Buku wa Bubiji wa Bamfumu

3 Yeholama+ mwana wa kwa Ahaba waikele mfumu wa Isalela mu Samaliya mu mwaka wa bu 18 wa bukalama bwa kwa Yehoshafwata Mfumu wa Yuda, kabiji myaka 12 yo alamine. 2 Waubilenga byatama ku meso a Yehoba, bino kechi byonka byaubanga bashanji nangwa bainanji ne, mambo aye wafumishemo jishiki jazhila ja kwa Baela jalengele bashanji.+ 3 Nangwa byonkabyo, wakakachijile ku bubi bonka Yeloboma mwana wa kwa Nebati bo alengejile bena Isalela kuba.+ Kechi wibulekele ne.

4 Mesha mfumu wa Moabu walamanga mikooko, kabiji wapananga baana ba mikooko 100,000 ne mikooko ilume yo babula kutenda boya 100,000 kwikala mulambo wa kupana kwi mfumu wa Isalela. 5 Ahaba byo afwiletu,+ mfumu wa Moabu wasatukijile mfumu wa Isalela.+ 6 Onkao mambo, pa kyonkakya kimye Mfumu Yeholama wafumine mu Samaliya ne kukonkanya bena Isalela bonse. 7 Kabiji watumine ne mawi kwi Yehoshafwata Mfumu wa Yuda amba: “Mfumu wa Moabu wansatukila. Nanchi musakuya ne amiwa na kulwa na bena Moabu nyi?” Aye waambile’mba: “Nsakuya.+ Amiwa ne anweba twi umo. Bantu bami ne bantu benu bo bamo. Bambili bami ne bambili benu bo bamo.”+ 8 Kabiji waipwizhe’mba: “Tusakupita jepi?” Aye wakumbwile’mba: “Tusakupita mu jishinda ja mu kiselebwa kya Edomu.”

9 Kepo mfumu wa Isalela aimene ne kuya pamo na mfumu wa Yuda ne mfumu wa Edomu.+ Byo baendele lwendo lwa kuzhoka pa moba atanu na abiji, kechi kwajinga mema a kutoma bashilikale ne banyama ba kulela bebalondejilenga ne. 10 Mfumu wa bena Isalela waambile’mba: “Kyatama bingi! Yehoba waita bano bamfumu basatu kuba’mba ebapane mu maboko a bena Moabu!” 11 Ponkapo Yehoshafwata waipwizhe’mba: “Nanchi kuno kechi kujipo ngauzhi wa Yehoba wakonsha kwitwipwizhako kwi Yehoba nenyi?”+ Kepo kalume umo wa mfumu wa Isalela akumbwile’mba: “Ko aji Elisha+ mwana wa kwa Shafwata, yenka waichilanga mema ku maboko a kwa Elaija* pa kowako.”+ 12 Ponkapo Yehoshafwata waambile’mba: “Yehoba wambila mwi aye.” Onkao mambo, mfumu wa Isalela ne Yehoshafwata ne mfumu wa Edomu bayile kwi aye.

13 Elisha waambijile mfumu wa Isalela amba: “Ñanyi kintu kyo nafwainwa kwimubila anweba?*+ Yainga ku bangauzhi ba bashenu ne bangauzhi ba bainenu.”+ Bino mfumu wa Isalela wamwambijile’mba: “Ine, mambo Yehoba waita bano bamfumu basatu kuba’mba ebapane mu maboko a bena Moabu.” 14 Ponkapo Elisha waambile’mba: “Byonkatu Yehoba wa mabumba byo aji na bumi, yenka ye ñingijila,* inge kechi na mambo a kunemeka Yehoshafwata Mfumu+ wa Yuda ne, inge kechi naji kwimutala nangwa kwimuta muchima ne.+ 15 Pano ndetelai muntu wimba kyansa.”* Wimba+ kyansa byo atendekeletu kwimba, bulume bwa Yehoba bwaishile pe aye.+ 16 Aye waambile’mba, “Yehoba waamba’mba: ‘Poyai bimbo mu kino kimpachiko,* 17 mambo Yehoba waamba’mba: “Kechi mukamona mwela ne, kabiji kechi mukamona mvula ne; bino kino kimpachiko* kikayula mema+ ne anweba mukatoma monka, anweba ne bilelwa byenu ne banyama benu bakwabo.”’ 18 Kino kyo kintu kicheche kwi Yehoba,+ mambo aye ukapana bena Moabu mu maboko enu.+ 19 Mwafwainwa kutapa mizhi yonse iji na masakwa akosa+ ne mizhi yonse yawama, kabiji mwafwainwa kutema bichi byonse byawama, ne kushinka masulo onse a mema, kabiji mwafwainwa konauna na mabwe mapunzha onse awama.”+

20 Kabiji lukelo, pa kimye kyo balambwilapo mulambo wa kajo wa lukelo,+ ponkapotu mema afumijile ku Edomu ne musanza wayujile mema.

21 Bena Moabu bonse baumvwine’mba bamfumu baiya na kulwa nabo, onkao mambo, bakonkenye pamo banabalume bonse bavwajile bivwalo bya nkondo,* ne kukemana ku mupaka. 22 Byo babuukile lukelokelo, juba jasamijile pa mema, kabiji ku bushiya kwajinga bena Moabu, mema amwekelenga kuchila nobe mashi. 23 Abo baambile’mba: “Aa ke mashi! Kine bamfumu bonse beipaya mulwabo na mpoko. Pano anweba bena Moabu, nyemenai pa bipukulwa!”+ 24 Byo baishile mu kampu wa bena Isalela, bena Isalela baimene ne kutendeka kutapa bena Moabu, ne abo banyemene.+ Bayile mu Moabu saka batapa bena Moabu byo banyemenenga. 25 Bakundawile mizhi, kabiji muntu yense watayile mabwe mu mapunzha onse awama ne kwiayuzha na mabwe; bashinkile masulo onse a mema,+ ne kutema bichi byonse byawama.+ Nsakwa ya mabwe ya Kila-haleseta+ yo yonkatu yashajile saka yaimana, kabiji bataya mabwe na binzhipunzhipu bamuzhokolokele muzhi ne kumonauna.

26 Mfumu wa bena Moabu byo amwene’mba bamushinda kala, wasendele banabalume 700 bajinga na mapoko kuba’mba apite pakachi ne kuya kwi mfumu wa Edomu;+ bino bakankelwe. 27 Onkao mambo, washikwile mwananji wa mulume mubeji wafwainwe kuswana pa bufumu ne kumulambula pa nsakwa ke mulambo wa kusoka.+ Kabiji bebazhingijile bingi bena Isalela, onkao mambo, bafumineko kwi aye ne kubwela ku kyalo kyabo.