Ku Bahebelu
7 Mambo uno Melekizedeke mfumu wa Salema ñanga wa kwa Lesa Mwine Wakila, watundaijile Abalahama wabwelelenga kufuma ko akatapile bamfumu kabiji wamupesheshe,+ 2 kabiji Abalahama wamupele* bya bujikumi pa byonse byo asendele. Patanshi, jizhina janji jilumbulula’mba, “Mfumu wa Bololoke,” kabiji amba mfumu wa Salema, ko kuba’mba “Mfumu wa Mutende.” 3 Shanji ne inanji kechi bayukanyikwa ne. Kisemi kyanji nakyo kechi kyayukanyikwa ne. Kabiji bantu kechi bayuka juba jo asemekelwe nangwa jo afwile ne. Bino aye bamwalwile kwikala nobe Mwana Lesa, ñanga wa kikupu.*+
4 Mwamona uno muntu byo akijile Abalahama mutwe* wa kisemi kabiji wamupele byonse bya bujikumi bya pa bipukulwa byawamisha.+ 5 Ibyo, kwesakana na Mizhilo, baana ba kwa Levi+ batambula mwingilo wa buñanga baji na mukambizho wa kutambula bya bujikumi ku bantu,+ ko kuba’mba ku balongo babo nangwa kya kuba nabo ba mu kisemi* kya kwa Abalahama. 6 Bino uno muntu wabujile kuyuka kisemi mo afumine watambwile bya bujikumi kwi Abalahama ne kumupesha awa watambwile milaye.+ 7 Kabiji bantu bonse bakonsha kuswa kino amba, awa mucheche bamupesha ku mukatampe. 8 Bena Levi batambula bya bujikumi bino babena kufwa, pakuba muntu mukwabo watambula bya bujikumi bamwambapo amba watwajijila kwikala mumi.+ 9 Kabiji bakonsha kwamba’mba nangwatu Levi utambula bya bujikumi, upana bya bujikumi kupichila mwi Abalahama, 10 mambo aye wakijinga ukyangye kusemwa mu kisemi* kya kwa Abalahama kimye kyo bamutundaijile kwi Melekizedeke.+
11 Umvwe kulumbuluka kwamwekejile mu buñanga bwa bena Levi+ (mambo Mizhilo yo bapele bantu yavwangilemo ne buñanga), pano mambo ka o kwakebewenga amba kwikale ñanga mukwabo byonka byajinga Melekizedeke+ kechi byajinga Alona ne? 12 Na mambo a kuba’mba, buñanga bubena kupimpulwa, kyafwainwa ne Mizhilo nayo kupimpulwa.+ 13 Mambo muntu ye baambapo mu bino bintu wafumine mu mukoka mukwabo. Mu uno mukoka kafwako nangwa umo wakingijilapo kala ku kya kusokelapo bitapisho ne.+ 14 Kyamwekeshatu patoka’mba Nkambo yetu wafumine mu Yuda,+ mukoka Mosesa ye abujile kwambapo amba mo mukafuma bañanga.
15 Kabiji kino kyamwekeshatu patoka pa kumweka kwa ñanga mukwabo+ uji byajinga Melekizedeke.+ 16 Waikala ñanga, kechi mwayila mizhilo yaimena pa bisemi bya bantu ne, kana mwayila bulume bumulengela kwikala na bumi bubula kupwa.+ 17 Mambo kyashimunwa pe aye amba: “Obewa wi ñanga wa myaka ne myaka byonka byajinga Melekizedeke.”+
18 Onkao mambo, mikambizho ya kala beifumyapo mambo kechi yakosa ne, kabiji kechi ingila ne.+ 19 Mambo Mizhilo kechi yalengejile kintu nangwa kimo kulumbuluka ne,+ bino kusoloka kwa luketekelo lwakilamo+ kuwama ko kwalumbulwile bintu, lonka lwitulengela kufwenya kwipi ne Lesa.+ 20 Na mambo a kuba’mba kino kechi kyamwekele pa kubula luchipo ne 21 (mambo kuji banabalume baikele bañanga kwa kubula luchipo, bino uno waikala ñanga kupichila mu luchipo lo bamuchipijile kwi aye waambile’mba: “Yehoba* wachipa luchipo, kabiji kechi ukapimpula milanguluko* yanji ne, ‘Obewa wi ñanga wa myaka ne myaka’”),+ 22 Yesu ye waikala ke kishiino kya lulayañano lwakilamo kuwama.+ 23 Kabiji bantu bavula baswainenga pa buñanga+ mambo lufu lwibalengejilenga kubula kwikala myaka ne myaka, 24 pakuba aye byo ekala myaka ne myaka,+ kafwako nangwa umo wakonsha kuswana pa buñanga bwanji ne. 25 Onkao mambo, aye wakonsha kupulusha aba basolomoka Lesa kupichila mwi aye, mambo ye mumi kimye kyonse kuba’mba ebasashijileko.+
26 Mambo kituwamina kwikala na ñanga mwine mukatampe wa kishinka,+ wabula mambo, wabula kuzhilululwa, wapusana na bandengamambo kabiji watumbijikwa mwiulu.+ 27 Kupusanako na boba bañanga bakatampe, aye kechi wafwainwa kutapisha bitapisho pa juba pa juba ne,+ kutatwilapo na kya mambo anji, kepo palondela kya mambo a bantu,+ mambo aye waubile kino jimotu kimye kyo elambwile mwine.+ 28 Mambo Mizhilo itongola bantu balenga mambo kwikala bañanga bakatampe,+ bino byambo bya luchipo+ byalondejile pa Mizhilo, byo byatongola mwana, walumbuluka+ myaka ne myaka.