Ku Bena Kolose
1 Amiwa Paulo mutumwa wa Kilishitu Yesu mwayila kyaswa muchima wa Lesa, ne Timoti+ mulongo wetu, 2 kwi anweba bazhijikwa ne balongo ba kishinka mwi Kilishitu baji mu Kolose:
Lusa lukatampe ne mutende bifuma kwi Lesa Tata wetu bikale pe anweba.
3 Kimye kyonse tumusanchila Lesa, Shanji Nkambo yetu Yesu Kilishitu, pa kwimulombelako, 4 mambo twaumvwa nkuwa ya lwitabilo lwenu mwi Kilishitu Yesu ne byo mwatemwa bazhijikwa bonse 5 na mambo a luketekelo lo bemutujila mwiulu.+ Luno luketekelo mwilumvwine kala mu byambo bya bukine bya mambo awama 6 aishile kwi anweba. Byonkatu mambo awama byo abena kupanga bipangwa ne kuya na kukumbana pano pa ntanda ponse,+ byo byo auba ne mwi anweba kufumatu kimye kyo mwaumvwine ne kuyukisha bulongo bukine bwa lusa lukatampe lwa Lesa. 7 Kino kyo kyo mwafunjile kwi Epafalasa+ kalume mukwetu mutemwe, wa mwingilo wa kishinka wa Kilishitu mu kwitwimenako atweba. 8 Kabiji witubuujile butemwe bo mumwesha na bukwasho bwa mupashi wa Lesa.
9 O ene mambo, kufumatu kimye kyo twaumvwine kino, kechi twaleka kwimulombelako ne,+ namba muyukishenga bulongo kyaswa muchima wanji mu maana onse+ ne kukwatakanya bintu bya ku mupashi,+ 10 pa kuba’mba mwendenga monka mukebela Yehoba* mwa kumutokeshesha ku muchima byo mubena kupanga bipangwa mu mingilo yonse yawama ne kuyilako palutwe mu kuyukisha bulongo Lesa;+ 11 tambulainga bulume bukatampe na mambo a lukumo lwa bulume bwanji,+ pa kuba’mba mukonshe kuchinchika saka mwatekanya mu bintu byonse ne kwikala na lusekelo, 12 byo mubena kumusanchila Tata, wimulengejile kuba’mba mutambule kya buswanyi kya bazhijikwa+ baji mu kyeya.
13 Aye witupokolwele ku luusa lwa mfishi+ ne kwitutwala mu bufumu bwa Mwananji ye atemwa, 14 na mambo a aye betukuula na bukuzhi, ko kuba’mba kwitulekelako mambo etu.+ 15 Aye ye kipasha kya Lesa ubula kumweka,+ mubeji wa bilengwa byonse;+ 16 mambo bintu byonse byalengelwe kupichila mwi aye, bya mwiulu ne bya pano pa ntanda, bimweka ne bibula kumweka,+ nangwa matanda nangwa bunkambo nangwa makafulumende nangwa ba luusa. Bintu byonse byalengelwe kupichila mwi aye kabiji byalengejilwe aye yenka.+ 17 Aye wajingako bintu byonse saka bikyangye kulengwa,+ kabiji mwi aye mo mwalengejilwe bintu byonse, 18 kabiji aye ye mutwe wa mubiji, ko kuba’mba kipwilo.+ Aye ye ntendekelo, ye mubeji wajinga mutanshi kusangulwa mu bafu,+ kuba’mba ekale mutanshi mu bintu byonse; 19 mambo Lesa kyamutokejile ku muchima kuba’mba bintu byonse bikale mwi aye,+ 20 kabiji kupichila mwi aye Lesa wapwanya bintu byonse kwi aye mwine,+ pa kuleta mutende na mashi+ Kilishitu o aichijile pa kichi* kya lumanamo, nangwa bintu biji pano pa ntanda nangwa biji mwiulu.
21 Kine, ne anweba kala mwajingatu bangi kabiji balwanyi na mambo a kuba mwalangulukangatu pa mingilo yatama, 22 pano wimupwanya kupichila mu mubiji wa yewa wipaine mwine ku lufu, pa kuba’mba akemufikizhe kwi Lesa saka mwazhila, babula kaneneno ne babula mambo+— 23 inge mwatwajijila kwikala na lwitabilo+ saka mwaikajikwa pa kitendekesho+ ne kukosa,+ ne kubula kuleka kuketekela mambo awama o mwaumvwine kabiji asapwijilwe ku bilengwa byonse biji pano panshi.+ Amiwa Paulo naikajile ke wa mwingilo wa ano mambo awama.+
24 Pano mbena kusekela mu kumanama kwami na mambo a anweba,+ kabiji kuno kumanama kwa Kilishitu ko mbena kupitamo kukyangye kufikilamo mu mubiji wami kwimenako mubiji wanji,+ ko kuba’mba kipwilo.+ 25 Naikele wa mwingilo wa kino kipwilo mwayila bukalama+ bwafumine kwi Lesa bo bampele na mambo a anweba kuba’mba nsapwile bulongo mambo a Lesa, 26 o mambo a kyafyamika kyazhila+ kyafyamikile mu bwikalo*+ bwa kala ne ku bisemi bya kala. Pano luno kyasololwa ku bazhijikwa banji,+ 27 Lesa bo kyamutokela ku muchima kwibasolwela bunonshi bwa lukumo lwa kino kyafyamika kyazhila mu ba mu bisaka bya bantu,+ ko kuba’mba Kilishitu uji mwi anweba ne luketekelo lwa lukumo lwanji.+ 28 Ye ye tubena kusapwila, saka tujimuna yense ne kufunjisha muntu yense na maana a kine, kuba’mba tukafikizhe muntu yense kwi Kilishitu saka afikilamo.+ 29 Kyo kine kintu kyo mbena kwingijila na ngovu, ne kwibikishako na mambo a bulume bwanji bukatampe bubena kwingila mwi amiwa.+