Ku Bahebelu
9 Kabiji lulayañano lwa kala lwajinga na byatongolwa bya mizhilo bya mwingilo wazhila ne mpunzha yalo yazhila+ ya pano pa ntanda. 2 Mambo mu kibamba kitanshi kya tente, mwajinga kya kutulapo malampi+ ne tebulu ne bashinkwa ba kupana kwi Lesa;+ kabiji mwatelwanga’mba, Mwazhila.+ 3 Kabiji kunyuma ya kipembe kya bubiji,+ mu tente mwajinga kibamba kyatelwanga’mba, Mwazhijisha.+ 4 Muno mwajinga kya kusokelapo bya kufutumuna kyo bashingile ngolode,+ ne jikwachi ja lulayañano+ jo bashingile ngolode+ ponse ponse mwajinga kamama ka kwa Alona kasapukile,+ mabwe apapakana a lulayañano+ ne kapuki ka ngolode mwajinga manna;+ 5 kabiji peulu ya jikwachi pajinga bakelubi ba lukumo saka banyeñamina pa kizhiko kya kufuchilapo mambo.*+ Pakuba kino kechi kyo kimye kyo twafwainwa kwamba byavula pa bino bintu ne.
6 Byo bapwishishe kunengezha bino bintu byonse, bañanga batwelanga mu kibamba kitanshi mu tente kimye kyonse na kwingila mingilo yazhila;+ 7 pakuba ñanga mukatampe watwelanga bunke mu kibamba kya bubiji jimo pa mwaka,+ na mashi+ o alambulanga pa mambo anji mwine,+ ne pa mambo a bantu+ o balenganga kwa kubula kuyuka. 8 Onkao mambo, mupashi wazhila wasolola patoka amba jishinda ja kutwelelamo mwazhijisha jaji jikyangye kusololwa byo akijingapo awa tente mutanshi.+ 9 Uno tente ke kimwesho kya pa kino kimye kyo tujimo+ kabiji monka mwayila luno lunengezho, bya bupe ne bitapisho bebilambula.+ Nangwa byonkabyo, bino bintu kechi byakonsha kulengela muntu wingila mwingilo wazhila kwikala na jiwi ja mu muchima jalumbuluka ne.+ 10 Pakuba bino bya bupe ne bitapisho byaimena pa bya kuja, bya kutoma ne mashinda apusana pusana a kutokesheshamo* mwayila mizhilo.+ Bino byajinga bya mu mizhilo pa mambo a bintu bya ku mubiji+ kabiji byapainwe kufikatu ne kimye kya kolola bintu.
11 Nangwa byonkabyo, Kilishitu byo aishile saka aji ñanga mukatampe wa bintu byawama byamweka kala, watwelele mu tente mukatampe wawamisha wabula kulengwa na maboko, ko kuba’mba wabula wa pano pa ntanda. 12 Watwelele mwazhijisha kechi na mashi a bambuzhi nangwa a baana ba bañombe balume ne, bino watwelele na mashi anji+ jimotu ne kwitupokolola* myaka ne myaka.+ 13 Inge kya kuba mashi a bambuzhi ne a bañombe balume+ ne kukusa buto bwa ñombe mukazhi* pa boba bezhilululanga kwibalengelanga kwikala batoka kwi Lesa,+ 14 pano nga mashi a Kilishitu,+ wilambwile aye mwine kwi Lesa kwa kubula kaneneno na mupashi wa myaka ne myaka, nanchi kechi akonsha kutokesha mawi etu a mu muchima ku mingilo yafwa,+ pa kuba’mba twingilenga mwingilo wazhila kwi Lesa mumi nenyi?+
15 O ene mambo o aikela ñambi wa lulayañano lupya.+ Waikala ñambi kuba’mba aba baitwa batambule mulaye wa buswanyi bwa myaka ne myaka.+ Bino byonse byaishile kwikalako na mambo a lufu lwanji kabiji kupichila mu luno lufu bakujilwe na bukuzhi ku mizhilulwila yabo mu lulayañano lwa kala.+ 16 Mambo umvwe paikala lulayañano, muntu walayañana wafwainwa kufwa, 17 lulayañano lutatulatu kwingila inge muntu wilulayile wafwa, mambo luno lulayañano kechi lwingila umvwe mwine wilulayile ukiji mumi ne. 18 Onkao mambo, nangwatu lulayañano lwa kala kechi lwatatwile kwingila pa kubula mashi ne. 19 Mambo kimye Mosesa kyo aambile pa mikambizho ya Mizhilo ku bantu bonse, washikwile mashi a baana ba bañombe balume ne a bambuzhi, pamo na mema, boya bwachijisha ne kakichi ka isopi, ne kusansa pa buku* ne pa bantu bonse, 20 ne kwamba’mba: “Ano o mashi a lulayañano Lesa lo emukambizhe kulama.”+ 21 Kabiji wasanshile mashi ku tente ne ku bipe byonse bya kwingijilamo mwingilo* wazhila.+ 22 Kabiji monka mwayila Mizhilo bintu byavula bebitokesha na mashi,+ umvwe mashi abula kwichilwa, mambo kechi akonsha kulekelwa ne.+
23 Onkao mambo, kyafwainwe bifwanyikizho+ bya bintu bya mwiulu kwibitokesha na bino bintu,+ pakuba bintu bya mwiulu bikebewa bitapisho byawamisha. 24 Mambo Kilishitu kechi watwelele mwazhijisha mwalengwa na maboko,+ mwipasha na mwa kine ne,+ bino watwelele mwiulu,+ kuba’mba amweke kwi* Lesa na mambo a atweba.+ 25 Kechi kyajinga bino amba elambule javula, byonka byaubanga ñanga mwine mukatampe byo atwelanga mwazhijisha pa mwaka pa mwaka+ na mashi abujile anji ne. 26 Inge kyajinga bino, umvwe kyamufwainwe kumanama javula kufumatu ku ntendekelo ya pano pa ntanda. Bino kuno ku mpelo ya buno bwikalo,* aye wisolola jimotu kuba’mba afumyepo bundengamambo kupichila mu kwitapisha aye mwine.+ 27 Kabiji byonkatu bantu byo bapembelela kuba’mba bafwe jimotu, apa bino bebazhachisha, 28 ne Kilishitu naye wilambwile jimotu pa kufumyapo bundengamambo bwa bantu bavula;+ kabiji ja bubiji jo akamweka kechi ukeya na kufumyapo bundengamambo* ne, kabiji bakamumona ku boba babena kumukeba’mba ebapulushe.+