Kubala
9 Mu ñondo mutanshi+ wa mu mwaka wa bubiji kufuma po bafumijile mu kyalo kya Ijipita, Yehoba waambijile Mosesa mu kiselebwa kya Sinai amba: 2 “Bena Isalela bakanengezhe nyama wa Kijiilo kya Lupitailo+ pa kimye kyakyo kyatongolwa.+ 3 Pa juba ja bu 14 ja uno ñondo, na kimye kya muntuwa muntuwa,* ukekinengezhe pa kimye kyakyo kyatongolwa. Ukekinengezhezhe monka mwayila malamuna akyo onse ne mashinda akyo onse.”+
4 Byonkabyo, Mosesa wabuujile bena Isalela kunengezha nyama wa Kijiilo kya Lupitailo. 5 Ne abo banengezhezhe nyama wa Kijiilo kya Lupitailo mu ñondo mutanshi pa juba ja bu 14 ja ñondo kimye kya muntuwa muntuwa* monka mu kiselebwa kya Sinai. Bena Isalela baubile bintu byonse Yehoba byo akambizhe Mosesa.
6 Kwajinga banabalume bezhilulwile na mambo a kukwata pa muntu* wafwa,+ kya kuba kechi bakonsheshe kunengezha nyama wa Kijiilo kya Lupitailo pa joja juba ne. Onkao mambo, bano banabalume bayile kwi Mosesa ne Alona pa jonkaja juba+ 7 ne kumwambila’mba: “Twizhilulula na mambo a kukwata pa muntu* wafwa. Mambo ka a kwitukainya kulambula mulambo kwi Yehoba mu bena Isalela pa kimye kyanji kyatongolwa?”+ 8 Ponkapo Mosesa wibambijile’mba: “Akipembelelai ponkapo, nkyumvwe Yehoba byo asakunkambizha pe anweba.”+
9 Kepo Yehoba aambijile Mosesa amba: 10 “Buula bena Isalela amba, ‘Umvwe muntu mwi anweba nangwa wa mu bisemi byenu bikeya kulutwe wizhilulula na mambo a kukwata pa muntu* wafwa+ nangwa uji pa lwendo lwalepa, naye wafwainwa kunengezha nyama wa Kijiilo kya Lupitailo kwi Yehoba. 11 Bafwainwa kumunengezha mu ñondo wa bubiji+ pa juba ja bu 14, kimye kya muntuwa muntuwa.* Bakamujiile pamo na bashinkwa babula mbizho ne na bishu byalula.+ 12 Kechi bakashepo nyama kufika lukelo ne,+ kabiji kechi bakachimune kikupa nangwa kimo ne.+ Bakamunengezhezhe monka mwayila malamuna a Kijiilo kya Lupitailo. 13 Bino umvwe muntu kechi wizhilulwile nangwa kechi uji pa lwendo ne, kabiji wabula kunengezha nyama wa Kijiilo kya Lupitailo, awo muntu* bafwainwa kumuchibako* ku balongo banji,+ mambo kechi walambula mulambo kwi Yehoba pa kimye kyanji kyatongolwa ne. Awo muntu bakamutwika bubi bwanji.
14 “‘Muntu wafuma ku kyalo kingi ye mwikala nanji naye wafwainwa kunengezha nyama wa Kijiilo kya Lupitailo kwi Yehoba.+ Wafwainwa kumunengezha monka mwayila malamuna a Kijiilo kya Lupitailo ne mashinda akyo.+ Kukekalatu jilamuna jimo jikengilanga ku muntu wafuma ku kyalo kingi ne ku mwina kyalo.’”+
15 Pa juba jo bafiikile tente wa lusambakeno,+ jikumbi javwetele peulu ya tente wa lusambakeno, ko kuba’mba tente wa Lushimuno. Pakuba mu kimye kya mabanga jikumbi ja mujilo jaikele peulu ya tente wa lusambakeno kufikatu ne lukelo.+ 16 Abino byo byo kyaikalanga: Mu kimye kya mute jikumbi javwetangapo kabiji mu kimye kya bufuku jamwekanga nobe mujilo.+ 17 Inge jikumbi jafuma pa tente, bena Isalela baimananga lwendo.+ Kabiji ponse pa mpunzha paimananga jikumbi, bena Isalela po po bapopelanga matente abo.+ 18 Bena Isalela baimananga lwendo umvwe Yehoba wibakambizha, kabiji bapopanga matente abo umvwe Yehoba wibakambizha.+ Inge jikumbi jabula kufumapo pa tente wa lusambakeno, ne abo kechi bapopololanga matente abo ne. 19 Kabiji inge jikumbi jaikala pa tente wa lusambakeno pa moba avula, bena Isalela bakookelanga Yehoba kabiji kechi baimananga lwendo ne.+ 20 Bimye bimo jikumbi jaikalanga pa tente wa lusambakeno moba achechetu. Umvwe Yehoba wibakambizha, baikalanga mu kampu, kabiji umvwe Yehoba wibakambizha baimananga lwendo. 21 Bimye bimo jikumbi jaikalangatu pa tente kufuma mabanga kufika lukelo, kabiji inge jikumbi jafumapo kimye kya lukelo ne abo baimananga lwendo. Umvwe jikumbi jafumapo kimye kya mute nangwa bufuku, ne abo baimananga lwendo.+ 22 Umvwe jikumbi jaikala pa tente wa lusambakeno moba abiji, ñondo umo nangwa kukilapo, bena Isalela nabo baikalanga mu kampu kabiji kechi baimananga lwendo ne. Inge jikumbi jafumapo, ne abo baimananga lwendo. 23 Baikalanga mu kampu umvwe Yehoba wibakambizha, kabiji umvwe Yehoba wibakambizha, baimananga lwendo. Bakookejilenga mukambizho wa Yehoba byonkatu Yehoba byo akambizhe Mosesa.