Yoba

1 Kwajinga muntu waikalanga mu kyalo kya Uze, jizhina janji wajinga Yoba.*+ Wajinga muntu waoloka kabiji wa kishinka;*+ waakamwanga Lesa kabiji washikilwe bintu byatama.+ 2 Wasemene baana ba balume batanu na babiji ne baana ba bakazhi basatu. 3 Wajinga na mikooko 7,000, bangamela 3,000, bañombe* 1,000 ne bambongolo* 500, kabiji wajinga ne na bakalume bavula bingi, kya kuba wanonkele bingi kukila bantu bonse ba ku Musela.

4 Baana banji ba balume bonse baikalanga na bijiilo mu mazubo abo, au pa juba jo asajile, au pa juba jo asajile. Baitangako ne banyenga yabo basatu kwiya na kuja ne kutoma nabo. 5 Umvwe moba a bijiilo byonse apwa, Yoba wibetanga kuba’mba ebazhijike. Kabiji wabuukanga lukelokelo na kulambwilako baana banji bonse bitapisho bya kusoka.+ Mambo Yoba waambile’mba: “Kampe baana bami balenga mambo ne kunena Lesa mu michima yabo.” Abino byo byaubanga Yoba kimye kyonse.+

6 Kabiji kwajinga juba baana ba Lesa*+ wa kine jo baishile na kwimana kwi Yehoba,+ ne Satana+ naye waishile na kwimana pamo nabo.+

7 Kepo Yehoba ashikishe Satana amba: “Wafuma kwepi?” Satana wakumbwile Yehoba amba: “Nafuma na kupitañana pa ntanda ne kwendaukapo ponse.”+ 8 Kabiji Yehoba washikishe Satana amba: “Nanchi wamumonapo* kalume wami aye Yoba nyi? Pa ntanda kafwapo muntu waesakana pamo nanji ne. Aye ke muntu waoloka kabiji wa kishinka,*+ ungakamwa amiwa Lesa kabiji washikwa bintu byatama.” 9 Kepo Satana akumbwile Yehoba amba: “Nanchi Yoba wakamwa Lesa kyatutu nyi?+ 10 Nanchi anweba kechi mwamuzhokolosha na luvimba ne kumuzhikijila aye,+ nzubo yanji ne bintu byonse byo aji nabyo nenyi? Mwapesha mingilo ya maboko anji,+ kabiji bilelwa byanji byakumbana kyalo kyonse. 11 Bino umvwe mutanyike kuboko kwenu ne konauna bintu byonse byo aji nabyo, aye kine ukemwambila mwenga.” 12 Kepo Yehoba aambijile Satana amba: “Tala! Bintu byonse byo aji nabyo biji mu maboko* obe. Bino pe aye mwine kange ukwatepo ne!” Byonkabyo, Satana wafumineko kwi* Yehoba.+

13 Kabiji juba jimo baana banji ba balume ne ba bakazhi byo bajiilenga ne kutoma binyu mu nzubo ya kolojabo,+ 14 kwaishile muluwe na kubuula Yoba amba: “Bañombe byo bakujimanga ne bambongolo saka bajiila kwipi na bañombe 15 bena Saba baji kwibalukuka ne kwibasenda, kabiji baipaya bakalume benu na mpoko. Yami yenka napulukapo naiya na kwimubuula.”

16 Auno byo akyambilenga, mukwabo naye waishile ne kumubuula’mba: “Mujilo waji kufuma mwiulu kwi Lesa* ne kusokatu pelu mikooko ne bakalume benu! Yami yenka napulukapo naiya na kwimubuula.”

17 Auno byo akyambilenga, mukwabo naye waishile ne kumubuula’mba: “Bena Kalodeya+ bajinga bipanyi bisatu, baji kulukuka bangamela ne kwibasenda, kabiji baipaya bakalume benu na mpoko. Yami yenka napulukapo naiya na kwimubuula.”

18 Auno byo akyambilenga, mukwabo naye waishile ne kumubuula’mba: “Baana benu ba balume ne ba bakazhi baji kujanga ne kutoma binyu mu nzubo ya kolojabo. 19 Ponkapo mwela mukatampe waji kwiya kufuma mu kiselebwa ne kukundula makonka ana a nzubo, kya kuba yaji kuponena pa baana benu ne kwibepaya. Yami yenka napulukapo naiya na kwimubuula.”

20 Ponkapo Yoba waimene ne kutabula kivwalo kyanji ne kutenda nsuki ku mutwe wanji; kepo aponejile panshi ne kufukama 21 ne kwamba’mba:

Yehoba ye wampelebyo,+ kabiji Yehoba wañangatabyo.

Jizhina ja Yehoba jitwajijile kutotwa.”

22 Mu bino bintu byonse, Yoba kechi walengele mambo nangwa kupamo Lesa mambo a kuba bintu byatama* ne.