwilenga ne.’”+
18 Kabiji Yelemiya waambijile ba mu kisemi kya kwa Lekaba amba: “Yehoba wa mabumba, Lesa wa Isalela waamba’mba, ‘Na mambo a kuba mwakookejile bintu byonse bimukambizhe mushakulu wenu Yehonadaba kabiji mwatwajijila kulondela bintu byonse byo emubuujile ne kwibyubila monkatu mo emukambizhizhe, 19 Yehoba wa mabumba, Lesa wa Isalela waamba’mba: “Mu kisemi kya kwa Yehonadaba* mwana wa kwa Lekaba, kechi mukabula muntu nangwa umo wa kuñingijila ne.”’”