Ku Bena Efisesa
6 Anweba baana, kookelainga bansemi+ benu mwayila kyaswa muchima wa Nkambo, mambo kino kyo kyaoloka. 2 “Nemeka bashobe ne bainobe,”+ uno ye mukambizho mutanshi uji na mulaye wa kuba’mba: 3 “Ukamwenemo bintu byawama ne kwikala myaka yavula pano pa ntanda.” 4 Kabiji anweba bashetu, kange muzhingijishenga baana benu ne,+ bino bakomeshainga mu kwibajimuna+ ne kwibafunjisha* maana a Yehoba.*+
5 Anweba bakalume, kookelainga bankambo yenu+ ba pano pa ntanda* na moyo ne na mushingi mukatampe byonka byo mukookela Kilishitu, 6 kechi kubatu kino, kimye kyo babena kwimumona kuba’mba mutokeshe bantu ku muchima ne,*+ bino kukookela byonka bikookela bakalume ba kwa Kilishitu, saka muba na mweo* yense kyaswa muchima wa Lesa.+ 7 Ingilainga na muchima wawama, nobe mubena kwingijila Yehoba,*+ kechi bantu ne, 8 mambo mwayuka’mba kintu kyonse kyawama muntu kyo oba, Yehoba* ukamufweta,+ nangwa muzha nangwa mwana bene. 9 Kabiji anweba bankambo yabo, mwibobilenga byonka bino bakalume benu ne kwibazakamishanga ne, mambo mwayuka’mba Nkambo yabo ne wenu uji mwiulu,+ kabiji kechi uji na misalululo ne.
10 Kyapelako, ikoseshainga+ mwi Nkambo ne mu bulume bwa ngovu yanji. 11 Vwalai byonse bya nkondo+ byafuma kwi Lesa kuba’mba mukonshe kwimana saka mwakosa ku bya bujimuku* bya kwa Diabola; 12 mambo tubena kulwa,*+ kechi na mibiji ya mashi ne, bino tubena kulwa na makafulumende, na ba luusa, na bamfumu ba pano pa ntanda ba ino mfishi, ne na nzhita ya bapashi batama+ baji mu mapunzha a mwiulu. 13 Na mambo a kino, vwalai byonse bya nkondo byafuma kwi Lesa+ kuba’mba mukonshe kushinda mu juba jatama, kabiji pa kupwisha byonse, mwimane saka mwakosa.
14 Onkao mambo, imanai saka mwakosa, saka mwinyinga mushipi wa bukine mu lubunda wenu+ ne kuvwala kyela kya pa kyaji kya bololoke,+ 15 ne kuvwala ku maulu enu makwabilo mu kwinengezhezha jimo kusapwila mambo awama a mutende.+ 16 Kununga pa bino bintu byonse, shikulai jikebo jikatampe ja lwitabilo,+ ja kuleyelamo miketo yonse ya mujilo ya kwa aye mubi.+ 17 Kabiji tambulai kampompo ka lupulukilo,+ ne mpoko ya mupashi, ko kuba’mba mambo a Lesa,+ 18 saka mulomba milombelo yapusana pusana kimye kyonse+ ne kulomba na misashijilo mwayila mupashi.+ Pa kuba’mba mube kino, mwafwainwa kulabanga, saka mulombelako bazhijikwa bonse na misashijilo. 19 Ndombelaingako ne amiwa, kuba’mba umvwe naasamika kanwa, ñambe saka nakasuluka ne kusolola kyafyamika kyazhila kya mambo awama,+ 20 o naikajila ntomesha+ uji mu minyololo, ne kuba’mba ñambe mambo awama na kuchinchika, byonka byo nafwainwa kwamba.
21 Kabiji pa kuba’mba mukayuke byo nji ne byo mbena kuba, Tikikusa+ mulongo wetu mutemwe, wa mwingilo wa kishinka mwi Nkambo, ye ukemubuula bintu byonse.+ 22 Onkao mambo, mbena kumutuma kwi anweba, kuba’mba muyuke byo tuji ne kuba’mba atekeneshe michima yenu.
23 Mutende ne butemwe pamo na lwitabilo bifuma kwi Lesa Tata ne Nkambo Yesu Kilishitu, bikale pa balongo betu. 24 Lusa lukatampe lwikale pa bonse batemwa Nkambo yetu Yesu Kilishitu kya kine.