Nkalata Itanshi ku Bena Kolinda
3 Onkao mambo, balongo bami, kechi nakonsheshe kwimwambila byonka byo bambila bantu ba bumupashi ne,+ kana byonka byo bambila bantunshi,+ ne balukeke mwi Kilishitu. 2 Amiwa nemupele mukaka kechi kajo kakosa ne, mambo mwajinga mukyangye kukosa. Ne panotu kechi mwakikosa ne,+ 3 mambo mukiji bantunshi.+ Mambo mwi anweba muji kichima ne lutobo, nanchi anweba kechi mwi bantunshi+ kabiji mwenda byonkatu byenda bantu nenyi? 4 Mambo umvwe umo waamba’mba: “Amiwa ne wa kwa Paulo,” bino mukwabo amba, “Amiwa ne wa kwa Apolosa,”+ nanchi kechi mubena kuba nobe bantutu nenyi?
5 Apolosa ye ñanyi? Kabiji Paulo naye ye ñanyi? Abo, ke ba mingilotu+ bemukwashishe kwitabila, monkatu mo ebapelejile Nkambo pa muntu pa muntu. 6 Amiwa nabyajile,+ Apolosa watekezhe,+ bino Lesa ye wiikomeshenga, 7 pa kuba’mba awa ubyala nangwa awa utekezha abule kutotwa, kana Lesa yenka wiikomesha.+ 8 Awa ubyala ne yewa utekezha bajitu pamo,* bino muntu yense bakamufweta monka mwayila mingilo yanji.+ 9 Mambo atweba twi ba mwingilo umo ne Lesa. Anweba mwi bujimi bwa Lesa bo abena kujima, kishimikwa kya Lesa.+
10 Monka mwayila lusa lukatampe lwa Lesa lo ammwesheshe, naajile kitendekesho+ nobe sendwe* wayukisha kushimika, pakuba muntu mukwabo ubena kushimika ponka. Bino muntu yense ajimuke pa byo abena kushimikapo. 11 Mambo kafwako muntu nangwa umo wakonsha kwala kitendekesho kikwabo kukila pa kyonkakya kyaalwa kala ne, ko kuba’mba Yesu Kilishitu.+ 12 Pano umvwe muntu washimika pa kino kitendekesho na ngolode, siliva, mabwe a buneme, bichi, nsono nangwa na nenge, 13 mingilo ya muntu yense ikamweka byo iji, mambo aja juba jikeimwesha byo iji, mambo mujilo ye ukeisolola,+ ne mujilo ye ukamwesha biji mingilo ya muntu yo aingijile. 14 Umvwe mujilo wabula kusoka kintu muntu kyo ashimikile pa kitendekesho, ukatambula mfweto; 15 bino umvwe mujilo wasoka mingilo ya muntu, mingilo yo aingijile ikonaika, bino aye mwine ukapuluka; bino kikekala nobe wapuluka mu mujilo.
16 Nanchi anweba kechi mwayuka’mba yenu nzubo ya Lesa+ kabiji mupashi wa Lesa wikala mwi anweba nenyi?+ 17 Umvwe muntu waonauna nzubo ya Lesa, Lesa naye ukamonauna; mambo nzubo ya Lesa yazhila kabiji anweba mwi yoyo nzubo ya Lesa.+
18 Muntu nangwa umo kange ejimbaikenga mwine ne: Umvwe umo mwi anweba walanguluka’mba uji na maana mu buno bwikalo,* ekale wakosama, pa kuba’mba ekale ke wa maana. 19 Mambo maana a ba pano pa ntanda bo bumbulwamaana kwi Lesa, mambo kyanembwa’mba: “Lesa uleka ba maana kufwa mu bya bujimuku byabo.”+ 20 Kabiji kyanembwa’mba: “Yehoba* wayuka milanguluko ya bantu ba maana amba yo yatu.”+ 21 Onkao mambo, muntu nangwa umo kange etotelenga mu bantu ne; mambo bintu byonse byo byenu, 22 nangwa Paulo, Apolosa, Kefasa,*+ ntanda, bumi, lufu nangwa bintu bijipo nangwa bintu bikeya, bintu byonse byo byenu; 23 kabiji mwi ba kwa Kilishitu;+ Kilishitu naye ye wa kwa Lesa.