Buku wa Bubiji wa Samwela
1 Saulo byo afwile, ne Davida byo abwelele kufuma ko ayile na kushinda* bena Amaleki, waikele mu Zikilagi+ pa moba abiji. 2 Pa juba ja busatu, kwaishile muntu wafumine ku nzhita ya kwa Saulo ne bivwalo byanji saka byatabauka ne maloba ku mutwe. Byo afikile kwi Davida, waponejile panshi ne kulaala kinkuvumene.
3 Davida wamwipwizhe’mba: “Wafuma kwepi?” Ne aye wakumbwile’mba: “Napuluka ku nzhita ya bena Isalela.” 4 Davida wamwipwizhe’mba: “Kyajinga byepi? Mbuuleko.” Kepo aambile’mba: “Bantu banyemako ku nkondo, bavula bafwa balaalazhamatu. Kabiji Saulo ne Yonafwanyi mwananji nabo bafwa.”+ 5 Kepo Davida aipwizhe uno nsongwalume waletele sawakya amba: “Wayuka byepi amba Saulo ne Yonafwanyi mwananji bafwa?” 6 Uno nsongwalume wakumbwile’mba: “Byo najinga pa Mutumba wa Giliboa+ ponkapotu namwene Saulo saka ashakamina ku jifumo janji, kabiji makalaki ne bantu benda pa bambili bamutaaine.+ 7 Byo aalulukile ne kummona, wangichile, ne amiwa naitabile namba, ‘Amiwa bano!’ 8 Wangipwizhe’mba, ‘Yobe ñanyi?’ Namukumbwile namba, ‘Nemwina Amaleki.’+ 9 Kepo aambile’mba, ‘Napopwela iya ungipaye, mambo nji mu misongo ikatampe, bino nkiji mumi.’* 10 Onkao mambo, nayile po ajinga kabiji namwipayile,+ mambo byo aponejile panshi saka bamukozha, nayukile namba kechi usakupuluka ne. Kepo nashikwile munchinya* wajinga ku mutwe wanji ne jikosa jajinga ku mukoko wanji, byo bino byo naleta kwi anweba nkambo.”
11 Ponkapo Davida watabwile bivwalo byanji, ne bantu banji bonse bo ajinga nabo baubile byonkabyo. 12 Kabiji bajijile mabingo ne kuzhikilwa na nzala+ kufikatu ne mabanga na mambo a kwa Saulo ne Yonafwanyi mwananji, ne na mambo a bantu ba Yehoba ne ba mu nzubo ya Isalela,+ mambo bebatapile na mpoko.
13 Davida washikishe nsongwalume wamuletejile sawakya amba: “Wafuma kwepi?” Aye wamukumbwile’mba: “Amiwa nemwana wa muntu wa ku kyalo kingi, mwina Amaleki.” 14 Kepo Davida amushikishe’mba: “Mambo ka o wabujile kuchina kutanyika kuboko kobe ne kwipaya mushingwa wa Yehoba?”+ 15 Kepo Davida aichile nsongwalume umo ne kumwambila’mba: “Iya umutape.” Ne aye wamutapile, ne kufwa wafwile.+ 16 Davida wamwambijile’mba: “Mashi obe akushinkamane, mambo kanwa kobe ko kakushiina byo waamba’mba, ‘Amiwa yami naipaya mushingwa wa Yehoba.’”+
17 Kepo Davida aimbile uno lwimbo wa bulanda* wa kujila Saulo ne Yonafwanyi mwananji+ 18 ne kwamba’mba bena Yuda bafwainwa kwibafunjisha lwimbo wa bulanda utelwa’mba “Buta bwa Mukanda,” wanembwa mu buku wa Yashala:+
19 “Anweba bena Isalela, bantu balamba balaala saka bafwa pa mapunzha enu atuntama.+
Babilobo byo balaala saka bafwa!
20 Kange mwambe pa kino mu Gata ne;+
Kange mubijike kino mu mikwakwa ya ku Ashekelona ne,
Inge ne, banabakazhi bena Filishitiya bakasangalala,
Inge ne, banabakazhi basemwa ku boba babula kuya ku mukanda bakasekela.
21 Anweba mitumba ya Giliboa,+
Pe anweba kange panokele kime nangwa mvula,
Nangwa mu majimi mufuma bupe bwazhila ne,+
Mambo akwa ko ko bazhilulwijile jikebo ja babilobo,
Jikebo ja kwa Saulo jaleka kwikala jashingwa manyi.
22 Buta bwa mukanda bwa kwa Yonafwanyi kechi bwabwelangatu
Kwa kubula kwichila mashi a bantu bo baipaya,+ ne mafuta a babiyangala ne,
Kabiji mpoko ya kwa Saulo kechi yabwelangatu kwa kubula kushinda ne.+
23 Saulo ne Yonafwanyi,+ bajinga na butemwe kabiji bawamine michima mu bwikalo bwabo,
Ne pa kufwa kechi baabene ne.+
24 Anweba banabakazhi bena Isalela, mujilai Saulo,
Yenka wimuvwikanga bivwalo byachijisha kabiji byawamisha,
Yenka wabikilepo bintu byawama bya ngolode pa bivwalo byenu.
25 Babilobo byo balaala saka bafwa mu nkondo!
Yonafwanyi walaala saka afwa pa mapunzha enu atuntama!+
26 Nji bingi na bulanda na mambo a obewa mulongo wami Yonafwanyi;
Nakutemenwe bingi.+
Butemwe bo wantemenwe bwakijile butemwe bwa banabakazhi.+
27 Babilobo byo balaala saka bafwa
Ne bilwilo bya nkondo byazhiya!”