Ezikyo
17 Yehoba wañambijile jikwabo amba: 2 “Obewa mwana muntu, bachomeke kichomeko ne kwamba kishimpi kyaamba pa bena Isalela.+ 3 Wibabuule’mba, ‘Nkambo Mfumu Yehoba waamba’mba: “Mpungu mukatampe+ wajinga na byapi bikatampe byalepa ne na mayona avula a misombelo yapusana pusana, waishile ku Lebanoni+ ne kuchibako kamutwe ku kichi kya sida.+ 4 Wachibileko kamutwe kwiulu ya kichi ne kwikaleta mu kyalo kya basulu* ne kwikatula mu muzhi wa basulu.+ 5 Kabiji wafumishe nkunwa imo ya mu kyalo+ ne kukeibyala mu mushiji wafuka. Wiibyajile kwajinga mema avula byonkatu byo babyala kichi kya musombo. 6 Onkao mambo, nkunwa yamenene ne kukoma ne kwikala kichi kya miñanzañanza+ kipi kyajinga na mabuula atenkuma azenzumukijile munshi, kabiji kyatwezhezhe mizhazhi yakyo panshi. Byonkabyo, kyaikele ke kichi kya miñanzañanza kabiji kyasapukile ne kwikala na misampi.+
7 “‘“Kabiji kwaishile mpungu mukwabo mukatampe+ wajinga na byapi bikatampe byalepa bingi.+ Kino kichi kya miñanzañanza kyatwajile mizhazhi yakyo panshi kwi aye ne kupisha mizhazhi yakyo pa milaala ya mu mashamba ne kusapuka, kuba’mba ekitekezhenga.+ 8 Bekibyajijile jimo pa mushiji wafuka kwipi na mema avula, pa kuba’mba kikale na misampi, kupanga bipangwa ne kwikala kichi kikatampe kya miñanzañanza.”’+
9 “Wibabuule’mba, ‘Nkambo Mfumu Yehoba waamba’mba: “Nanchi kino kichi kikakoma nyi? Abya kukekalapo muntu ukatupula mizhazhi yakyo,+ kya kuba bipangwa byakyo byabola ne kulengela mabuula akyo kulela nyi?+ Kikooma kabiji kechi kukakebewanga muntu wa ngovu nangwa bantu bavula kuba’mba bekizhulepo ne. 10 Nangwa kya kuba bekijimbila pakwabo, abya kikakoma nyi? Nanchi kechi kikooma inge kwapupila mwela wa ku musela nenyi? Kine, kikoomina pa mulaala mu mashamba ponka po kyasapukijile.”’”
11 Kabiji Yehoba wañambijile jikwabo amba: 12 “Ambila kisaka kya milengulwila amba, ‘Nanchi kechi mwayuka mwatala bino bintu nenyi?’ Wibabuule’mba, ‘Umvwai! Mfumu wa Babilona waishile ku Yelusalema kabiji wasendele mfumu ne babinemanga banji ne kubwela nabo ku Babilona.+ 13 Byonkabyo, wasendelepo mwana* umo wa ku bufumu+ ne kulayañana nanji kintu kimo kuba’mba akekifikizhe.+ Kabiji wafumishemo babinemanga mu kyalo+ 14 kuba’mba bufumu bukapone ne kubula kwikala na bulume jikwabo, bino umvwe bwalama lulayañano lwanji, bukakonsha kutwajijila kwikalako.+ 15 Pakuba mfumu wamusatukijile+ kupichila mu kutuma baluwe banji ku Ijipita na kusenda bambili+ ne jibumba jikatampe ja bashilikale.+ Nanchi ukashinda nyi? Nanchi muntu ubena kuba bino bintu kechi bakamukambula nenyi? Nanchi wakonsha kubula kufikizha kintu kyo bamulayile ne kumulekatu nyi?’+
16 “‘Nkambo Mfumu Yehoba waamba’mba, “Byonkatu byo nji na bumi, aye ukafwila mu Babilona monka mwikala mfumu* wamubikile* pa bufumu, ko kuba’mba mwine mwina lulayañano lo alengulwile ne kubula kwilufikizha.+ 17 Uno muntu kechi bakamukwasha ku bashilikale ba kwa Felo ne bantu banji mu nkondo+ inge bena Babilona balenga mishiime yalepa ne kushimika masakwa a kulwilapo pa kuba’mba bepaye bantu* bavula ne. 18 Aye walengulula lulayañano kabiji kechi wafikizha kintu kyo alayile ne. Nangwa kya kuba walayile,* aye wauba bino bintu byonse kabiji kechi bakamulekatu ne.”’
19 “‘Onkao mambo, Nkambo Mfumu Yehoba waamba’mba: “Byonkatu byo nji na bumi, nkamukambula na mambo a kulengulula lulayañano lwami+ ne kubula kwilufikizha. 20 Nkamuta bukonde bwami ne aye ukafwamo.+ Nkamutwala ku Babilona ne kumuzhachisha konkakwa na mambo a bintu byatama byo angubile.+ 21 Bashilikale banji bonse bakanyema, bakafwa ku mpoko ne boba bakashalapo bakapalañena konse konse.*+ Kepo mukayuka’mba amiwa Yehoba yami naamba.”’+
22 “‘Nkambo Mfumu Yehoba waamba’mba: “Amiwa nkachiba kamutwe kwiulu ya kichi kya sida+ ne kwikajimba, kabiji ku misampi yakyo nkachibako kamutwe ka kwiulu kanekena.+ Kabiji nkekajimba peulu ya mutumba walepesha.+ 23 Nkekajimba peulu ya mutumba wa Isalela; ne misampi yako ikakoma ne kupanga bipangwa kabiji kakekala ke kichi kikatampe kya sida. Bañonyi bapusana pusana bakapwilanga konka ne kwikala mu kimfutele kya mabuula akyo. 24 Onkao mambo, bichi byonse bya mungye bikayuka’mba amiwa Yehoba, yami naponesha kichi kyalepa ne kutumbijika kipupu;+ kabiji naumisha kichi kyasapukilenga ne kulengela kichi kyauma kusapuka.+ Amiwa Yehoba yami naamba ne kwikyuba.”’”