Ezikyo
4 “Kabiji obewa mwana muntu, tola jitafwali ne kwijibika kulutwe yobe. Ulengepo muzhi wa Yelusalema. 2 Kabiji wafwainwa kulukuka+ muzhi ne kushimikako nsakwa+ ne kwiilepesha,+ kushimikamo makampu a bashilikale ne kwiizhokolosha na byela bya kumonawinako.+ 3 Utole jilata japapakana kabiji wijibike jikale nobe lubumbulu wa kyela pakachi kobe ne muzhi. Kepo ukatalenga muzhi kabiji wafwainwa kumwesha muzhi byo bakamulukuka. Akino kyo kiyukilo kya bena Isalela.+
4 “Kabiji ukalaajile mu kabavu ku kipiko* ne kwitwika obe mwine mambo a bena Isalela.+ Pa moba onse o ukalaajila ku kipiko uketwike mambo abo o bandenga. 5 Amiwa nkakutongwela moba 390 kwesakana na myaka yo bandenga mambo,+ kabiji uketwike mambo a bena Isalela. 6 Ukapwishe ano moba onse.
“Apa bino ukalaajile mu kabavu ja bubiji ku kilujo, moba 40 uketwike mambo a bena Yuda.+ Nakutongwela ano moba, juba jimo kwimenako mwaka umo. 7 Kabiji ukatale muzhi wa Yelusalema byo akekala mu kañumbwañumbwa saka uji mabokotu, kabiji ukaule bintu bikamwekela uno muzhi.+
8 “Pano umvwa! Amiwa nkakukasa ntambo kuchina’mba wakalaajila ku kilujo nangwa ku kipiko, posotu ne byo ukapwisha moba obe onse o ukalukukilamo muzhi.
9 “Kabiji wafwainwa kusenda wichi ne wichitu* mukwabo, mbaale, nkunde ne nkunde ichila, luku ne kwibibika mu kintu kimo ne kulenga shinkwa wobe wa kuja. Moba onse 390 o ukalaajilanga mu kabavu, ukajanga uno shinkwa.+ 10 Ukapimanga kajo ko ukajanga pa juba pa juba ka mashekele 20.* Ukekajanga pa bimye byafwainwa.
11 “Kabiji ukatomanga mema a kupima, kipimo kimo kya mu bipimo bitanu na kimo bitwela mu hini.* Ukatomanga mema pa bimye byafwainwa.
12 “Ukajanga byonkatu byo baja shinkwa wa mbaale; ukamusokanga kwingijisha tuvwi twauma twa bantu ne abo saka batalako.” 13 Yehoba waambile’mba: “Abino bena Isalela byo byo bakajanga shinkwa wa ndochi mu bisaka bya bantu mo nkebapangila.”+
14 Amiwa nakaine namba: “Akyo ne, anweba Nkambo Mfumu Yehoba! Mambo kufumatu ku bwanyike bwami kufika ne luno nkyangye kwizhilululapo kupichila mu kuja nyama wifwila nangwa nyama ye batabaula ne,+ kabiji nkyangye kujapo nyama ya ndochi.”+
15 Onkao mambo, aye wañambijile’mba: “Akyo kyawama, nakuswisha kwingijisha tuvwi twa bañombe mu kifulo kya kwingijisha tuvwi twa bantu, atuno to to usakwingijisha koshela shinkwa wobe.” 16 Kabiji wañambijile’mba: “Obewa mwana muntu, nkakepesha kajo* mu Yelusalema+ kabiji bantu bakajanga kajo kabo+ saka bateetela ne kutoma mema a kupima kuchina’mba akapwa.+ 17 Nkoba kino kuba’mba inge babula kajo ne mema, baketalengatu kabiji bakanyana na mambo a bubi bwabo.