Byubilo bya Batumwa
3 Petelo ne Yoano bayilenga ku nzubo ya Lesa kimye kya milombelo, pa jiola* ja butanu na buna, 2 kabiji kwajinga mwanamulume wasemekelwetu kilema ye bashikulangatu. Pa juba pa juba bamutulanga kwipi na kibelo kya nzubo ya Lesa kyatelwanga’mba Buya, onkao mambo, walombanga bya bupe ku batwelanga mu nzubo ya Lesa. 3 Byo amwene Petelo ne Yoano na kutwela mu nzubo ya Lesa, watendekele kwibalomba bya bupe. 4 Bino Petelo ne Yoano bamutajishe, kepo Petelo amwambijile’mba: “Akitutale.” 5 Ne aye wibatajile ne kulanguluka’mba kampe basakumupapo bintu bimo. 6 Nangwa byonkabyo, Petelo wamwambijile’mba: “Siliva ne ngolode mfwabyo, bino nsakukupa kyonka kyo nji nakyo. Mu jizhina ja Yesu Kilishitu mwina Nazala, nakwambila namba enda!”+ 7 Kabiji wamukwachile ku kuboko kwa kilujo ne kumwimanya.+ Ponkapotu ne maulu anji abukilwe;+ 8 kabiji uno muntu byo aimene,+ watendekele kwenda. Kepo ayile nabo mu nzubo ya Lesa saka enda, kukilauka ne kutota Lesa. 9 Ne bantu bonse bamumwene saka enda ne kutota Lesa. 10 Kabiji bamuyukile’mba uno muntu ye yewa waikalanga ku Kibelo kya Buya kya nzubo ya Lesa+ na kulomba bya bupe, kabiji bakuminye bingi ne kusekela pa kumona kyamumwekejile.
11 Uno mwanamulume byo akikwachile Petelo ne Yoano ku maboko, bantu bonse bebanyemejile mu bukonde bwatelwanga’mba Bukonde bwa Solomone+ saka bakumya bingi. 12 Petelo byo amwene kino, waipwizhe bantu amba: “Anweba bena Isalela, mambo ka o mubena kukuminya kino, kabiji mambo ka o mubena kwitutajila uba nobe bulume bwetu nangwa kunemeka Lesa kwetu ko kwalengela uno muntu amba ende? 13 Lesa wa Abalahama, Lesa wa Izaka, Lesa wa Yakoba+ kabiji Lesa wa bashakulu betu ye wamutumbijika Kalume wanji+ aye Yesu,+ yenka ye mwapaine+ ne kumukana kwi Pilato, nangwa kya kuba wakebelenga kumukasulula. 14 Anweba mwamukaine awa muntu wazhila kabiji waoloka, bino mwakebeleko mbanzhi kuba’mba bemukasulwileye,+ 15 pakuba mwaipayile Ntangi Mwine wa bumi.+ Bino Lesa wamusangwile mu bafu kabiji atweba bonse twi bakamonyi.+ 16 Kabiji kupichila mu jizhina janji ne na mambo a kuba twaitabila mu jizhina janji, kyo kyalengela’mba abukwe uno muntu ye mubena kumona kabiji ye mwayuka. Lwitabilo lwanji lo lwamulengela kuba’mba abukwe anweba bonse saka mumonako. 17 Balongo bami, nayuka namba mwaubile kino kintu mu bulubi+ byonkatu byaubile bantangi benu.+ 18 Bino Lesa waswishishe bino bintu kubiwa kuba’mba bifike abya byo aambijile jimo kupichila mu bangauzhi amba, Kilishitu wanji ukamanama.+
19 “Onkao mambo, lapilai+ ne kwaluluka+ pa kuba’mba mambo enu beazhimañanye,+ ne Yehoba ukemukokolosha 20 kabiji ukemutumina Kilishitu ye emutongwela, ko kuba’mba Yesu. 21 Aye wafwainwa kwikala mwiulu posotu kimye kikafike Lesa kyo akabwezha bintu byonse byo byajinga patanshi, byonka byo aambile kupichila mu bangauzhi bazhila ba kala. 22 Kabiji Mosesa waambile’mba: ‘Yehoba* Lesa wenu ukemutongwela ngauzhi uji nobe amiwa kufuma mu balongo benu.+ Mwafwainwa kumvwina byonse byo akemubuula.+ 23 Muntu* yense ukabula kumvwina yewo Ngauzhi, bakamonauna kufuma mu bantu.’+ 24 Kabiji bangauzhi bonse kutendekela kwi Samwela ne boba balondejilengapo, baawile patoka pa ano moba.+ 25 Anweba mwi baana ba bangauzhi ne ba lulayañano lo alayañene Lesa na bashakulu benu,+ waambijile Abalahama amba: ‘Kupichila mu mwanobe* bisemi byonse bya pano pa ntanda bikatambula mapesho.’+ 26 Lesa byo atongwele Kalume wanji, patanshi wamutumine kwi anweba+ kuba’mba emupeshe kupichila mu kwimukwasha pa muntu pa muntu kuleka byubilo byenu byatama.”