Buku Mutanshi wa Bamfumu

22 Pa myaka isatu kechi pajingapo nkondo pakachi ka bena Silya ne bena Isalela ne. 2 Mu mwaka wa busatu Yehoshafwata+ Mfumu wa Yuda wayile ku mfumu wa Isalela.+ 3 Kepo mfumu wa Isalela aambijile bakalume banji amba: “Nanchi mwayuka’mba Lamota-gileada+ muzhi wetu nyi? Pano bino tubena kukankazhama kumutambula ku mfumu wa Silya.” 4 Kabiji waipwizhe Yehoshafwata amba: “Nanchi musakuya ne amiwa na kulwa na bena Lamota-gileada nyi?” Yehoshafwata wakumbwile mfumu wa Isalela amba: “Amiwa ne anweba twi umo. Bantu bami ne bantu benu bo bamo. Bambili bami ne bambili benu bo bamo.”+

5 Bino Yehoshafwata waambijile mfumu wa Isalela amba: “Patanshi, mwipuzhai Yehoba.”+ 6 Byonkabyo mfumu wa Isalela wakonkenye pamo bangauzhi nobe 400, ne kwibepuzha’mba: “Nanchi ngye na kulwa na bena Lamota-gileada nyi, inyi ngikaletu?” Abo bamukumbwile’mba: “Yainga, kabiji Yehoba usakupana uno muzhi mu kuboko kwenu anweba mfumu.”

7 Kepo Yehoshafwata aambile’mba: “Nanchi kuno kafwako ngauzhi mukwabo wa Yehoba nyi? Twayai naye tumwipuzhe.”+ 8 Ponkapo mfumu wa Isalela waambijile Yehoshafwata amba: “Kuji muntu umo wakonsha kwitwipwizhako kwi Yehoba;+ bino namushikwa,+ mambo kechi waula bintu byawama pe amiwa ne, waulatu byatama.+ Jizhina janji Mikaya mwana wa kwa Imula.” Nangwa byonkabyo, Yehoshafwata waambile’mba: “Anweba mfumu kechi mwafwainwa kwamba byo byo ne.”

9 Onkao mambo, mfumu wa Isalela waichile kapaso ne kumwambila’mba: “Pelawizha yanga ukamulete Mikaya mwana wa kwa Imula.”+ 10 Kabiji mfumu wa Isalela ne Yehoshafwata mfumu wa Yuda bonse baikele au pa jitanda janji au pa jitanda janji, saka bavwala bivwalo bya bufumu, konka ku kipujilo kyajinga ku kibelo kya muzhi wa Samaliya, ne bangauzhi bonse baawilenga kwi abo.+ 11 Kabiji Zedekiya mwana wa kwa Kenaana walengele nsengo ya kyela kya kapotwe ne kwamba’mba: “Yehoba waamba’mba, ‘Bena Silya ukebakozha* na ino nsengo kufikatu ne byo ukebavizha.’” 12 Ne bangauzhi bonse bakwabo baawilenga kintutu kimo amba: “Yainga ku Lamota-gileada kabiji mukebashinda; Yehoba ukapana uno muzhi mu kuboko kwa mfumu.”

13 Byonkabyo muluwe wayile na kwita Mikaya wamwambijile’mba: “Umvwa! Bangauzhi bonse baambatu bintu bimo byawama pa bamfumu. Pano byambo byo usakwamba bikale nobe byambo byabo, kabiji wambe byawama.”+ 14 Bino Mikaya waambile’mba: “Byonkatu Yehoba byo aji na bumi, byonse bisakumbuula Yehoba, byo byo nsakwamba.” 15 Kepo Mikaya aishile kwi mfumu, kabiji mfumu wamwipwizhe’mba: “Mikaya, nanchi tuye na kulwa na bena Lamota-gileada nyi, inyi twikaletu?” Ponkapo wakumbwile’mba: “Yainga kabiji musakwibashinda; Yehoba usakupana uno muzhi mu kuboko kwenu anweba mfumu.” 16 Kepo mfumu amwambijile’mba: “Bimye binga byo nsakukuchipisha pa kuba’mba umbuule bintu byonse bya kine mu jizhina ja Yehoba?” 17 Ponkapo aye waambile’mba: “Namona bena Isalela bonse bapalañenamo pa mitumba,+ nobe mikooko yabula kafunga. Yehoba waji kwamba’mba: ‘Bano kechi baji na nkambo yabo ne. Muntu yense abwele ku nzubo yanji mu mutende.’”

18 Kepo mfumu wa Isalela aambijile Yehoshafwata amba: “Nanchi kechi naji kwimubuula namba, ‘Kechi usakwaula bintu byawama pe amiwa ne, usakwaulatu byatama’ nenyi?”+

19 Ponkapo Mikaya waambile’mba: “Pano umvwai byambo bya Yehoba: Naji kumona Yehoba saka aikala pa jitanda janji+ ne jibumba jonse ja mwiulu saka jaimana kwi aye, ku kilujo kyanji ne ku kipiko kyanji.+ 20 Kabiji Yehoba waji kwamba’mba, ‘Ñanyi usakuya na kujimbaika Ahaba, pa kuba’mba aye na kufwila ku Lamota-gileada?’ Umo waji kwamba kintu kimo mukwabo naye waji kwamba kintu kikwabo. 21 Kabiji malaika+ umo waji kwiya kulutwe ne kwimana kwi Yehoba ne kwamba’mba, ‘Amiwa nsakumujimbaika.’ Yehoba waji kumwipuzha’mba, ‘Usakumujimbaika byepi?’ 22 Aye waji kukumbula’mba, ‘Nsakuya na kubika byambo bya bubela mu tunwa twa bangauzhi banji bonse.’+ Ne aye waji kumwambila’mba, ‘Yanga ukamujimbaike, kabiji kine usakumujimbaika. Yanga ukobe byonkabyo.’ 23 Yehoba wabika byambo bya bubela mu tunwa twa bano bangauzhi benu bonse,+ pakuba Yehoba wimutongwela bya malwa.”+

24 Kepo Zedekiya mwana wa kwa Kenaana afwenyenye kwipi ne kumwimba lupi Mikaya ku jibuta ne kumwambila’mba: “Nanchi ubena kwamba’mba mupashi wa Yehoba waji kufuma mwi amiwa ne kwiya na kwamba ne obewa nyi?”+ 25 Mikaya wamukumbwile’mba: “Umvwa! Ukayuka kino pa juba jo ukatwela na kufyama mu kibamba kya mwine mukachi.” 26 Kepo mfumu wa Isalela aambile’mba: “Musendai Mikaya mumutwale kwi Amonyi mukulumpe wa muzhi ne kwi Yoashi mwana mfumu. 27 Mwibabuule’mba, ‘Bamfumu baamba’mba: “Bikai uno muntu mu kaleya,+ kabiji mumupengatu kajo kacheche ne mema acheche kufikatu ne byo nkabwela mu mutende.”’” 28 Bino Mikaya waambile’mba: “Inge mukabwele mu mutende, ko kuba’mba Yehoba kechi waamba kupichila mwi amiwa ne.”+ Kepo anungilepo’mba: “Anweba bantu bonse, yukai kino.”

29 Byonkabyo, mfumu wa Isalela ne Yehoshafwata mfumu wa Yuda bayile ku Lamota-gileada.+ 30 Kepo mfumu wa Isalela aambijile Yehoshafwata amba: “Amiwa nsakwialula ne kuya na kulwa nkondo, pakuba anweba muvwale bivwalo byenu bya bufumu.” Byonkabyo, mfumu wa Isalela wialwile amba babule kumuyuka+ kabiji wayile na kulwa nkondo. 31 Bino mfumu wa Silya wakambizhe bakulumpe ba bashilikale banji 32 benda pa makalaki amba:+ “Kange mulwe na muntu nangwa umo, mwanyike nangwa mukulumpe ne, kanatu na mfumu wa Isalela.” 32 Bakulumpe ba bashilikale benda pa makalaki byo bamwenetu Yehoshafwata, baambile mu michima yabo amba: “Kine uno ye mfumu wa Isalela.” Onkao mambo, baalulukile ne kuya na kulwa nanji; kabiji Yehoshafwata watendekele kutama muteto amba bamukwashe. 33 Bakulumpe ba bashilikale benda pa makalaki byo bamwene’mba kechi ye mfumu wa Isalela ne, ponkapo balekele kumupangisha.

34 Bino mwanamulume umo watayile muketo na buta bwanji bwa mukanda kya kusopelelatu,* ne kwasa mfumu wa Isalela panungakenejile kivwalo kyanji kya kyela. Onkao mambo, mfumu waambijile waendeshenga kalaki wanji amba: “Aluluka umfumye mu nkondo,* mambo bankozha bingi.”+ 35 Kabiji aja juba jonse nkondo yakosele bingi, ne mfumu bamwimikiletu mu kalaki saka atala kwajinga bena Silya. Mashi afuminenga pa kilonda azunzulukijilenga mukachi mu kalaki, kabiji wafwile mabanga.+ 36 Pa kuzhika juba bapishishemo mu kampu mbila ya kuba’mba: “Muntu yense abwele ku muzhi wanji! Muntu yense abwele ku kyalo kyanji!”+ 37 Byonkabyo, mfumu wafwile, kabiji bamuletele ku Samaliya; bazhiikile mfumu mu Samaliya. 38 Kalaki byo bamovwele ku kizhiba kya mu Samaliya, bakabwa bamyangile mashi anji ne bapite baowejile konkakwa,* monka mwayijile byambo byaambile Yehoba.+

39 Bintu bikwabo byapichilemo Ahaba, ne bintu byonse byo aubile ne nzubo* yo ashimikile na meno a banzovu+ ne mizhi yonse yo ashimikile, nanchi kechi byanembwa mu buku wa bintu byapichilengamo bamfumu ba mu Isalela nenyi? 40 Kepo Ahaba bamutwajile na kulaala kwalaala bashakulu banji;+ kabiji mwananji aye Ahaziya+ wamuswaine pa bufumu.

41 Yehoshafwata+ mwana wa kwa Asa waikele mfumu wa Yuda mu mwaka wa buna wa bukalama bwa kwa Ahaba Mfumu wa Isalela. 42 Yehoshafwata wajinga na myaka ya kusemwa 35 kimye kyo aikele mfumu, kabiji walamine mu Yelusalema myaka 25. Inanji wajinga Azuba mwana wa kwa Shilihi. 43 Waendelenga mu mashinda onse a shanji aye Asa.+ Kechi wafuminemo ne, kabiji waubilenga byaoloka kwi Yehoba.+ Pano bino, mapunzha atuntama kechi beonawine ne, kabiji bantu batapishenga bitapisho ne kusoka bya kufutumuna pa mapunzha atuntama.+ 44 Yehoshafwata waumvwañananga na mfumu wa Isalela.+ 45 Bintu bikwabo byapichilemo Yehoshafwata, mingilo yanji ikatampe ne byo alwile makondo, nanchi kechi byanembwa mu buku wa bintu byapichilengamo bamfumu ba mu Yuda nenyi? 46 Kabiji mu kyalo wafumishemo banabalume belaalanga na banabalume bakwabo ku nzubo ya Lesa+ bonka bashajilemo mu moba a shanji aye Asa.+

47 Kabiji mu Edomu kechi mwajinga mfumu ne;+ wa kibiji ye walaminenga nobe mfumu.+

48 Kabiji Yehoshafwata watumine maato* a ku Tashishi kuya ku Ofila na kusenda ngolode,+ bino kechi ayile ne, mambo aonaikijile ku Eziona-gebela.+ 49 Kyo kimye Ahaziya mwana wa kwa Ahaba kyo aambijile Yehoshafwata amba: “Swishai bakalume bami baye na bakalume benu mu maato,” pakuba Yehoshafwata wakaine.

50 Kepo Yehoshafwata bamutwajile na kulaala kwalaala bashakulu banji+ ne kumuzhiika ko bazhiikile bashakulu banji mu Muzhi wa Davida mushakulu wanji; kabiji mwananji aye Yeholama+ waswaine pa bufumu.

51 Ahaziya+ mwana wa kwa Ahaba waikele mfumu wa Isalela mu Samaliya mu mwaka wa bu 17 wa bukalama bwa kwa Yehoshafwata Mfumu wa Yuda, kabiji walamine mu Isalela myaka ibiji. 52 Kabiji waubilenga bintu byatama ku meso a Yehoba ne kwenda mu jishinda ja bashanji+ ne bainanji+ ne mu jishinda ja kwa Yeloboma mwana wa kwa Nebati, yenka walengejile bena Isalela kuba bubi.+ 53 Watwajijile kwingijila Baela+ ne kumufukamina, kabiji wamufichishenga ku muchima Yehoba Lesa wa Isalela,+ byonkatu byaubanga shanji.