Nkalata ya Bubiji ku Bena Kolinda
13 Kino kyo kimye kya busatu kyo mbena kwiya kwi anweba. “Na byambo* bya bakamonyi babiji nangwa basatu mambo onse mo mo alumbulukila.”+ 2 Nangwa kya kuba mfwako, kiji nobe nji konka kimye kya bubiji, kabiji najimunako jibiji boba balengele mambo kala ne bonse bashala, kuba’mba inge nkeye jikwabo kechi nkebaleka ne, 3 mambo mubena kukeba kishiino kya kuba’mba Kilishitu, wabula kukooka kwi anweba bino wakosa mwi anweba, kine ye ubena kwamba kupichila mwi amiwa. 4 Kine bamwipayijile pa kichi na mambo a kubula kukosa, bino ke mumi na mambo a bulume bwa Lesa.+ Ibyo kuba’mba ne atweba twakooka byonka byo akookele, bino tukekala bomi pamo ne aye+ mu bulume bwa Lesa bubena kwingila mwi anweba.+
5 Iesekainga anwe bene pa kuba’mba muyuke kana mukiji monka mu lwitabilo nangwa ne; ipimainga anwe bene kuba’mba mwiyuke byo muji.+ Nanchi kechi mwayuka’mba Yesu Kilishitu uji mwi anweba nenyi? Kanatu inge bemukana. 6 Naketekela mukayuka’mba kechi betukana ne.
7 Tubena kulomba kwi Lesa namba mubule kuba kintu kyatama, kechi amba betumonenga’mba twaitabilwa ne, bino kuba’mba mubenga kyawama, nangwa kya kuba twakonsha kumweka nobe betukana. 8 Mambo atweba kechi twakonsha kukanya bukine ne, poso kwibulondela bukine. 9 Tusekela bingi kimye kyonse umvwe twakooka, bino anweba saka muji na bulume. Kabiji kino kyo kyo tubena kulomba’mba mupimpule milanguluko yenu. 10 O ene mambo o nanembela bino bintu byo nji kungi, pa kuba’mba byo nkeya nkabule kwimushintaukila pa kwingijisha luusa lo ampele Nkambo,+ lwa kwimukomesha kechi lwa kwimutozha ne.
11 Kyapelako balongo bami, sekelainga, pimpulainga milanguluko yenu, swainga kwimutekenesha,+ langulukilainga mumo,+ ikalainga mu mutende;+ kabiji Lesa wa butemwe kabiji wa mutende+ ukekala ne anweba. 12 Iimunai mu lwenu na kwifyompa kwazhila. 13 Bonse bazhijikwa bemwimuna.
14 Lusa lukatampe lwa Nkambo Yesu Kilishitu, butemwe bwa Lesa ne mupashi wazhila ye mubena kumwenamo byawama, bikale pe anweba bonse.