Hagai

2 Mu ñondo wa butanu na bubiji, pa juba ja bu 21 ja ñondo, byambo bya Yehoba byaishile kupichila mwi ngauzhi Hagai+ amba, 2 “Ipuzha Zelubabele+ mwana wa kwa Shalachele, kinemanga wa mu Yuda,+ ne Yoshua+ mwana wa kwa Yehozadaka,+ ñanga mwine mukatampe ne bantu bonse bashala amba: 3 ‘Ñanyi mwi anweba wamwene lukumo lwa ino nzubo byo yajinga kala?+ Mubena kwiimona byepi luno? Nanchi kechi yapusana na byo yajinga kala nenyi?’+

4 Yehoba waamba’mba, “‘Pano kosa obewa Zelubabele, kosa ne obewa Yoshua mwana wa kwa Yehozadaka, ñanga mwine mukatampe.’

Yehoba waamba’mba, “‘Kosai ne anweba bantu bonse ba mu kyalo+ ne kwingila.’

“‘Mambo nji nenu,’+ byo byaamba Yehoba wa mabumba. 5 ‘Vulukai kyo nemulayile kimye kyo mwafumine mu Ijipita,+ kabiji mupashi wami uji pe anweba.*+ Kange mwakamwe ne.’”+

6 “Mambo Yehoba wa mabumba waamba’mba, ‘Ne jikwabo, mu kakimye kachechetu, ne amiwa nkasunkenya meulu ne ntanda ne kalunga ka mema ne mushiji wauma.’+

7 Yehoba wa mabumba waamba’mba, “‘Kabiji nkasunkenya bisaka byonse bya bantu, ne bya buneme* bya mu bisaka byonse bya bantu bikeya;+ kabiji nkayuzha ino nzubo na lukumo.’+

8 Yehoba wa mabumba waamba’mba, “‘Siliva yo yami, ne ngolode yo yami.’

9 Yehoba wa mabumba waamba’mba, “‘Lukumo lukekala na ino nzubo lukakila lolwa lutanshi.’+

Yehoba wa mabumba waamba’mba, “‘Kabiji ino mpunzha nkeilengela kwikala mu mutende.’”+

10 Pa juba ja bu 24 ja ñondo wa butanu na buna, mu mwaka wa bubiji wa kwa Daliusa, byambo bya Yehoba byaishile kwi ngauzhi Hagai+ amba: 11 “Yehoba wa mabumba waamba’mba, ‘Ipuzha bañanga pa mambo a mizhilo amba:+ 12 “Inge muntu wasenda nyama yazhila mu kivwalo kyanji, kabiji kivwalo kyanji kyakunkula ku shinkwa nangwa mu masuku nangwa mu binyu nangwa mu manyi nangwa ku kajo konse, nanchi bino bintu bikekala byazhila nyi?”’”

Bañanga bakumbwile’mba: “Ine!”

13 Kepo Hagai aipwizhe’mba: “Inge muntu wizhilulula na mambo a kukwata mubiji* wa muntu wafwa kabiji wakwata ku bino bintu, nanchi bikekala bya muzhilo nyi?”+

Bañanga bakumbwile’mba: “Bikekala bya muzhilo.”

14 Onkao mambo, Hagai waambile’mba: “‘Bino byo biji bano bantu, kabiji byo byo mmona ne kino kisaka, kabiji byo biji ne mingilo yonse ya maboko abo; kintu kyonse kyo bapana kyo kya muzhilo,’ byo byaamba Yehoba.

15 “‘Pano teshai michima* yenu pa kino kufuma lelo kuya ne kulutwe: Jibwe saka bakyangye kwijitenteka pa jibwe jikwabo mu nzubo ya Yehoba,+ 16 kyajinga byepi pa kyokya kimye? Muntu inge waya ku mulumba wa kajo ne kuketekela kutaana bipimo 20, wataanangakotu bipimo 10; kabiji muntu inge waya ku kya kufiinamo binyu na kutapulamo bipimo 50 mu kyo balaminangamo binyu, mwafumangatu bipimo 20;+ 17 Nemupumine pamo na mingilo yonse ya maboko enu, na kyashi ne na kabuwa+ ne na mvula wa mabwe, bino kafwako nangwa umo waalukijile kwi amiwa ne,’ byo byaamba Yehoba.

18 “‘Teshai michima* yenu pa kino kufuma lelo kuya ne kulutwe, juba ja bu 24 ja ñondo wa butanu na buna, jo juba jo baajile kitendekesho kya nzubo ya Yehoba;+ teshai michima yenu pa kino: 19 Nanchi mu butala* mukiji nkunwa nyi?+ Nanchi muñanzañanza, mukuyu, mapomegulanchi ne bichi bya maolivi, byapanga kala bipangwa byabyo nyi? Kufumatu lelo nsakwimubilanga bibusa.’”+

20 Byambo bya Yehoba byaishile jibiji kwi Hagai pa juba ja bu 24 ja ñondo+ amba: 21 “Umwambile Zelubabele, kinemanga wa mu Yuda amba, ‘Nsakusunkenya meulu ne ntanda.+ 22 Nkaponesha matanda a bufumu ne konauna bulume bwa bufumu bwa bisaka bya bantu;+ kabiji nkaponesha makalaki ne bendapo, ne bambili ne bendapo bakafwa, muntu yense ku mpoko ya mulongo wanji.’”+

23 “Yehoba wa mabumba waamba’mba, ‘Pa joja juba, nkakusenda obewa Zelubabele+ kalume wami mwana wa kwa Shalachele,’+ byo byaamba Yehoba, ‘kabiji nkakulengela kwikala nobe kambalaminwe ka katetesho, mambo yobe nasala,’ byo byaamba Yehoba wa mabumba.”