Yelemiya
40 Yehoba waambijile Yelemiya kimye Nebuzaladana+ mukulumpe wa bakasopa kyo amuswishishe kufuma ku Lama.+ Wamutwajile kokwa saka amukasa nshimbi, kabiji wajinga pa bazha bonse ba mu Yelusalema ne bena Yuda bo batwajilenga ku Babilona. 2 Ponkapo mukulumpe wa bakasopa wamwichile Yelemiya ne kumwambila’mba: “Yehoba Lesa wobe waambijile jimo bino bya malwa bikamwekela ino mpunzha, 3 ne Yehoba waletele bya malwa monkatu mo aambijile, mambo anweba bantu mwamulengele mambo Yehoba kabiji kechi mwakookejile byo aambile ne. O ene mambo bino bintu o bimumwekela.+ 4 Pano amiwa lelo mbena kukukasulula nshimbi ku maboko obe. Umvwe wakeba kuya ku Babilona, twaya, ne amiwa nkakulamanga. Bino inge kechi ubena kukeba kuya ku Babilona ne, shala. Tala! Kyalo kyonse kiji mu maboko obe. Yanga konse ko ukeba kuya.”+
5 Yelemiya saka akyangye kubwela, Nebuzaladana wamwambijile’mba: “Bwela kwi Gedaliya+ mwana wa kwa Ahikama, Ahikama+ mwana wa kwa Shafwana,+ yenka ye batongola kwi mfumu wa Babilona kulama mizhi ya mu Yuda, kabiji ukekale nanji pamo na bantu; nangwa yanga konse ko wakeba kuya.”
Mukulumpe wa bakasopa wamupele kajo ne bya bupe, kabiji wamulekele kuba’mba ayenga. 6 Onkao mambo, Yelemiya wayile kwi Gedaliya mwana wa kwa Ahikama ku Mizipa,+ kabiji waikelenga nanji pamo na bantu bashajile mu kyalo.
7 Kabiji bakulumpe ba bashilikale bajinga mu kyalo na bantu babo, baumvwine’mba mfumu wa Babilona watongola Gedaliya mwana wa kwa Ahikama kulama kyalo ne kuba’mba wamutongola kulama banabalume, banabakazhi ne baana ba bantu bayanji bo babujile kutwala ku Babilona.+ 8 Ponkapo baishile kwi Gedaliya ku Mizipa.+ Bajinga Ishimela+ mwana wa kwa Netaniya, Yohanana+ ne Yonafwanyi, baana ba kwa Kalea, Selaya mwana wa kwa Tanahumeta, baana ba kwa Efwai mwina Netofwa ne Yezaniya+ mwana wa mu bena Maakata pamo ne bantu babo. 9 Gedaliya mwana wa kwa Ahikama, Ahikama mwana wa kwa Shafwana, wachipile kwi abo ne bantu babo amba: “Kange muchine kwingijila bena Kalodeya ne. Ikalai mu kyalo ne kwingijila mfumu wa Babilona kabiji bintu bikemuwamina.+ 10 Pakuba amiwa nkekala mu Mizipa kuba’mba nkemwimenengako* ku bena Kalodeya bakeyanga kwi atweba. Bino anweba mukakonkanye binyu, bipangwa bipya mayoo ne manyi kabiji mukebilonge mu bipe byenu byo mulaminamo bintu ne kwikala mu mizhi yo mwatambula.”+
11 Kabiji Bayudea bonse bajinga mu Moabu, mu Amonyi ne mu Edomu ne boba bajinga mu byalo bikwabo byonse, nabo baumvwine amba mfumu wa Babilona waswisha bantu bamo kushala mu Yuda, kabiji amba watongola Gedaliya mwana wa kwa Ahikama, Ahikama mwana wa kwa Shafwana kuba’mba ebalamenga. 12 Onkao mambo, Bayudea bonse babwelele kufuma mu mapunzha onse mo bebapalañenyejile, kabiji baishile mu kyalo kya Yuda kwi Gedaliya ku Mizipa. Kabiji bakonkenye binyu ne bipangwa byavula bingi bipya mayoo.
13 Kabiji Yohanana mwana wa kwa Kalea ne bakulumpe bonse ba bashilikale bajinga mu kyalo, baishile kwi Gedaliya ku Mizipa. 14 Bamwambijile’mba: “Nanchi kechi wayuka’mba Baalisa mfumu wa bena Amonyi+ watuma Ishimela mwana wa kwa Netaniya kwiya na kukwipaya* nenyi?”+ Pano bino, Gedaliya mwana wa kwa Ahikama kechi waswile byo baambile ne.
15 Ponkapo Yohanana mwana wa kwa Kalea wabuujile Gedaliya ku Mizipa mu bufyamfya amba: “Mbena kukeba kuya na kwipaya Ishimela mwana wa kwa Netaniya, kabiji kafwako muntu nangwa umo usakuyuka ne. Mambo ka o abena kukebela kukwipaya,* kabiji mambo ka o afwainwa kulengela bantu bonse ba mu Yuda bakonkana kwi obewa kupalañenamo ne kulengela bantu bashajile mu Yuda kufwa?” 16 Pano bino, Gedaliya+ mwana wa kwa Ahikama waambijile Yohanana mwana wa kwa Kalea amba: “Kange ube kino ne, mambo bintu byo ubena kwamba pe Ishimela bya bubela.”