Ku Bahebelu
8 Kino kyo kishinka kine kikatampe kyo tubena kwambapo: Tuji na uno ñanga mukatampe,+ kabiji waikala ku kilujo kya jitanda ja Lesa mwiulu,+ 2 wa mwingilo* wingijila mwazhila+ ne mu tente wa kine, wapopele Yehoba* kechi bantu ne. 3 Mambo bañanga bakatampe bonse batongolwa kupana bya bupe ne bitapisho; onkao mambo kyafwainwe uno naye kwikala na kintu kya kulambula.+ 4 Umvwe wajinga pano pa ntanda, inge kechi waikele ñanga ne,+ mambo pobaji bantu balambula bya bupe monka mwayila Mizhilo. 5 Uno mwingilo wazhila ye babena kwingila bano bantu ke kifwanyikizho ne kimvule+ kya bintu biji mwiulu;+ byonkatu Mosesa byo ajinga pepi kufiika tente, bamukambizhe kwi Lesa amba: “Wafwainwa kulenga bintu byonse monka mwayila kimwesho kyo bakumwesheshe ku mutumba.”+ 6 Bino Yesu watambula mwingilo* wakilamo kunema, mambo ye ñambi+ wa lulayañano+ lwakilamo kuwama lwaikajikwa pa milaye yawamisha.+
7 Umvwe alwa lulayañano lutanshi lwajinga lwalumbuluka, inge kechi kwaikala lwa bubiji ne.+ 8 Mambo aye wibataana bantu na mambo, byo aamba’mba: “‘Umvwai! Moba abena kwiya,’ byo byaamba Yehoba,* ‘o nkalayañana lulayañano lupya na ba mu nzubo ya Isalela ne ba mu nzubo ya kwa Yuda. 9 Kechi lukekala nobe lulayañano lo nalayañene na bashakulu babo juba jo nebakwachile pa kuboko ne kwibafumya mu kyalo kya Ijipita ne,+ mambo bakankelwe kwikala ba kishinka ku lulayañano lwami, onkao mambo, nalekele kwibata muchima,’ byo byaamba Yehoba.”*
10 “‘Luno lo lulayañano lo nkalayañana na ba mu nzubo ya Isalela aa moba byo akapwa,’ byo byaamba Yehoba.* ‘Nkabika mizhilo mu milanguluko yabo ne kwiinemba mu michima yabo.+ Kabiji nkekala Lesa wabo, ne abo bakekala bantu bami.+
11 “‘Muntu kechi ukafunjishapo ngikazhi mukwabo nangwa mulongo wanji amba, “Yukai Yehoba!”* ne. Mambo bonse bakangyuka kufumatu ku mwanyike kufika ne ku mukulumpe. 12 Mambo nkebobila lusa pa mambo a byubilo byabo byabula koloka, kabiji mambo abo kechi nkeavulukapo jibiji ne.’”+
13 Byo aamba’mba “lulayañano lupya,” kibena kulumbulula’mba waalula lwa kala kwikala lwatutu.+ Luno lulayañano lwaaluka ke lwatutu kabiji lwa kala, luji pepi kuzhimañana.+