Mitonyi

15 Byo papichile kimye, mu moba a kunowenamo wichi, Samisonyi wayile na kupempula mukazhanji, wasendele ne mwana mbuzhi. Waambile’mba: “Mbena kukeba kutwela muji mukazhami, konka ku mwanya.”* Bino bashanji wa mukazhi bamukainye kutwelamo. 2 Bashanji wa mukazhi bamwambijile’mba: “Amiwa nalangulukile namba, ‘Kampe wamushikwa.’+ Onkao mambo, namupaine ku kabala wobe.+ Nanchi nkasanji kechi walamba kukila aye nenyi? Musongole apingakene pa kolojanji.” 3 Pano bino, Samisonyi wibambijile’mba: “Kino kimye bena Filishitiya kechi basakumpamo mambo na mambo a kwiboba byatama ne.”

4 Onkao mambo, Samisonyi wayile ne kukakwata balubwala 300. Kepo ashikwile masoko a mujilo ne kuvundamika balubwala amba mikila italañane kabiji wakashijile nsoko imo ya mujilo pakachi ka mikila ibiji. 5 Kabiji waambwile masoko a mujilo ne kuleka balubwala kuya mu majimi mwajinga kajo kaimana ka bena Filishitiya. Wasokele bintu byonse kutendekelatu ku bikuta bya kajo kufika ne ku kajo kaimana, kubikakotu ne majimi a miñanzañanza ne bichi bya maolivi.

6 Bena Filishitiya bashikishe’mba: “Ñanyi wauba kino kintu?” Bebabuujile’mba: “Samisonyi, muko wa mwina Timina, mambo wamwangachile mukazhi ne kumupana ku kabala wanji.”+ Ponkapo bena Filishitiya bayile ne kumusoka mu mujilo awa mwanamukazhi pamo ne bashanji.+ 7 Kepo Samisonyi ebambijile’mba: “Inge bino byo byo mwauba, kechi nsakwikileka ne, poso nkashinkanye nenu.”+ 8 Kabiji wibatapilenga umo umo,* wibepayile bavula, kabiji wayile ne kukekala mu jiyengo* ja mu jibwe jikatampe ja Etama.

9 Bena Filishitiya baishile ne kutebelela mu Yuda kabiji bapitañenenga mu Lehi.+ 10 Kepo banabalume bena Yuda bashikishe’mba: “Mambo ka o mwaishila na kulwa ne atweba?” Bakumbwile’mba: “Twaiya na kukwata* Samisonyi, ne kumuba byonka byo etubile.” 11 Onkao mambo, banabalume bena Yuda 3,000 bayile ku jiyengo* ja jibwe jikatampe ja Etama ne kumushikisha Samisonyi amba: “Nanchi kechi wayuka’mba bena Filishitiya bo babena kwitulama nenyi?+ Pano mambo ka o witubila kino kintu?” Aye wibakumbwile’mba: “Byonka byo bangubile, ne amiwa byo byo nebobile.” 12 Bino abo bamwambijile’mba: “Twaiya na kukukwata* ne kukupana ku bena Filishitiya.” Kepo Samisonyi ebambijile’mba: “Chipai kwi amiwa amba kechi musakunguba kintu kyatama ne.” 13 Abo bamwambijile’mba: “Ine, atweba tusakukukasatu ne kukupana kwi abo, bino kechi tusakukwipaya ne.”

Byonkabyo, bamukashile na mizhinge ibiji ya katataka ne kumufumya ku jibwe jikatampe. 14 Byo afikile ku Lehi, bena Filishitiya babijikile na lusekelo pa kumusambakana. Kepo mupashi wa Yehoba amulengejile kwikala na bulume,+ ne mizhinge yo bakashile ku mikoko yanji yaikele nobe tonge wa linenyi wapya na mujilo, kabiji minyololo yalakachileko ku maboko anji.+ 15 Kabiji wamwene mubanga wa katataka wa mbongolo mulume; watanyikile kuboko kwanji ne kumutola, ne kwipayilako banabalume 1,000.+ 16 Kepo Samisonyi aambile’mba:

“Naipaya balwanyi na mubanga wa mbongolo ne kwibalumbika milumba!

Naipaya banabalume 1,000 na mubanga wa mbongolo.”+

17 Byo apwishishe kwamba, wamutayile mubanga ne kutela yoya mpunzha amba Lamata-lehi.*+ 18 Kabiji wafwile kilaka ne kumujijila Yehoba ne kwamba’mba: “Yenu mwapana luno lupulukilo lukatampe mu kuboko kwa kalume wenu. Pano nanchi mfwe na kilaka ne kuponena mu maboko a bantu babula kuya ku mukanda nyi?” 19 Onkao mambo, Lesa wasabile panekuka mu Lehi ne mema apokomokole.+ Byo atomene, mupashi* wanji wabwelelemo kabiji wakosele. O ene mambo o atelejile yoya mpunzha amba Eni-hakola,* iji mu Lehi ne lelo jino.

20 Kabiji wachibijilenga mambo bena Isalela pa myaka 20 mu moba a bena Filishitiya.+